Yosua 11 - ICIGHAN BIBILO

¹ Tsô zum u Yabin tor u Hasor ungwa nahan yô, a tindi loho hen Yobabi tor u Madon man hen tor u Shimeron man hen tor u Akesav,

² man shi hen utor mba ken imbusutarimese sha tar u iwoogh la man ken Araba vegher u imbusutariyan i Kinereti la man ken tar u delaa man sha agungu a Dor, vegher u shin ityôtar la,

³ hen Mbakanaan, vegher u sha ityoughkitaregh man shin ityôtar, man Mbaamor man Mbahiti man Mbaperishi man Mbayebushi sha tar u iwoogh, man Mbahivi shin itine i Hermon ken tar u Misepa.

⁴ Tsô ve due, kua akumautya ve cii, ior ngee kpishi, er waarawa u hen kpezegemnger nahan, a anyinya man akeke a kpelan kpishi je.

⁵ Utor mban cii zua imôngo, ve va haa afo ijiir i môm hen kpe u mngerem ma Merom, sha u va nôngon ityav a Iserael.

⁶ Tsô TER kaa a Yosua er: De cie ve ga, gadia kper er hegen nahan Me na ve cii sha ikev i Iserael kpenegh, ú tôndo anyinya ve igbela i shin akishiangahar, ú nande akeke ve a kpelan sha usu.

⁷ Tsô Yosua a mbautyav cii va kohol ve hen mngerem ma Merom fese, ve ta sha a ve.

⁸ TER na ve sha ikev i Iserael, ve hemba ve, ve zenda ve zan zan za ar hen Zegeshidon, man hen Miserefoti-maim kpaa, kua hen pev u Misepa vegher u sha ityoughkitaregh la; ve wua ve je ma or kera shi ga.

⁹ Yosua er a ve er TER kaa un nahan; a tôndo anyinya ve igbela i akishiangahar, a nande akeke ve sha usu.

¹⁰ Hen shighe la je Yosua gema, hide ngohol Hasor, a wua tor na sha sanker, gadia ngise Hasor lu ityough ki ityartor la cii.

¹¹ Ve wua mbaumav mba ve lu ken a na cii sha zwa u sanker, ve tim ve ci ca cii, kwagh u ôôn môm shi ker ga; a nande Hasor sha usu kpaa.

¹² Agar a utor mbala cii kua utor vev cii, Yosua ngohol ve, a hemba ve sha zwa u sanker, tim ve ci ca cii, er Mose wanakiriki u TER lu kaa yô.

¹³ Kpa agar a a lu sha agungu ve yô, Iserael nande môm môm ga; saa Hasor tseegh, Yosua nande un ye.

¹⁴ Ishar i sha agar la cii kua ilev mbi a, Mbaiserael ya, hingir akaa a ve; kpaa ve wua hanma or sha zwa u sanker zan zan je ve tim ve, ve shi ma kwagh u ôôn ken a ga.

¹⁵ Er TER kaa a Mose wanakiriki Na la, kape Yosua kpaa er la; a undu ma kwagh ken akaa cii a TER kaa a Mose la ga.

¹⁶ Kape Yosua ngohol tar la cii je la, tar u iwoogh man tar u Imbusutariyan cii, kua tar u Goshen cii man tar u delaa man Araba, man tar u iwoogh u Iserael kua pev na,

¹⁷ hii hen uwo u Halaki u kôndon zan sha Seir zan zan ar hen Baal-gadi shin pev u Lebanon shin itine i uwo u Hermon; a kôr utor vev cii, a hemba ve, a wua.

¹⁸ Yosua nôngo ityav a utor mban cii ica i gba.

¹⁹ Ma gar môm zua a Mbaiserael ga, saa Mbahivi, ior i ken Gibeon la; ka sha utya ve lu hemban ve cii ye.

²⁰ Gadia ka TER je, A cighir ve asema er ve̱ mough ityav a Iserael sha er ve̱ tim ve ci ca cii, ve̱ de ker mhôônom ga yô, kpa ve̱ tim ve, er TER kaa a Mose nahan.

²¹ Hen shighe la je Yosua va, va tim Mbaanaki sha tar u iwoogh kera, ken Heberon man Debir man Anabi man sha tar u Yuda u iwoogh cii kua sha tar u Iserael u iwoogh cii; Yosua tim ve ci ca cii kua agar a ve.

²² I shi or môm môm u Mbaanaki ken tar u Mbaiserael ga; saa ken Gasa man Gati man Ashedodi tseegh mbagenev shi ye.

²³ Kape Yosua ngohol tar cii la, sha kwagh u TER ôr a Mose cii; Yosua na Iserael dyako sha u, sha uipaven vev sha ikwe ve. Tar la maa mem ityav.