Yosua 10 - ICIGHAN BIBILO

¹ Tsô zum u Adoni-sedeki tor u Yerusalem ungwa er Yosua hemba Ai, tim un purututu kpaa; er lu er a Yeriko man tor na nahan, kape a er a Ai man tor na kpaa la; man er mba ve tema ken Gibeon kpaa, ve zua a Iserael maa mba ken a ve je;

² nahan ve cia kpishi, gadia Gibeon lu zegegar je, er gar u tor nahan, hemba kehen a Ai kpaa, nomsombaiorov mba ker kpaa lu mbaageev je.

³ Nahan Adoni-sedeki tor u Yerusalem, tindi loho hen Hoham tor u Heberon man Piram tor u Yarmuti man Yafia tor u Lakishi man Debir tor u Egelon, a kaa er:

⁴ Va kohol nen mo, wasem nen, sé ta num sha Gibeon; gadia a zua a Yosua man Mbaiserael.

⁵ Nahan utor mba utaan mba Mbaamor mbala, tor u Yerusalem man tor u Heberon man tor u Yarmuti man tor u Lakishi kua tor u Egelon, ve kohol ayol a ve kua akumautya ve cii, ve va haa afo hen Gibeon, ve nôngo ityav a na.

⁶ Ior mba Gibeon tindi loho hen Yosua hen afo a hen Gilgal, ve kaa er: De tee uwegh ough sha ikpan you kera ga, kôndo her a vese fefa, va yima se, wase se; gadia utor mba Mbaamor cii, mba ve tem ken tar u iwoogh, kohol sha a vese.

⁷ Tsô Yosua mough hen Gilgal kôndo, un kua mbautyav cii a na imôngo, man anomaior a fan ityav cii kpaa.

⁸ TER kaa a Yosua er: De cie ve ga, gadia M na ve sha ikev you; ma nomsoor ve môm nan ngu, u nana cihi nana tile u sha ishi ga.

⁹ Tsô Yosua va ta sha a ve fese, gadia a mough hen Gilgal a tsa zan kaka.

¹⁰ Nahan TER nzughul a ve sha ishigh ki Iserael, a wua ve hen Gibeon je falegh gba, a zenda ve ityô sha gbenda u kôndon yemen sha Bete-horon, a lu wuan ve zan zan za ar hen Aseka, kua hen Makeda kpaa.

¹¹ Tsô zum u ve lu yevese Iserael la, er ve lu senen hen soughsough u Bete-horon yô, TER ta ve uzegembaawombov mba ve due Sha zan zan za ar hen Aseka, nahan ve kpe; mba ve kpe akpoghol a awombo la hemba mba Iserael wua sha sanker la iyenge.

¹² Tsô, Yosua ôr kwagh a TER sha iyange i TER na Mbaamor sha ikev i Mbaiserael la, a kaa sha ishigh ki Iserael er: We, iyange, tile gigh gigh sha Gibeon; We, uwer di kpaa shin pev u Ayalon!

¹³ Tsô iyange tile gigh gigh, uwer kpaa tile, zan zan ior mbala or iyev sha mbaihomov vev. Ka ken ruamabera u Yashar i nger kwagh ne ye ga? Iyange tile her atô tembe, kera mire fefa ga je er iyange jimin nahan.

¹⁴ Iyange i lun er ngila nahan ngi a lu ga, shin ken ijime shin ken hemen kpaa, i TER ungwa imo i or nahan ga; gadia TER nôngo ityav sha ci u Iserael.

¹⁵ Tsô Yosua hide a Iserael cii hen afo a hen Gilgal.

¹⁶ Utor mba utaan mbala yevese za yer ken bar u Makeda.

¹⁷ Tsô i va kaa Yosua er: I zua a utor mba utaan mbala, ve yer ken bar u Makeda.

¹⁸ Tsô Yosua kaa er: Menger nen uzegembaawenev cir nen bar shon, ver nen ior mba kuran ve kpaa;

¹⁹ kpa ne yô, de timbir nen ga, zenda nen mbaihomov enev ityô, wua nen mba ken ijime; de rumun nen ner ve̱ nyôr ken agar a ve ga, gadia TER, Aôndo wen, na ve sha ikev yen.

²⁰ Tsô zum u Yosua man Mbaiserael wua ve je falegh gba, tim a tim ve je yô, mba ve shi her mbala, ve yevese ve za nyôr ken agar a a lu a ugir yô,

²¹ ior maa hide her afo hen Yosua hen Makeda doo doo; nombor tsô kpaa, ma or cihi dugh a Mbaiserael ga.

