Pinongurugan 27 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Binorokatan ni Isak si Yakub nu soko anak ongko

¹ Ido runat, pagka otuo yo bana si Isak om dai yo kowawai, paawo yo niyo anak ongko niyo si Isau, om tongaro yo nu, “Oo anak ku!” koo. “Onu nu iri, apa,” koo si Isau.

² Mutongaro yo si Isak nu, “Oilaan mu yo nu otuo aku yo itu om dai yo su olaid matoi.

³ Indadi, olapo yo pana mu ri, om pupori po so gowuton.

⁴ Onsako sono so aku nu soko koototoman ku ri, om owito tuui. Oopod aku mongokan, borokatan ku nai' ikau nu dai po su matoi-o,” koo.

⁵ Norongou-a ni Ribka tinangar ni Isak so si Isau iiri. Indadi nokopanou-panou-a si Isau mupori,

⁶ tongaro yo sono ni Ribka si Yakub nu, “Koopod-a ni apa mu mutangar so si Isau nu,

⁷ ‘Pupori po om onsako sono so aku nu owarong. Kookan aku yo om borokatan ku nai' ikau nu dai po su matoi-o,’ koo.

⁸ Indadi rongowo yo, om waalo yo onu yo po nisuu' ku tu.

⁹ Ian-o so baanan nu kambing toko ri, om pomili' yo duo uyog nu dumba olomu. Onsakon ku ya nu soko koototoman ni apa mu.

¹⁰ Oopod ono, owito sono dii so iyo, su' oopod-o po iyo mongokan, borokatan ko yo nu dai po iyo matoi-o,” koo.

¹¹ Nga mutongaro yo si Yakub so ino niyo ri nu, “Kibulu boto ong si Isau, om aku maalus kulit.

¹² Bang kuyutan kulit ku no ni apa, oilaan sono niyo nu mongaakal aku ya, om okon-a sono ko' borokatan aku nga sumpaan aku nai' niyo,” koo.

¹³ Sumombuto yo ino niyo ri nu, “Ikod-a kigagau bo anak. Waalo ya nisuu' ku tu. Monumpa pona iyo, aku ya su osuat. Panou-o mongalap nu kambing-i,” koo.

¹⁴ Momponowo yo sono si Yakub mongalap nu kambing-i, om owito yo so ino niyo ri, om onsako yo ni Ribka, soko koototoman ni Isak.

¹⁵ Olapo yo ni Ribka pokakas ni Isau oparu', nokotou' so bosalag-i, om posobungi yo so si Yakub.

¹⁶ Kinopitan-a niyo longon om liou ni Yakub nu kulit nu kambing.

¹⁷ Taaki yo niyo so si Yakub inapui niyo owarong iiri om baang-baang winaal niyo ri.

¹⁸ Soko iri po, miano yo si Yakub dii si Isak om mutongaro yo nu, “Oo, apa,” koo. “Oo, isai ko ka si Isau ko' si Yakub?” koo si Isak.

¹⁹ Sumombuto yo si Yakub nu, “Aku yo si Isau, anak ongko mu ri. Nowaal ku yo nisuu' mu ri. Ogom-o om okano yo inimporian ku tu, su' oborokatan mu aku,” koo.

²⁰ Mutongaro yo si Isak nu, “Osikap ko ya bo kaalap,” koo. Sumombuto yo si Yakub nu, “Tinabang aku nu TUHAN Kinoringan usaa'on mu no,” koo.

²¹ Mutongaro yo si Isak so si Yakub nu, “Obi' yo tuui so aku, su' okuyutan ku ikau nu bana ka nu si Isau ko,” koo.

²² Mobio yo sono si Yakub, om koromi yo ni apa niyo, om mutongaro yo nu, “Bongut mu no soko si Yakub, nga longon mu tu soko longon ni Isau,” koo.

²³ Dai notondu'an ni Isak si Yakub so' longon-i kibulu soko longon ni Isau, nga uyud-uyud niyo mongoborakat so si Yakub,

²⁴ mongoduato po iyo nu, “Bana ya ka nu si Isau ko?” koo. “Bana ya bo, apa,” koo si Yakub.

²⁵ Mutongaro yo sono si Isak nu, “Taaki yo so aku onsi inonsak mu no. Oopod aku mongokan, borokatan ku nai' ikau,” koo. Taaki yo ni Yakub onsi inonsak iiri maid nu sungoi nu anggur om monginumo yo si Isak.

²⁶ Mutongaro yo si Isak nu, “Oo anak, obi' yo sobana om singudi aku yo,” koo.

²⁷ Nokoobi' yo po si Yakub, nosingud sono ni Isak nu soko awau-a bana ni Isau, om borokati yo niyo si Yakub nu, “Oo anak ku, olanung ko sobana, soko koolanung nu umo binorokatan-o nu Kinoringan.

