Lagu 105 - Tinongaran nu Kinoringan: Pinongurugan Lagu Pontudukan om Porojonjian Wagu (Tombonuo)

Kinoringan om lobuw songapan Niyo

¹ Mongunsopot-o so TUHAN, nituturan-o koo'ayo Niyo, om niabar-o gogoma'on Niyo so ongo bansa.

² Mulagu yo pongorayou so TUHAN, nituturan-o kiawi' pinuwaal Niyo owarong-o.

³ Sumudu'an-o, so' toko yo su songapan Niyo. Muda-mudaan ong sumudu'an kiawi' mongusaa' so Iyo.

⁴ Mokitabang-o so Iyo, usaa'on-o Iyo dadan.

^5-6 Oo su solusuk ni Abraham, uripon Niyo, om solusuk ni Yakub, lobuw pinili' Niyo, ondomon-o kiawi' koiran-iran winaal Niyo ri, om pongukuman Niyo so alod-alod toko.

⁷ TUHAN-o su Kinoringan toko. Iyo yo su mogkuasa so pilolongkop nu wonuo tu.

⁸ Ondomon Niyo dadan janji Niyo ri. Otuman janji Niyo musingkolaid.

⁹ Tumanon Niyo janji winaal Niyo so si Abraham om so si Isak.

¹⁰ Pinotatap Niyo janji oono so si Yakub maid nu ukum, ourug nu porojonjian musingkolaid so bansa Israil nu,

¹¹ “Nitaak Ku Tana' Kanaan so ikau, nu nipopusaka Ku,” koo.

¹² Gulu ri, lobuw Israil minolak so tontong oono soko porantau, om owako nosiro.

¹³ Mogilolongkop nosiro kiat so ido bansa mian so bansa wokon. Minda kiat so ido tontong mian so tontong wokon.

¹⁴ Nga dai ya pinosimaidan nu TUHAN osok-osokon nosiro nu isai-isai ya, om suat so nosiro, pinoondom Niyo ongo raja nu,

¹⁵ “Kodi muyu gorusowo lobuw pinili' Ku no. Adang momaal nu oraai so poo'abar Ku no!” koo.

¹⁶ Nopologa' Kinoringan nu likop so wonuo iiri, om inalap Niyo ookanon nosiro ri.

¹⁷ Nga minonuu' Iyo nu ido koyuwan mogulu so nosiro, ono yo si Yusup, iri niwoli soko uripon-i.

¹⁸ Kinogosan akod niyo ri, om liou niyo ri tininggolan nu rantai bosi.

¹⁹ Ompus niyo, notuman-o sono nopirasat niyo nu gulu ri. Pinokobana iyo nu totongaron nu TUHAN.

²⁰ Nilabus-a sono iyo nu raja Masir kiat so jiil. Momogkuasa nu bansa nopolabus so iyo.

²¹ Inurug iyo nu raja ri nu wowaidon so pogkuosaan niyo,

²² om moonuu' nu moomugogoma'on suat so raja, om pokoilo nu onu opatut waalon nosiro.

²³ Minian sono si Yakub so Masir om minolak dii soko porantau.

²⁴ Pinosuang nu TUHAN lobuw songapan Niyo, obasag po ko' alod-alod nosiro.

²⁵ Pininda Niyo inawo nu lobuw Masir nu obisig nu lobuw songapan Niyo, om oraai gogoma'on so uripon Niyo.

²⁶ Kiat nu iri, sinuu' sono Niyo si Musa, uripon Niyo, om si Arun, pinili' Niyo ri.

²⁷ Dii so Masir, minomaal nosiro nu koiran-iran, ono yo gogoma'on kobantug nu Kinoringan.

²⁸ Pinorondom sono nu Kinoringan wonuo iiri, nga dai ya winaal nu lobuw Masir ponuu'an Niyo.

²⁹ Pinopusiliw Niyo bowang nosiro ri nu raa' om pinatoi kiawi' su pait.

³⁰ Nokolongkop su gata' so wonuo nosiro, om insan waloi nu raja ri nga nodasok nu iri.

³¹ Sinuu' Niyo om linumoga' sono su langou osuang, om namuk so pilolongkop nu wonuo iiri.

³² Pinosondot Niyo su uran maantab, om mungkudilop sono.

³³ Rinurus Niyo puun nu anggur om nunuk, om tinogad Niyo kiawi' puun nosiro.

³⁴ Sinuu' Niyo, om linumoga' sono su kokapu dai oiap koosuang.

³⁵ Inawi' nu kokapu oono mongokan tonoman so umo, om kiawi' pinumpung nu tonoman.

³⁶ Pinupatoi Niyo anak ongko kusoi nu ido soido nu sompinunguan nu lobuw Masir.

³⁷ Tinundan sono Niyo lobuw Israil mulaiw kiat dii. Minongowit nosiro nu omas om pirok. Osigag om obasag nosiro kiawi'.

³⁸ Pagka linumaa' lobuw Masir nu lobuw Israil, nosudu'an sono nosiro nu pinulaiwan nu lobuw Israil.

³⁹ Nopokokar Kinoringan nu kawut mongoluub so nosiro, om apui mongonawau umpit nu awi.

⁴⁰ Minindamo nosiro, om tinaakan sono Niyo nu bombolog okanon nosiro. Tinaakan om pinotopod Niyo nosiro nu ookanon kiat so surga.

⁴¹ Pinuak Niyo su watu om lumuyu' sono su sungoi, soko bowang so padang pantai.

⁴² Inondom-a Niyo janji Niyo so si Abraham, uripon Niyo ri.

⁴³ Tinundan sono Niyo lobuw songapan om pinili' Niyo, om monsok-gonsok nosiro mulagu osudu'an.

⁴⁴ Nitaak Niyo so nosiro tana' pinolakan nu bansa wokon. Umo nosiro niposongapan so lobuw songapan Niyo,

⁴⁵ tayon Niyo ong waidon nosiro ongo ukum om ponuu'an Niyo. Royowon-o TUHAN!