²² Nahan Yosua kaa er: Bugh ase nen bar shon, dugh nen utor mba utaan mban, va nam nen.

²³ Ve er nahan, ve dugh utor mba utaan mbala ken bar, ve na un; ka tor u Yerusalem man tor u Heberon man tor u Yarmuti man tor u Lakishi kua tor u Egelon je la.

²⁴ Tsô mba dugh a utor mbala mba ne Yosua yô, Yosua yila ior mba Iserael cii, a kaa mbahemenev mba utyav mba ve za a na imôngo la er: Kporom nen, penda nen angahar a en sha imon i utor mban. Tsô ve kporom ve va penda ve angahar sha imon.

²⁵ Nahan Yosua kaa a ve er: De cie nen ga, man de luun a mciem iyol kpaa ga, lu nen dông, taver nen asema kpaa, gadia kape TER Una er a mbaihomov enev cii, mba nea nôngo ityav a ve la.

²⁶ Ken masetyô yô, Yosua ta ve inya, wua ve, hambe ve sha ikon itian; ve lu sha ikon la zan zan iyange kar been.

²⁷ Tsô iyange ngur miren yô, Yosua kaa er; i̱ hungwa a ve sha ikon la, i̱ gbihi ve ken bar u ashen ve yer ker la; ve cir zwa u bar la sha uzegembaawenev, mba her zan zan nyian.

²⁸ Sha iyange la je Yosua ngohol Makeda, hemba un sha zwa u sanker, kua tor na; a tim un ci ca cii kua mbaumav mba ve lu ker cii, a shi ma or môm kimi ga; a er a tor u Makeda er lu er a tor u Yeriko nahan.

²⁹ Tsô Yosua mough hen Makeda a Iserael cii, za hen Libena; a za nôngo ityav a Libena.

³⁰ Un kpaa TER gema un kua tor na, na sha ikev i Iserael; a hemba un sha zwa u sanker kua mbaumav mba ve lu ken a na cii; a de ma or shi ker ga; a er a tor na er lu er a tor u Yeriko nahan.

³¹ Tsô Yosua mough hen Libena, za hen Lakishi a Iserael cii, ve za haa afo, ve nôngo ityav a na;

³² TER na Lakishi sha ikev i Iserael, a ngohol un sha iyange i sha uhar la, a hemba un sha zwa u sanker, kua mbaumav mba ve lu ken a na cii, er lu er a Libena nahan.

³³ Tsô Horam tor u Geser kôndo sha u wasen Lakishi, kpa Yosua hemba un a ior nav, a kera shi ma or ga.

³⁴ Tsô Yosua mough a Iserael cii hen Lakishi va hen Egelon; ve za haa afo, ve nôngo ityav a na;

³⁵ sha iyange la je ve ngohol un, ve hemba un sha zwa u sanker; mbaumav mba ve lu kimi cii kpaa, a tim ve ca ca sha iyange la, er lu er a Lakishi nahan.

³⁶ Shi Yosua mough hen Egelon a Iserael cii, kôndo va sha Heberon; ve za nôngo ityav a na;

³⁷ ve ngohol un, ve hemba un sha zwa u sanker, kua tor na, man agar a na cii, man mbaumav mba ve lu ken a cii; a shi ma or ga, er lu er a Egelon nahan; a tim un ci ca cii kua mbaumav mba ve lu ken a na cii.

³⁸ Tsô Yosua kaha a Iserael cii ve yem hen Debir, a za nôngo ityav a na;

³⁹ a hemba un kua tor na, man agar a na cii; ve hemba ve sha zwa u sanker, ve tim mbaumav mba keregh ci ca cii, a kera shi ma or ga; Er lu er a Heberon nahan, kape er a Debir kua tor na kpaa la; er lu er a Libena kua tor na nahan kpaa.

⁴⁰ Kape Yosua hemba tar la cii la, tar u iwoogh man tar u Imbusutariyan la, man tar u delaa, man tar u soughsough, a utor vev cii; a shi ma or ga; kpa a tim ve ci ca cii, hanma kwagh u ôôn cii a tim ci ca cii er TER, Aôndo u Iserael, kaa yô.

⁴¹ Yosua hemba ve, hii hen Kadeshi-barnea zan zan ar hen Gasa, kua tar u Goshen cii, zan zan ar hen Gibeon.

⁴² Yosua ngohol utor mban cii kua tar ve icin i môm tsô, sha ci u TER, Aôndo u Iserael, nôngo ityav sha ci u Iserael yô.

⁴³ Tsô Yosua hide hen afo a hen Gilgal a Iserael cii.