Yosua 20 - ICIGHAN BIBILO

¹ Tsô TER ôr kwagh a Yosua kaa er:

² Ôr kwagh a Mbaiserael, kaa ve wer: Ver nen agar a waren ker, a yan M ôr Mose kwagh u a, gema kaa ne la,

³ sha er or u nan woo or abu i lu sha apera ga nana̱ yevese nana̱ za ta ker yô, a̱ hingir ne ajiir a waren sha ikev i or u oron iyev i awambe la.

⁴ Nana̱ yevese nana̱ za ta ken mô gar ugen, nana̱ tile sha hundagar henpe nyôron, nana̱ pase mbavesen mba gar la kwagh u nan er yô; nahan vea nyôr a nan ken gar vea na nan ijiir i teman.

⁵ Aluer or u oron iyev i awambe la una tôv nan angahar una za kohol kpaa, ve̱ de ne or u nan woo or la sha ikev na ga, gadia nan wua u a we ndor a nan la abu, nan vande kôron un ihom kpaa ga.

⁶ Nana̱ tema ken gar la zan zan shighe u mkohol á ôr nan ijir, man shi saa zegepristi u a tem sha ayange la una kpe kera, man or u nan woo or la, nana hide ken gar u nan, hen ya u nan, ken gar u iyange nan due nan yevese la ye.

⁷ Tsô ve tsegha Kedeshi ken Galilia sha tar u iwoogh u Nafetali la, man Shekem sha tar u iwoogh u Eferaim, man Kiriati-arba (ka Heberon je la) sha tar u iwoogh u Yuda.

⁸ Yande Yordan hen Yeriko vegher u sha ityoughkitaregh yô, ve ver Beser ken desereti sha tar u vaanaa ken kwe u Ruben, man Ramoti ken Gileadi ken kwe u Gadi, man Golan ken Bashan ken kwe u Manase.

⁹ Angan ka agar a i ver sha ci u Mbaiserael cii kua or u ikur igen u nan nyer a nyôr yô, sha er hanmô u nan wua or abu yô, nana̱ yevese nana̱ ta ker, nana̱ de kpe sha ikev i or u oron iyev i awambe ga, saa nana̱ vande tilen sha ishigh ki mkohol ve.