Lagu 119 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Ukum nu TUHAN

¹ Osanang-o lobuw miau d'ado kosola'an, om mongimaid nu ukum nu TUHAN.

² Osanang-o lobuw momaal nu niongosuu' Niyo, om otoroido inawo poimaid so Iyo.

³ Osanang-o lobuw miau mongowaid nu koinginan nu TUHAN, om dai momaal nu koraayan.

⁴ Oo TUHAN, tinaakan Mu kai nu ukum Mu, su' waidon mai nu ototog.

⁵ Muda-mudaan ong mongowaid aku ya sobana nu kiawi' ponuu'an Mu.

⁶ Bang ototog aku mongowaid nu ponuu'an Mu, dai Mu ya aku poiyu'-iyu'an.

⁷ Bang moguru' aku nu oturan Mu obana no, otoroido inawo ku mongorayou so Ikau.

⁸ Mongowaid aku nu ukum Mu. Kodi aku yo laiwi.

Osanang-o lobuw mongowaid nu ukum nu TUHAN

⁹ Bang mongowaid lobuw omulok po nu ponuu'an Mu, d'ado koraayan so kowiawan niyo.

¹⁰ Mugogoma'on aku suat so Ikau nu otoroido inawo. Kodi aku yo posimaidi kolisang kiat so ponuu'an Mu.

¹¹ Nikorod ku pontudukan Mu so inawo ku, su' d'aku kopomaal nu koraayan so Ikau.

¹² Oo TUHAN, mongorayou aku so Ikau. Tuduki aku yo nu kotontuan Mu.

¹³ Ituturan ku so lobuw kiawi' ukum Mu no.

¹⁴ Osudu'an aku mongowaid nu ponuu'an Mu, kaalib po ko' koosudu' ong kosongapan nu boroginis nu orata'.

¹⁵ Moguru' aku nu oturan Mu, om orotion ku nu ponuu'an Mu.

¹⁶ Ukum Mu no koinsanang so aku, om ponuu'an Mu no dai ku ya lupaan.

Ukum nu TUHAN kosanang nu inawo

¹⁷ Muda-mudaan ong osanang-a inawo Mu s'aku, uripon Mu tu, su' miau aku om mongowaid nu pontudukan Mu.

¹⁸ Poorotio aku yo su' koorati aku sobana nu kobonaan nokosurat so ukum Mu no.

¹⁹ Sontagal aku ya itu miau so wonuo tu. Kodi yo susuti ukum Mu kiat s'aku.

²⁰ Umurad inawo ku no nu koo'impong. Moki'iilo aku dadan nu kotontuan Mu.

²¹ Toyowon Mu lobuw musingkaayo-ayo, om owagan Mu lobuw dai mongowaid nu ponuu'an Mu.

²² Polaiwo aku yo kiat so pongindoraayan om pongorogaman nosiro, so' maid aku ya nu oturan Mu.

²³ Muupakat pona moomogkuasa mongolawan s'aku, dai ya su mingkoyod moguru' nu pontudukan Mu.

²⁴ Ponuu'an Mu poinsanang nu inawo ku, om mongobiat s'aku.

Kokoogan mongowaid nu ukum nu TUHAN

²⁵ Mili-gili aku moipopatoi. Powiawo aku yo musuat nu janji Mu ri.

²⁶ Mongakun aku nu kiawi' gogoma'on ku, om sinumambut Ko ya s'aku. Tuduki aku yo nu oturan Mu.

²⁷ Tobango aku yo mongoorati nu ukum Mu. Dadan aku mongiro-kiro nu pontudukan Mu ongo wowarong-o.

²⁸ Sobana ko olunggui aku. Pobosago aku yo musuat nu janji Mu ri.

²⁹ Kodi aku yo posimaidi lumisang so lalan kopolidan. Tuduki aku yo nu ukum Mu musuat nu koowarong Mu.

³⁰ Notapus ku yo nu poimaid so Ikau. Ondomon ku dadan kotontuan Mu.

³¹ Oo TUHAN, nowaid ku yo ponuu'an Mu. Kodi aku yo posimaidi oiyu'-iyu'an.

