Yosua 24 - ICIGHAN BIBILO

¹ Tsô Yosua kohol ikwe i Iserael cii hen Shekem; a yila mbatamen mba Iserael man mbahemenev vev man mbaajiriv vev kua mbavesen vev; tsô ve va sha ishigh ki Aôndo.

² Yosua kaa a ior cii er: TER, Aôndo u Iserael, ngu kaan nahan er: Ngise uter enev tema Ifi yande la, ka Tera, ter u Aberaham man ter u Nahor; ve lu civir mbaaôndo mbagenev je.

³ Tsô M kua a ter wen Aberaham, yande Ifi keela M zende a na ken tar u Kanaan cii, M ngee un tsombor, M na un Isaka.

⁴ M gema M na Isaka Yakob kua Isou; M na Isou uwo u Seir, sha u a̱ ngohol u; kpaa Yakob a ônov nav, ve yem shin Igipiti.

⁵ M tindi Mose man Aron, M tsaha Igipiti, sha akaa a M er ken atô na la; ken masetyô yô, M due a ven.

⁶ M due a uter enev ken Igipiti, ne va ar hen zegemnger; Mbaigipiti tôv uter enev angahar a akekeautya man mbaanyinyav zan zan ve ar hen Zegemnger u Nyian.

⁷ Zum u ve vaa TER yô, A wa ime hen atô wen a Mbaigipiti, A va a zegemnger sha a ve, A cir ve; ashe a en nenge kwagh u M er Igipiti la; ne tsa ken desereti ayange kpishi.

⁸ Tsô M va a ven ken tar u Mbaamor, mba ve tema yande Yordan la; ve nôngo ityav a ven, kpa M na ve sha ikev yen, ne ngohol tar ve; M tim ve sha ishigh yenegh kera kpaa.

⁹ Tsô Balaki wan u Shipor, tor u Moabi, mough, nongo ityav a Iserael; a tindi i yila Balaam wan u Beor, er a̱ va wa ne ifan.

¹⁰ Kpa M rumun M ver ato hen Balaam ga; nahan a gema a ver ne doo doo; M yima ne sha ikev na.

¹¹ Ne per Yordan, ne va hen Yeriko; ior mba Yeriko nôngo ityav a ven kua Mbaamor man Mbaperishi man Mbakanaan man Mbahiti man Mbagirgashi man Mbahivi kua Mbayebushi; kpa M na ve sha ikev yen.

¹² M tindi ahambe hemen, za zenda ve sha ishigh yenegh kera, ka utor mba uhar mba Mbaamor je la; lu sha sanker wou ga, lu sha ada wou kpaa ga.

¹³ M na ne tar u ne er tom ker ga yô, man agar a i lu ne ne maa ga yô, ne tema ker; man ishule i ikon i wain man i ikon i olev i i lu ne ne môôr i ga yô, ne mba yan atam a i.

¹⁴ Nahan yô, cia nen TER, er nen Un tom sha ishima i môm man sha mimi kpaa; de nen mbaaôndo mba uter enev lu civir ve Ifi yande la kua ken Igipiti la, civir nen TER.

¹⁵ Kpa aluer, u civir TER, á lu ne kwagh u bo yô, tsuwa nen u i lu ne ka civir la nyian, shin a lu Mbaaôndo mba Ifi yandera mba uter enev lu civir la, shin mbaaôndo mba Mbaamor, mba ne tem ken tar ve ne; kpa mo a ya wam cii yô, ka TER sé civir Un ye.

¹⁶ Tsô ior gema kaa er: Mayange se fatyô u undun TER, sé gema sé civir mbaaôndo mbagenev ga;

¹⁷ gadia TER, Aôndo wase, ka Un, A dugh a vese kua uter asev ken tar u Igipiti ken ya u kpan ye, shi A er uzegembaakaav mban sha ashe ase je, A kura se sha gbenda u se vaan sha mi cii, kua ken akuraior a se kar hen atô u a cii kpaa;

¹⁸ TER zenda akuraior cii sha ishigh yasegh kera, ka Mbaamor mba ve lu ken tar ne ne; nahan yô, se kpaa sé civir TER, gadia ka Un A lu Aôndo wase ye.

¹⁹ Tsô Yosua kaa a ior er: Ne fatyô u civir TER ga; gadia Un ka Aôndo u wang; ka Aôndo u gban iwuhe Una de ne akaabo a en kua asorabo a en ga.

²⁰ Aluer ne undu TER né civir mbaaôndo mbagenev yô, Una gema Una er ne kwagh u bo, Una tim ne, shin er A vande veren ne doo doo nahan kpaa.

²¹ Tsô ior kaa a Yosua er: Sé er nahan ga, ka TER sé civir ye.

²² Tsô Yosua kaa a ior er: Ne mba pasen ayol a en je ner, ne tsuwa TER né civir Un. Ve kaa er: Se mba pasen nahan.

²³ Nahan yô, dugh nen mbaaôndo mbagenev mba ve lu ker a ven la, kera gema ver nen asema a en sha TER, Aôndo u Iserael.

²⁴ Tsô ior kaa a Yosua er: Ka TER, Aôndo wase, sé civir un ye, ka imo Na kpaa sé ver ato sha mi ye.

²⁵ Nahan Yosua ya ikur a ior sha iyange la, a wa ve tindi kua kwaghôron u ijirigh hen Shekem.

²⁶ Tsô Yosua nger akaaôron ne ken ruamabera u atindigh u Aôndo; a tôô zegeiwen a tim un hen kon u terebin u u lu hen icighanjiir u TER la.

²⁷ Yosua shi kaa a ior cii er: Nenge, iwen ne ia hingir se shiada, gadia i ungwa akaaôron a TER A er se cii; nahan yô, ia hingir ne shiada sha er né nyiman Aôndo wen ga yô.

²⁸ Nahan Yosua na ior gbenda, hanma or yem hen dyako u nan.

²⁹ Tsô ken masejime u akaa ne, Yosua wan u Nun, wanakiriki u TER, kpe lu anyom deri man pue.

³⁰ Ve ii un ken tar u dyako na, hen Timnati-sera, u a lu ken tar u iwoogh u Eferaim hen uwo u Gaashi vegher u ken imbusutarimese la.

³¹ Mbaiserael civir TER sha ayange a Yosua lu uma la cii, man sha ayange a mbatamen mba ve lu uma heregh er Yosua kpe kera la, mba ve fa aeren a TER cii, a A er sha ci u Iserael la.

³² I ii akuhe a Yosev, a Mbaiserael mough a mi ken tar u Igipiti la ken Shekem ken tiôntar u Yakob yam a ônov mba Hamor, ter u Shekem, sha agbenger a inyar kuma deri la; a hingir dyako u ônov mba Yosev.

³³ Eleasar wan u Aron kpaa kpe; ve ii un sha igungu u wan na Pinehashi, u i na un sha tar u iwoogh u Eferaim la.