Yosua 13 - ICIGHAN BIBILO

¹ Tsô Yosua bee iyol, a tsa sha won; nahan TER kaa a na er: We u bee iyol ve, u tsa sha won, man tar shi kpishi u á ngohol yô.

² Tar u u shi yô, ka: ityar i Mbafiliti cii, kua Mbageshur cii,

³ hii hen Shihor u a dondo a Igipiti zan zan za ar hen ikighirtar i Ekeron ken imbusutarimese la; i wa u ken tar u Mbakanaan je; utor mba Mbafiliti utaan: tor u Gasa man u Ashedodi man u Asekelon man u Gati man u Ekeron, man shi Mbaavi

⁴ ken vegher u imbusutariyan la; tar u Mbakanaan cii man Meara u Mbashidon zan zan za ar hen Afeki man ikighirtar i Mbaamor,

⁵ man tar u Mbagebal man Lebanon cii vegher u iyange i dugh la, hii hen Baal-gadi shin itine i uwo u Hermon zan zan za ar sha gbenda u karen zan Hamati la,

⁶ mba ve tema ken tar u iwoogh cii, hii hen Lebanon zan zan za ar hen Miserefoti-maim, ka Mbashidon cii je la. Mo Me zenda ve sha ishigh ki Mbaiserael kera; yô, gema u, na Iserael u̱ hingir ve dyako, er M kaa u yô.

⁷ Yô, kar ase tar ne, u̱ hingir dyako u ikwe itiankarinyiin kua vegherkwe u Manase.

⁸ Mbaruben kua Mbagadi ngohol dyako ve a vegherkwe u Manase ugen la imôngo, u Mose na ve yande Yordan vegher u sha ityoughkitaregh la, er Mose wanakiriki u TER na ve la;

⁹ hii hen Aroer, u a lu hen kpe u pev u Arnon la, man gar u hen atô u pev la, man tar u vaanaa u Medeba zan zan za ar hen Dibon;

¹⁰ man agar a Shihon tor u Mbaamor u a tema tor sha Heshebon la cii zan zan za ar hen ikighirtar i Mbaamon la;

¹¹ man Gileadi man ikighirtar i Mbageshur man Mbamaakati kua uwo u Hermon cii man Bashan cii zan zan za ar hen Saleka;

¹² tartor u Ogo ken Bashan cii, u a lu tor ken Ashetaroti man ken Ederei (ka asande a Mbarefai mba ve shi her je la); gadia mban Mose hemba ve, zenda ve kera.

¹³ Nahan kpaa Mbaiserael zenda Mbageshur kua Mbamaakati kera ga, kpa Geshur man Maakati tema her atô u Iserael zan zan nyian.

¹⁴ Ka kwe u Levi tseegh a na u dyako ga yô; iniav mbi TER, Aôndo u Iserael, mbi i ne mbi sha usu, ka mbi, mbi lu dyako na ye, er A kaa un yô.

¹⁵ Mose na kwe u ônov mba Ruben sha icombor ve;

¹⁶ ve ngohol tar u u hii hen Aroer, u a lu hen kpe u pev u Arnon la, man gar u shin atô u pev la man tar u vaanaa u hen Medeba la cii;

¹⁷ Heshebon man agar a na cii a a lu hen tar u vaanaa la, ka: Dibon man Bamoti-baal man Betebaal-meon,

¹⁸ man Yahashi man Kedemoti man Mefaati,

¹⁹ man Kiriataim man Shibema man Sereti-shahar, sha uwo u shin pev la,

²⁰ man Bete-peor man soughsough u Pisega man Bete-yeshimoti;

²¹ man agar a tar u vaanaa cii, kua tartor u Shihon tor u Mbaamor u a tema tor ken Heshebon, u Mose hemba un a utor mba Midian la cii, ka: Evi man Rekem man Sur man Hur kua Reba, ka utor mba Shihon mba ve tema ken tar la je la.

²² Balaam wan u Beor u tsengan ôron kwagh la, Mbaiserael wua un sha sanker a mbagenev mba i wua ve la imôngo.

²³ Ikighirtar i ônov mba Ruben yô, ka Yordan kua iningirtar na. Ngun ka dyako u ônov mba Ruben sha icombor ve, agar a vesen kua agar a kiriki a a kase a je ne.

²⁴ Mose na kwe u Gadi sha icombor ve:

²⁵ ve ngohol tar u Yaser man agar a Gileadi cii man vegher u tar u Mbaamon zan zan ar hen Aroer u a dondo a Raba la,

²⁶ man shi hii hen Heshebon zan zan za ar hen Ramati-misepe kua Betomin, man shi hii hen Mahanaim zan zan za ar hen ikighirtar i Debir,

²⁷ man shin pev u Bete-haram man Bete-nimra, man Sukoti kua Safon, tartor u Shihon tor u Heshebon u u shi la, man Yordan man ningir na zan zan za ar hen ikighir i kpe u zegemnger u Kinereti yande u Yordan vegher u sha ityoughkitaregh la.

²⁸ Ngun ka dyako u ônov mba Gadi sha icombor ve, agar a vesen kua agar a kiriki a a kase a je ne.

²⁹ Mose na vegherkwe u Manase dyako; vegherkwe u ônov mba Manase sha icombor ve cii:

³⁰ tar ve hii hen Mahanaim, Bashan cii, tartor u Ogo tor u Bashan cii, man agar a Yair a a lu ken Bashan cii, agar akunduatar;

³¹ man vegher u Gileadi kua Ashetaroti man Ederei, ka agar a tartor u Ogo ken Bashan je la, ônov mba Makir, wan u Manase, ngohol, ka vegher u ônov mba Makir sha icombor ve je la.

³² Man ka udyako mba Mose na ken ukpuunkpuun mba Moabi yande Yordan vegher u Yeriko sha ityoughkitaregh je la.

³³ Kpa kwe u Levi yô, Mose na ve ma dyako ga; TER, Aôndo u Iserael, ka dyako ve, er A tôndo zwa a ve yô.