³² Osanang sobana inawo ku no mongowaid nu ponuu'an Mu, so' Ikau-o su nopoorati sobana s'aku.

Du'a mokitaak nu pongoorotian

³³ Oo TUHAN, tuduki aku yo nu ukum Mu, su' owaid ku ono musingkolaid.

³⁴ Poorotio aku yo nu Ukum Mu, su' owaid ku ono. Waalon ku ono nu otoroido inawo.

³⁵ Tundano aku yo mongowaid nu ponuu'an Mu, so' ono yo su koinsanang nu inawo ku.

³⁶ Pokoogo yo inawo ku no mimaid nu oturan Mu, labi po ko' kookoog ku dumoyaan.

³⁷ Ipati aku yo su' dai aku momaal nu d'ado kosudaan. Osanang-a inawo Mu s'aku musuat so janji Mu.

³⁸ Potumano yo janji Mu s'aku, uripon Mu, iri janji Mu so lobuw poimaid so Ikau-i.

³⁹ Pagka owarong sobana kotontuan Mu, kodi aku yo posimaidi pubaagan, so' ono yo su kololaa'an ku.

⁴⁰ Moingin aku sobana mongowaid nu ponuu'an Mu. Taaki aku yo nu kowiawan wagu, so' Ikau-o su ooluk.

Umarap nu ukum nu TUHAN

⁴¹ Oo TUHAN, pointolango yo koosamod Mu s'aku, om sopulo aku yo musuat nu janji Mu ri.

⁴² Kosambut aku sono nu lobuw mongoragam s'aku, so' mongaarap aku nu tinongaran Mu.

⁴³ Tobango aku yo su' dadan aku mutangar nu obana, so' oilaan ku nu owarong sobana gama' Mu monantu.

⁴⁴ Mongowaid aku nu ukum Mu musingkolaid.

⁴⁵ Dai sono okomon aku nu alod-alod ku, so' mongimaid aku ya nu pontudukan Mu.

⁴⁶ Ituturan ku ponuu'an Mu so ongo raja, om dai aku sono oiyu'-iyu'an.

⁴⁷ Oinsonangan aku mongimaid nu ponuu'an Mu, so' okoog aku nu ono.

⁴⁸ Orumaton om kokoogan ku ponuu'an Mu, om kiro-kiroon ku pontudukan Mu.

Umarap so ukum nu TUHAN

⁴⁹ Ondomo yo janji Mu so uripon Mu tu, iri janji monaak nu orapan s'aku ri.

⁵⁰ Oinsosomodan aku ya pudi osonsara', so' iri yo janji Mu nu monaak so aku nu kowiawan-i.

⁵¹ Sobana ko pubaagan aku nu lobuw musingkaayo-ayo, nga dai ya su sumompirang kiat so ukum Mu.

⁵² Oo TUHAN, koduung oondoman ku yo kotontuan Mu kiat nu gulu ri, oinsosomodan sono inawo ku no.

⁵³ Mungot aku sobana nu lobuw oraai, so' dai mongowaid nosiro nu ukum Mu.

⁵⁴ Laid nu miau aku po, waalon ku nu lagu ponuu'an Mu no.

⁵⁵ Oo TUHAN, umpak nu awi nga koondom aku so Ikau, om mongiro-kiro nu ukum Mu.

⁵⁶ Osanang aku ong waidon ku ponuu'an Mu no.

Okoog nu ukum nu TUHAN

⁵⁷ Oo TUHAN, ido-ido Ko ya su koinginan ku. Mujanji aku nu mongowaid nu pontudukan Mu.

⁵⁸ Maayo sobana inawo ku mokiluluud so Ikau. Luluudi aku yo musuat nu janji Mu ri.

⁵⁹ Notokod ku yo kogoyaan ku, om mujanji aku nu mongowaid nu ponuu'an Mu.

⁶⁰ Dai ya su musio-sio, nga sumikap aku mongowaid nu ponuu'an Mu.

⁶¹ Potaan lobuw oraai nu tawos suat s'aku, nga dai ya lupaan ku ukum Mu.

