Lagu 143 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Du'a mokiponobangon

Lagu ni Daud.

¹ Oo TUHAN, rongowo yo du'a ku tu! Pagka obana ya gama' Mu, rongowo yo du'a ku tu. Pagka ototog Ko, sambut-o s'aku.

² Aku yo po uripon Mu, kodi aku yo bisoraa, so' insan ong ido d'ado kosola'an so tiningkuangon Mu.

³ Tinarak aku nu alod-alod ku, dinoog aku nosiro, om niada' aku so kotuongan. Aku soko bana lobuw olaid-o minatoi.

⁴ D'ado yo orapan ku. Nopoyaan aku.

⁵ Ondomon ku runat nokotalib-i. Pikiron ku kiawi' gogoma'on Mu. Kiro-kiroon ku kiawi' piningwaalan Mu.

⁶ Nikaang ku longon ku tu mogdu'a so Ikau. Moingin aku sobana so Ikau, soko tana' otuuw moingin nu uran.

⁷ Oo TUHAN, sambut-o s'aku osikap, so' d'ado yo orapan ku. Ikod-o kisusut so aku su' dai aku koinsuw nu lobuw nokoian so wonuo nu kopotoyan.

⁸ Poondom-o aku yo anid susuab nu osamod Ko s'aku, so' Ikau-o su orapan ku. Tuduki aku yo nu lalan otoop waidan ku, so' Ikau-o su indomaan ku.

⁹ Oo TUHAN, mokiingolig aku so Ikau. Polaiwo aku yo kiat so alod-alod ku.

¹⁰ Tuduki aku yo momaal nu koinginan Mu, so' Ikau-o su Kinoringan ku. Ikau-o su owarong inowoon om monundan so aku so lalan d'ado poomatoi.

¹¹ Sopulo aku yo musuat nu janji Mu ri. Pagka owarong Ko, polobuso aku yo kiat so koogutan.

¹² Pagka osamod Ko, doogo yo kiawi' alod-alod ku no. Raago yo kiawi' moongorodsit so aku no, so' aku yo po uripon Mu.