Pinongurugan 35 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Kinopululi'an ni Yakub so Bitil

¹ Mutongaro yo Kinoringan so si Yakub nu, “Aku yo Kinoringan iri minintolang so ikau, nu linaiwan mu kiat so ongko mu ri, si Isau. Ian-o so Bitil, polak-o dii om pomaal-o nu ranggar pongusaa'an mu so Aku,” koo.

^2-3 Indadi mutongaro yo sono si Yakub so anak sawo niyo ri om ongo lobuw maid-waid so iyo ri nu, “Murongkat toko yo kiat tuui mian so Bitil. Momaal aku dii nu ranggar suat so Kinoringan, iri minonabang so aku so kosusaan ku, om minongingolig so aku so pomponowan ku ri. Indadi, odai muyu yo kiawi' tinindobuw usaa'on muyu, podiu' kou yo, om mupokakas-o nu owagu,” koo.

⁴ Taaki yo sono nosiro so si Yakub ongo tinindobuw usaa'on nosiro om anting-anting pinakai nosiro mongusaa' ri, om lobongi yo ni Yakub kiawi' iiri so puun nu kayu okutuw so obi' nu bandar Sikim.

⁵ Laid nu murongkat si Yakub om ongo lobuw niyo ri, sobana ko pinolaa' nu Kinoringan lobuw so ongo bandar otoliban nosiro ri om dai sono minonarak so nosiro.

⁶ Nokologa' yo sono nosiro so Lus, ono yo Bitil dii so Kanaan.

⁷ Momaalo yo si Yakub nu ranggar pongusaa'an niyo dii, om ingorani yo niyo tontong iiri nu Kinoringan nu Bitil so' dii yo inintolangan nu Kinoringan so iyo, nu linaiwan niyo kiat so ongko niyo ri.

⁸ Dii yo kinopotoyan ni Dobura, iri moonabang so si Ribka, om nilobong sono iyo so puun nu kayu umpak so solatan nu bandar-i. Ono yo ko' iningoranan puun oono nu, “Puun Kinotongi'an”.

Binorokatan si Yakub nu Kinoringan so Bitil

⁹ Nokouli' po si Yakub kiat so Misuputamia, mintolango po Kinoringan so iyo mongoborakat.

¹⁰ Mutongaro yo Kinoringan so iyo nu, “Okon-o ko si Yakub po ngaran mu, nga si Israil-o sono,” koo. Soko iri yo pinongingoranan nu Kinoringan so iyo nu si Israil.

¹¹ Mutongaro po Iyo nu, “Aku yo su Kinoringan Maayo Kuasa. Rumayat ko yo nu osuang mongkupu. Ikau-o su posokag nu ongo bansa om osiliw ko nu aki nu ongo raja.

¹² Iri tana' nokotaak Ku so si Abraham om si Isak, itaak Ku ya so ikau om solusuk mu,” koo.

¹³ Noopod iri, ogoli yo nu Kinoringan si Yakub.

¹⁴ Nopopasok sono iyo nu watu pongoondoman so tontong inintolangan nu Kinoringan so iyo ri, om tuntugi yo nu anggur om inosak nu niusaa' so Kinoringan.

¹⁵ Ingorani yo niyo tontong iiri nu Bitil.

Kinopotoyan ni Rahil

¹⁶ Murongkato yo si Yakub om lobuw niyo ri kiat so Bitil. Orawu' po nosiro kiat so Iprata, mokipupuanak-o sono si Rahil, nga orogon sobana puonakon niyo oono.

¹⁷ Uyud-uyud lumangus, mutongaro yo bidan-i so si Rahil nu, “Oo Rahil, pototogo ya inawo mu no. Kusoi po anak mu tu,” koo.

¹⁸ Nga sabat po munsibuk inawo ni Rahil, om uyud-uyud niyo mongimbukat-i, ingorani yo niyo lolaing iri nu si Bin-Uni, nga iningoranan ni Yakub so si Binyamin.

¹⁹ Minatoi-o po si Rahil, lobongi yo iyo so isan nu lalan sundur so Iprata, ono yo Baitlahim nu ono sono tu.

²⁰ Pinosokan ni Yakub nu watu pongoondoman lobong ni Rahil oono om kakal-a kitanda' nu watu oono nu ono sono tu.

²¹ Noopod iri lumombuso yo si Yakub, om momaalo yo nu bosalag so ido tontong, nokotalib-talib so waloi opangkat nu Idir.

²² Laid nosiro molak dii, inondot sono ni Rubin si Bilha, iri pinokosawo nu amo niyo ri. Noilaan-o po iri ni Yakub, sobana ko minungot iyo.

Inonakan ni Yakub

²³ Kianak si Yakub opulu om duo kusoi. Inonakan ni Lia si Rubin (anak ongko ni Yakub), si Simiun, Liwi, Yahuda, Isakar om si Jibulun.

²⁴ Inonakan ni Rahil, si Yusup om si Binyamin.

²⁵ Inonakan ni Bilha, uripon ni Rahil, ono yo si Dan om si Naptali.

²⁶ Inonakan ni Jilpa, uripon ni Lia, si Gad om si Asir. Nopuanak kiawi' oono so Misuputamia.

Kinopotoyan ni Isak

²⁷ Nokologa' yo sono si Yakub dii so amo niyo si Isak so Mamri, ono yo Ibrun, pinolakan gulu ri ni Abraham om ni Isak.

²⁸ Umur ni Isak maatus walu nopulu toun,

²⁹ om minatoi-o sono iyo, om lobongi yo ni Isau om ni Yakub.