⁶² Rumios aku nu tonga' nu awi mongorayou so Ikau, so' ooluk sobana kotontuan Mu.

⁶³ Mokimuuna'-una' aku nu lobuw mugogoma'on suat so Ikau, om mongimaid nu ponuu'an Mu no.

⁶⁴ Oo TUHAN, ototog Ko monamod nu lobuw so pilolongkop nu wonuo tu. Tuduki aku yo nu ponuu'an Mu.

Sobana ko boorogo ukum nu TUHAN

⁶⁵ Oo TUHAN tinuman Mu yo janji Mu ri, om minomaal Ko nu owarong so uripon Mu tu.

⁶⁶ Tuduki aku yo nu koo'ilo monapus, so' umarap aku ya nu ponuu'an Mu.

⁶⁷ Dai aku po noinsaadan Mu, dai waidon ku pontudukan Mu, nga kosiono maid aku yo sono nu tinongaran Mu.

⁶⁸ Owarong Ko sobana om owarong sobana gogoma'on Mu. Tuduki aku yo nu ponuu'an Mu.

⁶⁹ Simbaalan aku nu lobuw musingkaayo-ayo, nga otoroido ya inawo ku mongowaid nu ponuu'an Mu.

⁷⁰ Lobuw oono dai koorati nu ukum Mu, nga suat so aku, ukum Mu no kosanang nu inawo.

⁷¹ Owarong sobana ponginsaadan Mu so aku so' kiat nu ono koorati aku sono nu ponuu'an Mu.

⁷² Ukum nitaak Mu no boorogo po ko' kiawi' omas om pirok so wonuo tu.

Kopuolukan nu ukum nu TUHAN

⁷³ Oo TUHAN, Ikau-o su minongurug om mongingolig s'aku. Taaki aku yo nu pongoorotian moguru' nu ukum Mu.

⁷⁴ Osanang iri lobuw mongorumat so Ikau koduung osiou aku, so' umarap aku nu janji Mu.

⁷⁵ Oo TUHAN, oilaan ku nu ooluk sobana kotontuan Mu, om pagka ototog Ko, insaadan Mu aku.

⁷⁶ Muda-mudaan ong oinsosomodan aku ya nu poonamod Mu, musuat nu janji Mu so uripon Mu tu.

⁷⁷ Luluudi aku yo su' miau aku, so' kosanang sobana nu inawo ku ukum Mu.

⁷⁸ Muda-mudaan ong oiyu'an lobuw musingkaayo-ayo, so' monimbaal nosiro suat so aku. Nga aku yo po mongoondom-a nu ponuu'an Mu.

⁷⁹ Muda-mudaan ong lumoga' ya tuui s'aku lobuw mongorumat so Ikau, iri kiawi' lobuw nokotondu' nu ponuu'an Mu ri.

⁸⁰ Muda-mudaan ong otatap aku ya mongimaid nu ponuu'an Mu, om dai insan osala' su' dai aku oiyu'-iyu'an.

Du'a mokisopulon

⁸¹ Oo TUHAN, orumbut aku sobana mongimat nu sopulan Mu aku. Mongaarap aku nu janji Mu.

⁸² Muruyop-ruyop-o mato ku no mongimat nu tumanon Mu janji Mu, laid ku mongoduat so Ikau nu, “Sombiya Ko ka monginsosamod s'aku?” k'aku.

⁸³ Soko d'ado kosudaan s'aku, nga dai ku ya lupaan ponuu'an Mu.

⁸⁴ Komuro po kolaid ku tumangka'? Sombiya insaadan Mu lobuw mononsara' s'aku no?

⁸⁵ Lobuw dai mongowaid nu ukum Mu no, minonguang pongoburunsut s'aku.

⁸⁶ Opongoorapan kiawi' ponuu'an Mu. Tobango aku yo so' monimbaal lobuw mononsara' s'aku no.

⁸⁷ Ogon po opatoi aku nosiro, nga dai aku ya lumisang kiat so ponuu'an Mu no.

⁸⁸ Pagka dadan Ko ya osamod, sopulo aku yo, su' kopongowaid aku sono nu ukum Mu.

