Yosua 3 - ICIGHAN BIBILO

¹ Tsô Yosua nder pepe pepe, nahan un man ônov mba Iserael cii, ve mough hen Shitim ve va haa hen Yordan; ve hire ve tsa her man ve per ye.

² Tsô ayange atar nga kar yô, mbavesen zende ken afo,

³ ve kaa ior er: Zum u né nenge areki u ikuryan u TER, Aôndo wen, man Mbalevi mba ve lu upristi mba ve tee un la yô, mough nen hen ijiir i ne hee ne, dondo nen sha mi.

⁴ Kpa na nen ian hen atô wen a na, i̱ kuma aseva dubu uhar nahan; de mgbôghom nen a na ga, sha u ne̱ fa gbenda u né ze sha mi yô; gadia ne mba a vande karen hen gbenda ne ga.

⁵ Tsô Yosua kaa a ior er: Tsegha nen ayol a en; gadia kper TER Una er akaakpilighyol hen atô wen.

⁶ Shi Yosua ôr kwagh a upristi, kaa er: Tôô nen areki u ikuryan, hemen nen ior, per nen. Tsô ve tôô areki u ikuryan ve hemen ior.

⁷ TER kaa a Yosua er: Nyian Me hii u kenden we sha, sha ishigh ki Mbaiserael cii, sha er ve̱ fa, er M lu a Mose nahan, kape we kpaa Me luun a we la.

⁸ Yô, kaa upristi mbatôôn areki u ikuryan la, wer: zum u né va hen kpemnger u Yordan yô, gba tilen nen shin Yordan tsô.

⁹ Tsô Yosua kaa a Mbaiserael er: Va, va ungwa nen akaaôron a TER, Aôndo wen.

¹⁰ Shi Yosua kaa er: Ka sha kwagh ne man né fa er Aôndo u uma A lu a ven ye, man Una zenda Mbakanaan man Mbahiti man Mbahivi man Mbaperishi man Mbagirgashi man Mbaamor kua Mbayebushi sha ishigh yenegh kera, mimi je.

¹¹ Nenge, areki u ikuryan u TER u tar cii ngu karen sha ishigh yenegh hungwan shin Yordan.

¹² Nahan tsuwa nen ior pue kar uhar ken ikwe i Iserael, hanma kwe, or môm.

¹³ Tsô shighe u akevangahar a upristi mba ve tee areki u TER, TER u tar cii, aa tile shin mngerem ma Yordan yô, á tôndo mngerem ma Yordan ma senen mara, maa tile er kpekpe nahan.

¹⁴ Tsô zum u ior mough hen utenti vev sha u vea per Yordan, er upristi mba ve tee areki u ikuryan lu hemen ior gbenda yô,

¹⁵ zum u mba ve tee areki, ve ar hen Yordan, man angahar a upristi mba ve tee areki mire shin kpemnger yô, gadia shighe u sunda cii, Yordan ka a sar avenge,

¹⁶ tsô mngerem ma senen mara tile ijiir i môm, mor yem ca je hen Adam, gar u lu hen kpe Saretan la; mngerem ma senen shin zegemnger u Araba la, ka Zegemnger u Bar je la, i tôndo ma wang; nahan ior per sha ishigh ki Yeriko jighilii.

¹⁷ Upristi mba ve tee areki u ikuryan u TER, tile dông sha tareghnyaagh shin atô u Yordan, tsô Mbaiserael cii per sha tareghnyaagh zan zan ior cii per Yordan bee ca ca.