²⁸ Muda-mudaan ong taakan ko nu Kinoringan nu ambun kiat so langit, om umo mu nga ookang. Muda-mudaan ong taakan ko Niyo nu paroi om anggur nu osuang sobana.

²⁹ Muda-mudaan ong ouripon mu ongo bansa wokon, om orumaton ko nosiro. Muda-mudaan ong osiliw ko nu wowaidon nu kosusulodan mu, om orumaton ko nu solusuk mu. Muda-mudaan ong sindoraayon-a lobuw mongindoraai so ikau om oborokatan lobuw mongoborakat so ikau,” koo.

Minokiborakat si Isau so si Isak

³⁰ Noopod-a si Isak mongoborakat so si Yakub, om nokopanou si Yakub, nokouli' yo sono si Isau, ongko niyo ri kiat so pinuporian.

³¹ Iyo nga minongonsak-o sono nu ipookan so si apa niyo soko koototoman niyo ri. Noonsak-o po, owito yo niyo dii si apa niyo om mutongaro yo nu, “Ogom-o apa, om okano yo inimporian ku tu, su' oborokatan mu aku,” koo.

³² “Isai ko ka?” koo si Isak. Sumombuto yo si Isau nu, “Aku yo si Isau, anak ongko mu ri,” koo.

³³ Nokokikip sono si Isak maid nu mongoduat nu, “Bang soko ono, isai minupori om minongowit tuui so aku sisuna ri? Inokan ku yo sono iri nu dai ko po nokologa' ri, binorokatan ku iyo om borakat iiri songapan-o niyo musingkolaid,” koo.

³⁴ Norongou-o po iri ni Isau, moginoontobo yo iyo tumangi' so' olunggui sobana iyo om mutongaro yo nu, “Aku nga borokati ya, apa!” koo.

³⁵ “Linumoga' si adi' mu tuui mongaakal so aku. Inalap niyo borakat niborakat ku sobana yo so ikau-i,” koo si Isak.

³⁶ Mutongaro yo si Isau nu, “Koinduo yo sono niyo mongaakal so aku. Otoop-a nu ingoranan iyo so si Yakub so' inalap po niyo songapan ku nu anak ongko, om sinolod po niyo niborakat so aku iiri. D'ado yo gaam borakat mu wokon niborakat mu so aku!” koo.

³⁷ Sumombuto yo si Isak nu, “Siniliw ku yo iyo nu wowaidon mu, om kosusulodan niyo siniliw ku yo nu uripon niyo. Tinaakan ku ya iyo nu borakat suat so paroi om anggur. Indadi ado yo oilaan ku wokon niborakat so ikau,” koo.

³⁸ Sumosog-a bana si Isau mokiborakat so si apa niyo nu, “Ido-ido ya gaam borakat mu apa. Borokati aku yo, apa!” koo, om tumongio yo iyo.

³⁹ Mutongaro yo si Isak nu, “Oo anak ku, d'ado yo ambun kiat so langit suat so ikau, om ado yo umo ookang suat so ikau.

⁴⁰ Dadan ko lumawan nu alod-alod mu, nga dai ko ya potoyon, om ouripon ko ni adi' mu, nga bang lumawan ko, dai ko ya ouripon niyo,” koo.

⁴¹ Bisigon sono ni Isau si Yakub so' nitaak-o ni Isak borakat niyo so si adi' niyo. Momikir sono iyo nu, “Dai yo olaid matoi si apa. Nga koduung olibuas mongulid, potoyon ku ya si Yakub,” koo.

Sinuu' si Yakub mian dii si Laban

⁴² Norongou-o po ni Ribka padu-padu ni Isau oono, minonuu' sono iyo poponogina so si Yakub om mutongaro yo nu, “Ingati yo, mokisusuli' si aka' mu so ikau padu momatoi.

⁴³ Waalo yo ponuu'an ku so ikau tu. Ogou-o mian so ongko ku si Laban dii so Aram.

⁴⁴ Polak-o dii so iyo komuro-komuro ya laid, musingkoingkoyod nu koo'ungot ni Isau so ikau-o,

⁴⁵ om olupaan-a niyo kiawi' winaal mu iiri. Oopod ono, monuu' aku ya nu lobuw popongalap so ikau muli', so' dai su kosoromo ong kopuiya kou yo matoi,” koo.

⁴⁶ Indadi minutangar-a si Ribka so si Isak nu, “Notopodan aku yo mido-ido so kososowaan ni Isau bansa Iit oono. Bang koontun-a pudi si Yakub nu roraa bansa oono, owarong po matoi aku,” koo.