Poimaid nu ukum nu TUHAN

⁸⁹ Oo TUHAN, otatap tinongaran Mu no musingkolaid so surga.

⁹⁰ Ototog Ko musingkolaid. Winangun Mu wonuo tu, om otatap sampai kosiono.

⁹¹ Onu yo po kuwai nu ono sono tu, nowaal kiat so ponuu'an Mu ri, so' kiawi' nga mongimaid nu ponuu'an Mu.

⁹² Bang dai kosudu' nu inawo ku no ukum Mu no, olaid aku yo minatoi nu kosonsora'an ku no.

⁹³ Dai su insan lumisang kiat so mongimaid nu ponuu'an Mu, so' ono yo su pinomiau Mu so aku.

⁹⁴ Sopulo aku yo so' aku yo po songapan Mu, om tumotos aku yo mongowaid nu ponuu'an Mu.

⁹⁵ Pokipopotoyan aku nu lobuw oraai, nga mongiro-kiro aku ya nu ukum Mu.

⁹⁶ Oilaan ku nu kuwai puontoban nu onu yo po, nga ponuu'an Mu d'ado puontoban.

Okoog nu ukum nu TUHAN

⁹⁷ Okoog aku sobana nu ukum Mu. Soro sondunat aku mongiro-kiro nu ono.

⁹⁸ Koondom aku dadan nu ponuu'an Mu, nu kourug so aku nu oilo po ko' alod-alod ku.

⁹⁹ Koorati aku po ko' moomontuduk so aku no, so' dadan aku mongiro-kiro nu ponuu'an Mu.

¹⁰⁰ Moilo aku po ko' kotutuaan, so' aku yo po mongowaid nu ponuu'an Mu.

¹⁰¹ Dai su sumimpor nu kogoyaan oraai, so' poimaid aku nu pontudukan Mu.

¹⁰² Dai ku ya lupaan ponuu'an Mu, so' Ikau-o su montuduk so aku.

¹⁰³ Oomis sobana tinongaran Mu. Oomis po ko' paa' nu munsong.

¹⁰⁴ Ukum Mu monaak s'aku nu pongoorotian. Indadi bisigon ku sono kiawi' kogoyaan oraai.

Ukum nu TUHAN konawau

¹⁰⁵ Tinongaran Mu no soko politaan monogu' nu akod ku, om mongonawau nu lalan ku.

¹⁰⁶ Mujanji aku maid nu ibot nu, mongowaid-a nu ponuu'an Mu osuat sobana no.

¹⁰⁷ Oo TUHAN, nosonsara' aku sobana. Ipati aku yo musuat nu janji Mu ri.

¹⁰⁸ Rongowo yo du'a pongunsopotan ku so Ikau. Tuduki aku yo nu ponuu'an Mu.

¹⁰⁹ Dadan aku pokomouli' nu kowiawan ku, om dai ya su mongolupo nu Ukum Mu.

¹¹⁰ Nopotaan lobuw oraai nu tawos suat so aku, nga dai ya su mulaiw kiat so ponuu'an Mu.

¹¹¹ Ponuu'an Mu no yo su pusaka ku musingkolaid, posanang nu inawo ku.

¹¹² Tinapus ku yo nu mongowaid nu ukum Mu musingkopatoi ku.

Oingoligan nu ukum nu TUHAN

¹¹³ Bisigon ku lobuw dai ototog sobana so Ikau, nga okoog aku sobana nu ukum Mu.

¹¹⁴ Ikau-o su moongipat om moongingolig so aku, umarap aku nu janji Mu.

¹¹⁵ Oo su lobuw oraai, rawu' kou yo so aku! Maid aku nu ponuu'an nu Kinoringan ku.

¹¹⁶ Oo TUHAN, pobosago aku yo musuat nu janji Mu, su' miau aku. Kodi aku yo posimaidi oiman-iman nu onu yo po orap-orapon ku.

¹¹⁷ Tobango aku yo su' osopulan aku, om dadan oinsonangan aku mongimaid nu ponuu'an Mu.

