Lagu 97 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Kinoringan-o su mogkuasa nu kiawi'-awi'

¹ TUHAN-o su raja! Oo su lobuw, sumudu'an-o! Oo su lobuw so kopuruan dirawu', osonangan kou yo!

² Nosolui Iyo nu kawut om kotuongan. Kobonaan om koolukan su impuunon nu pogkuosaan Niyo.

³ Mompanou Iyo maid nu apui so pinoguluon Niyo, mongoompu' nu alod-alod so pililiwut Niyo no.

⁴ Kudilop Niyo no mongonawau nu wonuo tu. Kumikip lumaa' lobuw tu ong kosiou nu tinarang Niyo no.

⁵ Rumanas kobubuludan-o so tiningkuangon Niyo, soko lansuk rumanas ong susulan.

⁶ Nai yo so langit-o su kosiowan nu koo'oluk Niyo, om kiawi' bansa nga kosiou nu koobantug Niyo no.

⁷ Kiawi' moongusaa' nu tinindobuw nga oiyu'-iyu'an. Kiawi' pinokokinoringan nga kosurukud so tiningkuangon nu TUHAN.

⁸ Oo TUHAN, lobuw minolak so Siun nga sumudu'an sono, om kiawi' lobuw minolak so bandar Yahuda nga ososonangan nu kotontuan Mu no.

⁹ Oo TUHAN, Ikau-o su mogkuasa so pilolongkop nu wonuo tu. Kikuasa Ko po ko' kiawi' pinokokinoringan.

¹⁰ Lobuw mongobisig nu koraayan, kosomodan nu TUHAN. Ingoligan Niyo kowiawan nu lobuw songapan Niyo, om sopulan Niyo nosiro kiat so pogkuosaan nu lobuw oraai.

¹¹ Koowarong nu Kinoringan tumogu' soko onawau so lobuw otulid inowoon, om posudu' nu lobuw momaal nu owarong.

¹² Oo su kiawi' lobuw otulid inowoon, sumudu'an kou yo nu onu yo po winaal nu TUHAN. Ondomo muyu yo gogoma'on nu Kinoringan ongo wowarong, om munsopot-o so Iyo.