Lagu 25 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Du'a mokibiat om mokiingolig

Lagu ni Daud.

¹ Oo TUHAN, mogdu'a aku so Ikau.

² Oo Kinoringan ku, Ikau-o su usaa'on ku! Kodi aku yo posimaidi oiyu'-iyu' nu odoog. Kodi yo posimaidi alod-alod ku no muayak s'aku.

³ Dai insan odoog ong lobuw poimaid so Ikau, nga ono yo su odoog lobuw osikap lumawan so Ikau-o.

⁴ Oo TUHAN, tuduki aku yo nu gama' miau mongowaid nu koinginan Mu. Pokoiloo yo onu opatut waalon ku.

⁵ Tuduki om biati aku yo nu gama' miau mongowaid nu koinginan Mu, so' Ikau-o su Kinoringan monapul s'aku. Dadan aku umarap so Ikau.

⁶ Oo TUHAN, ondomo yo koowarong om koosamod Mu, iri niintolang Mu kiat nu gulu ri.

⁷ Lupai yo kiawi' koraayan om kosola'an ku nu omulok aku ri po. Oo TUHAN, pagka owarong Ko sobana om dadan Ko monamod nu lobuw, ondomo aku yo.

⁸ Pagka ooluk TUHAN om owarong Iyo, potolunda'on Niyo so lalan obana nu lobuw nopalid-i.

⁹ Tundanon Niyo lobuw obaba' inawo maid so lalan obana, om montuduk so nosiro nu koinginan Niyo.

¹⁰ Iri lobuw mongimaid nu janji om ponuu'an Niyo, somodan om totogan Niyo monundan.

¹¹ Oo TUHAN, tumano yo janji Mu, iduo yo koraayan ku nu sobana ko osuang.

¹² Lobuw obinsuut so TUHAN, tundanon Niyo so lalan otoop waidon nosiro.

¹³ Miau nosiro osanang musingkolaid, om komongkupuan nosiro kosongapan nu tana' pusaka.

¹⁴ TUHAN-o su una'-una' nu lobuw obinsuut so Iyo, om pointolang nu janji Niyo so nosiro.

¹⁵ Dadan aku umarap nu tobangon aku nu TUHAN, om sopulan aku Niyo kiat so kosonsora'an.

¹⁶ Oo TUHAN, kowii-o om luluudi aku yo, so' ado una' ku om nosonsara' aku yo itu.

¹⁷ Iduo yo kogogawan ku, om sopuli aku yo kiat so koogutan ku.

¹⁸ Podulio yo koogutan om kosonsora'an ku, om lupai yo kiawi' koraayan ku.

¹⁹ Siowi yo komuro kosuang nu alod-alod ku, om bisigon aku nosiro.

²⁰ Pagka mokiingolig aku ya so Ikau, ipati om sopulo aku yo, su' dai aku oiyu'an nu odoog nu alod-alod ku.

²¹ Muda-mudaan ong otatap aku d'ado sala' om obana aku ya, so' poimaid aku ya so Ikau.

²² Oo Kinoringan, polobuso kai yo lobuw songapan Mu, ono yo Israil, kiat so koogutan mai.