¹¹⁸ Tulakon Mu lobuw dai mimaid nu ukum Mu. D'ado kosudaan nu puupokatan nosiro mongaakal oono.

¹¹⁹ Soko poraput-a kosiowan Mu lobuw oraai, ono yo ko' okoog aku nu ponuu'an Mu.

¹²⁰ Kumikip aku lumaa' so Ikau, sobana ko lumaa' aku nu kotontuan Mu.

Mongimaid nu ukum nu TUHAN

¹²¹ Ooluk om owarong-a gogoma'on ku. Kodi aku yo potaako so alod-alod ku.

¹²² Pujanji yo nu monabang Ko ya so aku uripon Mu tu. Kodi yo posimaidi lobuw musingkaayo-ayo mongosok-osok so aku.

¹²³ Muruyop-ruyop-o mato ku no modium nu ponobangan Mu nu monapul so aku. Indadan ku ya janji Mu nu polabus Ko so aku.

¹²⁴ Poworongo yo gama' Mu s'aku musuat nu poonamod Mu dadan, om tuduki aku yo nu ponuu'an Mu.

¹²⁵ Aku yo po uripon Mu. Poorotio aku yo su' koorati aku nu pontudukan Mu.

¹²⁶ Oo TUHAN, nologa' yo uukokasan Mu, so' osuang lobuw dai mongowaid nu ukum Mu.

¹²⁷ Koinginan ku sobana ponuu'an Mu labi po ko' omas luun-luun.

¹²⁸ Ono yo ko' mongowaid aku nu kiawi' ponuu'an Mu. Bisigon ku kogoyaan sonsala' no.

Koinginan mongowaid nu ukum nu TUHAN

¹²⁹ Owarong sobana pontudukan Mu, ono yo ko' kokoogan ku mongowaid.

¹³⁰ Pontudukan Mu no konawau koduung nituturan, om monaak nu pongoorotian so lobuw d'ado po ooroti-rotian.

¹³¹ Sobana ko moingin aku nu ponuu'an Mu.

¹³² Kowiio aku yo om luluudi aku yo, soko kooluluud Mu nu lobuw monamod so Ikau.

¹³³ Otago yo tingkang ku musuat nu janji Mu. Kodi aku yo posimaidi okuasa nu koraayan.

¹³⁴ Polobuso aku yo kiat so lobuw mongusok-usok so aku, su' kopongowaid aku nu ponuu'an Mu.

¹³⁵ Muda-mudaan ong posonangon Mu ya aku, om tuduki aku yo nu ukum Mu.

¹³⁶ Mangi'-tangi' aku po, so' dai imaidon ukum Mu no.

Musuat sobana ukum nu TUHAN

¹³⁷ Oo TUHAN, obana Ko om ooluk ukum Mu.

¹³⁸ Kiawi' ponuu'an Mu nga ooluk om obana.

¹³⁹ Koo'ungot ku nga soko apui, so' dai waidon nu alod-alod ku no ponuu'an Mu no.

¹⁴⁰ Opiot sobana janji Mu. Moingin aku sobana nu ono.

¹⁴¹ Aku yo po d'ado kosudaan om indoraayon, nga dai ya ati su mongolupo nu pontudukan Mu.

¹⁴² D'ado kopupusan nu gogoma'on Mu ooluk-o, om ukum Mu nga dadan obana.

¹⁴³ Noogutan om nogogawan aku, nga iri yo ponuu'an Mu su nopoinsudu' so aku.

¹⁴⁴ Ponuu'an Mu dadan ooluk. Taaki aku yo nu pongoorotian su' miau aku.

Du'a mokilabus

¹⁴⁵ Oo TUHAN, okoog aku momaau so Ikau, sambut-o s'aku. Mongimaid aku nu ponuu'an Mu.

¹⁴⁶ Momaau aku so Ikau. Sopulo aku yo om tumotog aku ya mongimaid nu ukum Mu.

¹⁴⁷ Osarap po tumungag aku yo om momaau so Ikau mokiponobangon. Umarap aku nu janji Mu.

¹⁴⁸ Soro songgawi aku dai koturuw, mongiro-kiro nu ponuu'an Mu.

