Yosua 4 - ICIGHAN BIBILO

¹ Tsô zum u ior cii per Yordan bee ca ca yô, TER ôr kwagh a Yosua, kaa er:

² Tsuwa ior pue kar uhar ken ior, hanma kwe or môm,

³ kaa ve wer: Tôô nen awen pue kar ahar heen, hen atô u Yordan, henpe angahar a upristi a til dông la, per nen a mi, za ver nen a hen ijiir i né za tsa tugh mbu nyian ne.

⁴ Tsô Yosua yila mbapue-kar-uhar mba a tsuwa ken Mbaiserael mbala, ken hanma kwe lu or môm;

⁵ Yosua kaa a ve er: Kar nen sha hemen u areki u TER, Aôndo wen, hungwa nen shin atô u Yordan; yô, hanmô nana̱ tôô iwen i môm sha vandegh ku nan, sha iyenge i ikwe i Mbaiserael vough,

⁶ sha er i̱ hingir ne ikav yô. Aluer iyange igen ônov enev vea pine ne er: Inja i awen ne yô, ka nyi?

⁷ Tsô né kaa a ve ner: Ka sha ci u i tôndo mngerem ma Yordan sha ishigh ki areki u ikuryan u TER; zum u a per Yordan la, i tôndo mngerem ma Yordan; awen ne kpaa aa hingir Mbaiserael ikav i umbur gbem sha won.

⁸ Tsô Mbaiserael er kwagh u Yosua kaa ve la, ve tôô awen pue kar ahar her atô u Yordan er TER kaa Yosua nahan, sha iyenge i ikwe i Mbaiserael la vough, ve yem a mi hen ijiir i ve za tsa la, ve za ver her.

⁹ Yosua kpaa ver awen pue kar ahar her atô u Yordan hen ijiir i angahar a upristi mba ve tôô areki u ikuryan tile la; nga her zan zan nyian.

¹⁰ Gadia upristi mba ve tôô areki la, ve tile her atô u Yordan zan zan i kure kwagh u TER kaa a Yosua er a̱ ôr ior la cii, sha kwagh u Mose kaa Yosua sha mi cii la; ior kpaa per fefa.

¹¹ Tsô zum u ior cii per ca ca yô, areki u TER kpaa per, kua upristi kpaa, sha ashe a ior cii.

¹² Ônov mba Ruben, man ônov mba Gadi kua vegherkwe u Manase kpaa, ve per, ve hemen Mbaiserael a ikav mbi utyav ave, er Mose lu kaa ve nahan;

¹³ ior kuma er dubu akunduahar nahan; mba ve wa ago iyol sha utya yô, ve per sha ishigh ki TER sha u zan ityav, ve ver ishigh sha ajiir a kpuun kpuun a Yeriko.

¹⁴ Sha iyange la TER kende Yosua sha, sha ishigh ki Iserael cii, nahan ve cia un sha ayange a un lu uma cii, er lu ve cia Mose nahan.

¹⁵ Tsô TER ôr kwagh a Yosua, kaa er:

¹⁶ Kaa upristi mba ve tee areki u shiada la, ve̱ due shin Yordan sha.

¹⁷ Tsô Yosua na upristi zwa, kaa er: Due nen shin Yordan sha nahan.

¹⁸ Tsô zum u upristi mba ve tee areki u ikuryan u TER la due shin Yordan sha, mba pende akevangahar sha tar yô, mngerem ma Yordan hide zua her, ma sar avenge er ma vande lun nahan.

¹⁹ Ior due shin Yordan sha uwer u hiihii ayange a u pue la, ve za haa afo hen Gilgal sha ikighir i Yeriko, vegher u sha ityoughkitaregh la.

²⁰ Awen a pue kar ahar a ve tôô shin Yordan la, Yosua tim a hen Gilgal.

²¹ A ôr kwagh a Mbaiserael, a kaa er: Sha ayange a ken hemen zum u ônov enev vea pine uter vev, er: Inja i awen ne yô, ka nyi?

²² Yô, pase nen ônov enev, kaa nen ner: Iserael per Yordan ne sha tareghnyaagh.

²³ Gadia TER, Aôndo wen, tôndo mngerem ma Yordan sha ishigh yenegh, ne per, er TER, Aôndo wen, lu er a Zegemnger u Nyian u A tôndo un sha ishigh yasegh se per la nahan;

²⁴ sha er akuraior a sha won cii a̱ fa uwegh ku TER ka ku ageegh je, man sha er ne̱ cian TER Aôndo wen gbem.