Lagu 136 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Lagu pongunsopotan

¹ Mongunsopot-o so TUHAN, so' owarong ong Iyo. D'ado pupus Niyo monamod.

² Sobana ko maayo ong Kinoringan, nga dai maayo ong ongo pinokokinoringan. Indadi mongunsopot-o so Kinoringan. D'ado pupus Niyo monamod.

³ Mongunsopot-o so TUHAN, iri wowaidon kaalib po ko' kiawi' wowaidon. D'ado pupus Niyo monamod.

⁴ Ido-ido Iyo su kopomaal nu koiran-iran. D'ado pupus Niyo monamod.

⁵ Winaal Niyo su langit nu koo'ilo Niyo. D'ado pupus Niyo monamod.

⁶ Inurug Niyo wonuo tu so dilanggau nu sungoi. D'ado pupus Niyo monamod.

⁷ Inurug Niyo su poongonawau so langit. D'ado pupus Niyo monamod.

⁸ Inurug Niyo runat mongonawau umpak nu runat. D'ado pupus Niyo monamod.

⁹ Inurug Niyo wulan om korombituon mongonawau umpak nu awi. D'ado pupus Niyo monamod.

¹⁰ Pinatoi Niyo anak ongko nu lobuw Masir. D'ado pupus Niyo monamod.

¹¹ Pinolabus Niyo lobuw Israil kiat so Masir. D'ado pupus Niyo monamod.

¹² Winaal Niyo ono nu longon Niyo obasag. D'ado pupus Niyo monamod.

¹³ Piniduo Niyo su Raat Omiang. D'ado pupus Niyo monamod.

¹⁴ Tinundan Niyo muripau lobuw Israil. D'ado pupus Niyo monamod.

¹⁵ Nga raja om soujar nu Masir linosod Niyo. D'ado pupus Niyo monamod.

¹⁶ Tinundan Niyo lobuw songapan Niyo lumalan so padang pantai. D'ado pupus Niyo monamod.

¹⁷ Dinoog Niyo raja ongo bobasag. D'ado pupus Niyo monamod.

¹⁸ Pinatoi Niyo raja ongo bobantug. D'ado pupus Niyo monamod.

¹⁹ Pinatoi Niyo si Sihun, iri raja nu lobuw Amuri. D'ado pupus Niyo monamod.

²⁰ Om pinatoi Niyo si Uug, raja nu Basan. D'ado pupus Niyo monamod.

²¹ Tana' nosiro ri nitaak Niyo so lobuw songapan Niyo ri. D'ado pupus Niyo monamod.

²² Nitaak Niyo tana' oono so lobuw Israil, ono yo uripon Niyo. D'ado pupus Niyo monamod.

²³ Dai toko linupaan Niyo iya nu nodoog toko. D'ado pupus Niyo monamod.

²⁴ Pinolabus toko Niyo kiat so alod-alod. D'ado pupus Niyo monamod.

²⁵ Kiawi' miau nga tinaakan Niyo nu ingkookan. D'ado pupus Niyo monamod.

²⁶ Mongunsopot-o so Kinoringan nu minongurug nu langit. D'ado pupus Niyo monamod.