¹⁴⁹ Oo TUHAN, pagka monamod Ko dadan, rongowo aku yo. Luluudi om ipati aku yo.

¹⁵⁰ Orani yo lobuw mononsara' so aku no, ono yo lobuw dai insan mongimaid nu Ukum Mu.

¹⁵¹ Nga orani Ko po TUHAN, om otatap kiawi' ponuu'an Mu.

¹⁵² Kiat po nu gulu ri noilaan ku yo ponuu'an Mu. Tinantu Mu yo ono musingkolaid.

Du'a mokiponobangon

¹⁵³ Siowi aku yo om oilaan Mu sono nu sobana ko osuang kosonsora'an ku, om sopulo aku yo, so' dai ya su mongolupo nu Ukum Mu.

¹⁵⁴ Topano aku yo om polobuso aku yo. Sopulo aku yo musuat nu janji Mu ri.

¹⁵⁵ Lobuw oraai tantu dai osopulan, so' dai mongowaid nu ukum Mu.

¹⁵⁶ Oo TUHAN, maayo ong luluud Mu. Luluudi aku yo om sopulo aku yo.

¹⁵⁷ Osuang sobana alod-alod ku om lobuw mongosok-osok s'aku, nga dai ku ya lupaan mongimaid ukum Mu no.

¹⁵⁸ Koduung monsiou aku nu lobuw ado koimaidan, sobana ko bisigon ku nosiro, so' dai mongowaid nosiro nu ponuu'an Mu.

¹⁵⁹ Oo TUHAN, koinginan ku sobana ponuu'an Mu. Sopulo aku yo musuat nu samod Mu dai minda no.

¹⁶⁰ Obana om opongoorapan kiawi' totongaron Mu, om otatap musingkolaid kiawi' kotontuan Mu ooluk-o.

Ototog so ukum nu TUHAN

¹⁶¹ Torakon aku d'ado pounayan nu lobuw kipangkat, nga ono-ono ya ukum Mu no su orumaton ku.

¹⁶² Janji Mu no yo su kosudu' so aku, soko koosudu' nu lobuw nokooyang nu osuang orata' boorogo.

¹⁶³ Bisigon ku kiawi' totongaron owudut, nga koinginan ku ong ukum Mu no.

¹⁶⁴ Inturu sondunat mongunsopot aku so Ikau suat so kotontuan Mu nu ooluk-o.

¹⁶⁵ Osogit sorui lobuw mongowaid nu ukum Mu. D'ado ido kopongaagut so nosiro.

¹⁶⁶ Oo TUHAN, mongindad aku nu sopulan Mu aku. Kiawi' ponuu'an Mu waidon ku.

¹⁶⁷ Mongowaid aku nu pontudukan Mu, om okoog aku monamod nu ono.

¹⁶⁸ Waalon ku ponuu'an om pontudukan Mu. Osiou Mu ya kiawi' gogoma'on ku.

Du'a mokiponobangon

¹⁶⁹ Oo TUHAN, muda-mudaan ong orongou Mu ya pokiponobangon ku so Ikau tu. Taaki aku yo nu pongoorotian musuat nu janji Mu ri.

¹⁷⁰ Rongowo yo du'a ku tu, om sopulo aku yo musuat nu janji Mu ri.

¹⁷¹ Mongorayou aku so Ikau dadan, so' tinudukan Mu aku nu ukum Mu.

¹⁷² Mulagu aku suat nu Ukum Mu, so' ooluk kiawi' ponuu'an Mu.

¹⁷³ Muda-mudaan ong dadan Ko ya moingin monabang so aku, so' mongowaid aku ya nu ponuu'an Mu.

¹⁷⁴ Murosiou aku yo nu ponobangan Mu kosapul. Osanang inawo ku no nu ukum Mu.

¹⁷⁵ Powiawo aku yo su' kopongorayou aku so Ikau. Muda-mudaan ong koponabang-a so aku ponuu'an Mu no.

¹⁷⁶ Manou-panou aku soko dumba noliong. Indadi, loga' yo om diumo aku yo, uripon Mu tu, so' dadan aku ya mongowaid nu ukum Mu.