Lagu 86 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Du'a mokiponobangon

Du'a ni Daud.

¹ Oo TUHAN, rongowo aku yo, om sambut-o s'aku, so' aku yo po omiskin om okugui.

² Kodi aku yo posimaidi matoi, so' ototog aku ya so Ikau. Sopulo aku yo, so' uripon Mu ya aku om umarap-a so Ikau.

³ Pagka Ikau-o Kinoringan ku, luluudi aku yo. Soro sondunat aku mogdu'a so Ikau.

⁴ Oo TUHAN, posuduo yo inawo nu uripon Mu tu, so' mogdu'a aku so Ikau.

⁵ Ikau-o su owarong om moongampun, om sobana ko somodan Mu lobuw ototog mogdu'a so Ikau.

⁶ Oo TUHAN, rongowo yo du'a ku mokiponobangon so Ikau.

⁷ Iya nu kikoogutan aku, mogdu'a aku so Ikau, so' sumambut Ko ya s'aku.

⁸ Oo TUHAN, d'ado wokon kinoringan koinong so Ikau. D'ado ido ya kopomaal nu onu yo po waalon Mu.

⁹ Kiawi' bansa inurug Mu om lumoga' nosiro sumurukud so tiningkuangon Mu mongusaa'. Mongorayou nosiro nu koo'ayo Mu.

¹⁰ Obasag Ko sobana om owarong sobana pinuwaal Mu. Ido-ido Ko ya su Kinoringan.

¹¹ Tuduki aku yo nu koinginan Mu, su' ototog aku mongowaid nu ono. Tuduki aku yo mugogoma'on so Ikau nu otoroido inawo.

¹² Oo TUHAN Kinoringan ku, otoroido inawo ku no mongorayou so Ikau. Moingin aku paabar nu koo'ayo Mu musingkolaid.

¹³ Otatap Ko ya monamod s'aku nu poonamod maayo Mu no. Sinopulan Mu aku, iya nu moipopatoi aku yo.

¹⁴ Oo Kinoringan, mukakas lobuw musingkaaku-aku lumawan s'aku. Somposukan-a lobuw orampus sundur momatoi so aku. Dai nosiro momadul so Ikau.

¹⁵ Nga Ikau-o TUHAN Kinoringan su moonamod om moongoluluud. Dai Ko otumpodus, owarong gogoma'on Mu om ototog Ko.

¹⁶ Ondomo om luluudi aku yo. Pobosago om sopulo aku yo, so' aku nga uripon Mu ya soko si ino ku nu gulu ri.

¹⁷ Oo TUHAN, taaki aku yo nu ponondu'an nu koworongan Mu, su' oiyu'an sono lobuw obisig s'aku no, ong kosiou so Ikau monabang om monginsosamod s'aku.