Pinongurugan 34 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Pinonowaan so si Dina

¹ Ido runat, ginumosayun si Dina, anak woinoi ni Yakub om ni Lia so kowoinoyan nu Kanaan.

² Nosiou-o po iyo ni Sikim, anak ni Imur, lobuw nu Iwi, raja so wonuo oono, tongawi yo sono iyo ni Sikim om sondomino yo.

³ Nga pagka sobana ko oingin iyo so si Dina, tongaro yo sono niyo si Dina nu poinginon so iyo.

⁴ Mutongaro yo iyo so amo niyo ri nu, “Mindamo aku so ikau nu ontunon ku roraa oono,” koo.

⁵ Norongowan sono ni Yakub nu nosonsawo yo anak roraa niyo ri, nga pagka dai po nokouli' inonakan niyo kusoi-i, dai iyo kopomaal nu onu-onu ya.

⁶ Miano yo sono si Imur, amo ni Sikim, dii si Yakub mokimuupakat,

⁷ om iya iiri nokouli' yo inonakan kusoi ni Yakub. Norongou-o po nosiro iri, nokotigog nosiro om sobana ko minungot so' ginama' ni Sikim iiri kopongusiba' nu lobuw Israil.

⁸ Mutongaro yo si Imur so si Yakub nu, “Sobana ko moingin si Sikim nu anak mu no. Indadi, mindamo aku so ikau nu popuontunon nosiro.

⁹ Mutaayun kito yo nu bansa ku om bansa mu kowasa ya muontun.

¹⁰ Kowasa ko tumotog molak so tontong mai tu, siombo-ombo ya koinginan mu, om kopogbaya' ko ya mudagang om kaalap nu orata',” koo.

¹¹ Mutongaro yo si Sikim so amo om kosusulodan ni Dina nu, “Tumbaido muyu yo indomoon ku no, taakan ku ya kou nu onu ya koinginan muyu.

¹² Tongaro muyu ya onu pokitaakon muyu om tontuon-o ong komuro buru'. Nitaak ku ya kiawi' onu yo po indomoon muyu ong lila'an muyu aku mongontun nu roraa oono,” koo.

¹³ Pagka nosonsawo yo ni Sikim adi' nosiro si Dina, okali yo sono nosiro si Imur om si Sikim nu,

¹⁴ “Oiyu'an kai poontun nu adi' mai no so lobuw dai nosunatan.

¹⁵ Tumaayun kai ya nu indomoon muyu no nga subai ourug kou soko kai nu kiawi' kusoi sunatan.

¹⁶ Osunatan kou yo, om tumaayun kai nai' nu kowasa toko ya muoontun-ontun. Mido kai molak so kou om ourug nu ido-ido bansa.

¹⁷ Nga bang dai kou ya tumaayun nu sunatan, olapon mai ya roraa oono om mulaiw kai,” koo.

¹⁸ Nopikir ni Imur om ni Sikim nu otoop-a totongaron oono,

¹⁹ mogtuui tinumaayun si Sikim so' sobana ko moingin iyo so si Dina. So kiawi' suku-sakat niyo, si Sikim-o su sobana ko obantug.

²⁰ Miano yo si Imur om si Sikim so poomusombatan so longobon nu bandar-i, mokimuupakat so lobuw nu bandar iiri nu,

²¹ “Lobuw-o po nu Israil oono kouna'an toko. Indadi posimaidan-a nosiro tumotog molak tuui om mompanou so siombo-ombo ya koinginan nosiro. Orumposan-a nosiro molak tontong toko tu. Kowasa toko ya muoontun so nosiro.

²² Moingin-a nosiro tumotog molak tuui om ourug nu ido-ido bansa, ong tumaayun toko nu kiawi' kusoi so toko sunatan soko nosiro.

²³ Bang waalon toko ono, osongapan toko sono kiawi' pongayam om orata' nosiro no. Indadi tumaayun toko yo nu indomoon nosiro no, su' kototog nosiro mido so toko molak tuui,” koo.

²⁴ Indadi, tinumaayun-o sono kiawi' lobuw so bandar iiri nu totongaron ni Imur om ni Sikim, om sunati yo sono kiawi' kusoi nosukod-i yo.

²⁵ Kotoluan kiat nu pinusunatan-i, laid nu osokitan po kiawi' kusoi-i, mongolapo yo sono nu karis duo anak ni Yakub, ongko ni Dina, ono yo si Simiun om si Liwi, om sumolinoko yo mian so bandar, om potoyo yo nosiro kiawi' kusoi,

²⁶ maid so si Imur om si Sikim. Owito yo nosiro si Dina mulaiw kiat so waloi ni Sikim.

²⁷ Noopod iri, miano yo inonakan ni Yakub wokon-i monolod nu gonggamon, ponunsuli' nu nosonsawo yo adi' nosiro ri.

²⁸ Inalap nosiro baanan nu kambing dumba, sapi, koladai, om onu yo po so bandar iiri om so umo.

²⁹ Sinolod nosiro kiawi' gonggamon boorogo om tinongawan kiawi' woinoi maid nu inonakan om asuw nu ongo waloi nosiro.

³⁰ Mutongaro yo sono si Yakub so inonakan niyo ri nu, “Sobana ko mongaagut kou so aku. Kosiono kiawi' lobuw nu Kanaan om Piris rumoraayan sono so aku. Lobuw toko no owako ya. Bang mugapi' nosiro mongolawan so toko, oluwus toko matoi,” koo.

³¹ Sumombuto yo nosiro nu, “Musuat-a winaal mai oono so' dai otoop olapon adi' mai no nu soko sundal,” koo.