Lagu 116 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Nokolabus kiat so poomatoi

¹ Osamod aku nu TUHAN so' rinongou aku ya Niyo, om dai ya pokomaai-maayan inindamo ku ri.

² Koduung momaau aku so Iyo, rongowon aku ya Niyo.

³ Muad om noliwut aku nu poomatoi, om nopumpunan nu kololaa' nu lobong. Sobana ko lumaa' om mogawa aku.

⁴ Momaau aku sono nu TUHAN nu, “Oo TUHAN, mindamo aku so Ikau, sopulo aku yo!” k'aku.

⁵ TUHAN-o yo po nga obintaak om ooluk. Sobana ko oluluudan ong Kinoringan.

⁶ Ipatan nu TUHAN iri lobuw d'ado pudoyaan. Iya nu d'ado pudoyaan ku, sinopulan aku Niyo.

⁷ Posonangon ku ya inawo ku no, so' owarong TUHAN so aku.

⁸ Pinolabus aku nu TUHAN kiat so poomatoi. Ininsosomodan aku Niyo, om dai aku pinosimaidan Niyo oratu.

⁹ Koirasa aku sono nu kowiawan so wonuo tu, so' pongingoligan nu TUHAN.

¹⁰ Otatap aku ya poimaid pudi koputangar aku nu, “Sobana ko norodsit aku,” k'aku.

¹¹ Iya nu mogawa aku, mutangar aku nu, “D'ado ido koyuwan opongoorapan,” k'aku.

¹² Onu gaam nitaak ku so TUHAN, nisuli' nu koowarong Niyo so aku?

¹³ Itu yo su nisuli' ku so Iyo, ono yo mongowit aku nu sungoi nu anggur niusaa' ku so TUHAN, pongunsopotan ku nu ponobangon Niyo no.

¹⁴ Tumanon ku janji ku so Iyo so tiningkuangon nu kiawi' lobuw songapan Niyo.

¹⁵ Sobana ko oupus TUHAN ong matoi pudi ido ya lobuw kosomodan Niyo no.

¹⁶ Oo TUHAN, aku yo po uripon Mu. Mugogoma'on aku suat so Ikau, soko si ino ku. Pinolabus Mu aku kiat so poomatoi.

¹⁷ Pousaa' aku nu pongayam ginaras pongunsopotan ku so Ikau, om mogdu'a so Ikau.

¹⁸ Tumanon ku janji ku so Iyo so tiningkuangon nu kiawi' lobuw songapan Niyo,

¹⁹ iri minuimpug so natad nu Waloi Maayo nu Kinoringan so bandar Yirusalim. Royowon-o TUHAN!