Yosua 21 - ICIGHAN BIBILO

¹ Tsô mbavesen mba yaav mba uter mba Mbalevi va hen pristi Eleasar man hen Yosua wan u Nun man hen mbavesen mba yaav mba uter mba ikwe i Mbaiserael;

² ve ôr kwagh a ve hen Shilo ken tar u Kanaan, ve kaa er: TER kaa Mose er, a̱ kaa, i̱ na se agar a sé tema kimi kua akôngo a lun a toho a a kase a sha ci u ilev yasev.

³ Nahan Mbaiserael pande dyako ve, gema na Mbalevi agar kua akôngo a lun a toho a a kase, a sha imo i TER.

⁴ Kwar gba sha icombor i Mbakohati; ônov mba pristi Aron, mba ve lu Mbalevi yô, ve zua a agar pue kar atar sha ishor i eren ken kwe u Yuda man kwe u Shimeon kua kwe u Benyamin.

⁵ Ônov mba Kohati mbagenev yô, ve zua a agar pue sha ishor i eren ken icombor i kwe u Eferaim man kwe u Dan kua vegherkwe u Manase.

⁶ Ônov mba Gershon ve zua a agar pue kar atar sha ishor i eren ken icombor i kwe i Isakar man kwe u Asher man kwe u Nafetali kua vegherkwe u Manase ken Bashan.

⁷ Ônov mba Merari sha icombor ve, ve zua a agar pue kar ahar ken kwe u Ruben man kwe u Gadi kua kwe u Sebulon.

⁸ Mbaiserael na Mbalevi agar ne kua akôngo a lun a toho a a kase a yô, sha ishor i eren sha imo i TER kaa, Mose gema ôr ve la.

⁹ Kwe u ônov mba Yuda kua kwe u ônov mba Shimeon ve na agar a i ter ati a a ne,

¹⁰ hingir a ônov mba Aron, icombor i Mbakohati, mba ve lu ônov mba Levi (kwar u hiihii lu u ve je).

¹¹ Ve na ve: Kiriati-arba, Arba ka ter u Anaki (ka Heberon je la,) sha tar u iwoogh u Yuda kua akôngo a lun a toho a a kase un yô.

¹² Kpa ishule i gar la man agar a kiriki a a kase un yô, ve na Kalebu wan u Yefune, hingir kwagh na.

¹³ Ônov mba pristi Aron yô, ve na ve Heberon kua akôngo a lun a toho a a kase un la, ka gar u waren ker sha ci u or u nan woo or yô, kua Libena man akôngo a na,

¹⁴ man Yatir kua akôngo a na, man Eshetemoa kua akôngo a na,

¹⁵ man Holon kua akôngo a na, man Debir kua akôngo a na,

¹⁶ man Ain kua akôngo a na, Yuta kua akôngo a na, man Bete-shemeshi kua akôngo a na; ka agar ataankaranyiin ken ikwe ihiar je ne.

¹⁷ Ken kwe u Benyamin yô, ka Gibeon kua akôngo a na, man Geba kua akôngo a na,

¹⁸ man Anatoti kua akôngo a na, man Alemon kua akôngo a na; ka agar anyiin je la.

¹⁹ Agar cii a ônov mba pristi Aron, lu agar pue kar atar kua akôngo a a.

²⁰ Icombor i ônov mba Kohati, Mbalevi, ka ônov mba Kohati mba ve shi yô, ve zua a agar sha ishor i eren ken kwe u Eferaim.

²¹ I na ve Shekem kua akôngo a lun a toho a a kase un, sha tar u iwoogh u Eferaim, ka gar u waren ker sha ci u or u nan woo or yô, man Geser kua akôngo a na,

²² man Kibisaim kua akôngo a na, man Bete-horon kua akôngo a na; ka agar anyiin je la.

²³ Ken kwe u Dan yô, lu Eleteke kua akôngo a na, man Gibeton kua akôngo a na,

²⁴ Aiyalon kua akôngo a na, man Gati-rimon kua akôngo a na; ka agar anyiin je la.

²⁵ Ken vegherkwe u Manase, lu Taanaki kua akôngo a na, man Gati-rimon kua akôngo a na; ka agar ahar je la.

²⁶ Agar cii a icombor i ônov mba Kohati mba ve shi la, lu agar pue kua akôngo a a.

²⁷ Ônov mba Gershon mba ve lu icombor i Mbalevi yô, ken vegherkwe u Manase, i na ve Golan ken Bashan, kua akôngo a na, ka agar u waren ker sha ci u or u nan woo or yô, man Beshetera kua akôngo a na; ka agar ahar je la.

²⁸ Man ken kwe u Isakar yô, lu Kishion kua akôngo a na, man Daberati kua akôngo a na,

²⁹ man Yarmuti kua akôngo a na, man En-ganim kua akôngo a na; ka agar anyiin je la.

³⁰ Ken kwe u Asher yô, lu Mishal kua akôngo a na, man Abedon kua akôngo a na,

³¹ man Helkati kua akôngo a na, man Rehobi kua akôngo a na; agar anyiin je la.

³² Man ken kwe u Nafetali yô, lu Kedeshi ken Galilia kua akôngo a na, ka gar u waren ker sha ci u or u nan woo or yô, man Hamoti-dor kua akôngo a na, ma Karetan kua akôngo a na; ka agar atar je la.

³³ Agar a Mbagershon cii sha icombor ve yô, lu agar pue kar atar kua akôngo a a.

³⁴ Icombor i ônov mba Merari, Mbalevi, mba ve shi yô, i na ve ken kwe u Sebulon: Yokeneam kua akôngo a na, man Karta kua akôngo a na,

³⁵ man Demena kua akôngo a na, man Nahalal kua akôngo a na; ka agar anyiin je la.

³⁶ Man ken kwe u Ruben yô, lu Beser kua akôngo a na, man Yahashi kua akôngo a na,

³⁷ man Kedemoti kua akôngo a na, man Mefaati kua akôngo a na; ka agar anyiin je la.

³⁸ Ken kwe u Gadi yô, lu Ramoti ken Gileadi kua akôngo a na, ka gar u waren ker sha ci u or u nan woo or yô, man Mahanaim kua akôngo a na,

³⁹ man Heshebon kua akôngo a na, man Yaser kua akôngo a na; ka agar anyiin je la.

⁴⁰ Agar ne cii ka a ônov mba Merari, sha icombor ve, ka icombor i Mbalevi i i shi je la; kwar ve lu agar pue kar ahar.

⁴¹ Kohol agar a Mbalevi ken atô u Mbaiserael cii yô, lu agar akunduahar kar anigheni kua akôngo a a.

⁴² Agar ne cii lu a akôngo a lun a toho a a, a a kase a la; ka pe agar ne cii a lu la.

⁴³ Nahan TER na Iserael tar la cii, u A bum a uter vev er Una na ve u la; ve ngohol u, ve tema ken u.

⁴⁴ TER na ve mmem han han kpaa, er A bum a uter vev cii yô; ma orihom môm cihi ve ga; TER na mbaihomov vev cii sha ikev ve.

⁴⁵ Ma kwagh u dedoo môm u Aôndo ôr ya u Iserael cii bunde ga, akaa cii kure sha mi vough.