Yosua 17 - ICIGHAN BIBILO

¹ Kwe u Manase ngohol kwar ve; gadia wen lu waniunda u Yosev. Makir wan u Manase, ter u Gileadi, lu or u nôngon ityav, nahan a zua a Gileadi kua Bashan.

² Ônov mba Manase mbagenev kpaa ngohol kwar sha icombor ve: ônov mba Abieser man ônov mba Heleki man ônov mba Aseriel man ônov mba Shekem man ônov mba Hefer kua ônov mba Shemida; ka ônov mba nomso mba Manase, wan u Yosev, sha icombor ve je la.

³ Kpa Selofehadi wan u Hefer, wan u Gileadi, wan u Makir, wan u Manase, lu a ônov mba nomso ga, saa mba kasev; ati a ônov nav mba kasev mbala yô, er: Mahela man Noa man Hogela man Milka man Tirsa;

⁴ tsô ve va hen pristi Eleasar man Yosua wan u Nun kua mbahemenev, ve kaa er: TER lu kaa a Mose er, a̱ na se dyako ken anmgbianev asev; nahan a na ve dyako ken anmgbianev mba ter ve sha imo i TER la.

⁵ Nahan Manase zua a ikwar pue, kua tar u Gileadi man Bashan u a lu yande Yordan;

⁶ gadia ônov mba kasev mba Manase kpaa lu a dyako ken ônov nav mba nomso; tar u Gileadi hingir u ônov mba nomso mba Manase mba ve shi yô.

⁷ Ikighirtar i Manase hii hen Asher za ar hen Mikemata u a lu sha ishigh ki Shekem la, ikighir la kar ken uwegh ku yanegh za ar hen mba ve tema ken En-tapua la.

⁸ Tar u Tapua ka u Manase je, kpa Tapua u a dondo sha ikighirtar i Manase la ka u ônov mba Eferaim.

⁹ Ikighir la sen zan zan za ar hen uwagh u Kana, vegher u ken imbusutariyan u uwagh la; agar ngara ka a Eferaim, a a lu ken agar a Manase; ikighirtar i Manase lu uwagh la vegher u ken imbusutarimese kar za kure hen zegemnger;

¹⁰ vegher u ken imbusutariyan lu u Eferaim; vegher u ken imbusutarimese yô, lu u Manase; zegemnger lu ikighir na; ve ar hen Asher vegher u ken imbusutarimese man hen Isakar kpaa vegher u sha ityoughkitaregh.

¹¹ Ken Isakar kua ken Asher yô, Manase lu a Bete-shean kua agar a na, man Ibeleam kua agar a na, ior i Dor kua agar a na, man ior i Endor kua agar a na, man ior i Taanaki kua agar a na, man ior i Megido kua agar a na, ka agungu atar je la.

¹² Kpa ônov mba Manase fatyô u zendan mba ve tema sha agar a ngara kera ga; Mbakanaan gba teman a ve ken tar la tsô.

¹³ Nahan, zum u Mbaiserael hingir mba taver yô, ve na Mbakanaan tom u kpan, ve zenda ve kera ca ca ga.

¹⁴ Tsô ônov mba Yosev ôr kwagh a Yosua kaa er: Ka nyi u nem dyako kwar môm man ci môm tseeghe? Mo u m lu zegeikurior je, sha er TER A verem doo doo zan zan hegen ne.

¹⁵ Yosua kaa a ve er: Aluer wea lu zegeikurior yô, mough za sha ikô, za paa ijiir sha ker, sha ci wou, ken tar u Mbaperishi man tar u Mbarefai, aluer tar u iwoogh u Eferaim ua ndahar we yô.

¹⁶ Tsô ônov mba Yosev kaa a na er: Tar u iwoogh kuma se ga, man Mbakanaan mba ve tem ken tar u delaa shin pev la cii mba a akeke a iyôô, ka mba ve tem ken Bete-shean man agar a na, kua mba ve tem shin pev u Yesereel cii.

¹⁷ Tsô Yosua ôr kwagh a ya u Yosev, ka Eferaim man Manase je la, kaa er: U ngu ikur i vesen je, man u taver kpishi kpaa; yô, ú zua a kwar môm tseegh ga,

¹⁸ kpa tar u iwoogh ua hingir u wou, gadia shin er u lu ikô nahan kpaa ú paa u, nahan tar u u dondo a i la kpaa ua hingir u wou; gadia ú zenda Mbakanaan kera shin er ve lu a akeke a iyôô, ve taver nahan je kpaa.