Yona 2 - ICIGHAN BIBILO

¹ Tsô Yona sôn TER, Aôndo na, ken iyav mbu ishu.

² A kaa er: M yila TER ken ican yam ne, man A ungwa imo yam; m genger imo ken iyav mbu Sheol je, U ungwa imo yam kpaa.

³ Gadia U gbihim shin iv, shin sema u uzegembamngerev; mngerem ma saren avenge kasem tser; agôndoamnger a Ou man uiwuha Ou cii ve uvem.

⁴ Tsô m kaa mer: I gbihim sha ishigh You kera; nahan kpaa shi me kenger icighantempel wou.

⁵ Mngerem ma kpishim kasem je, ar hen uma wam; iv kasem tser; uidyagh kpelegh mo sha ityou.

⁶ M mire zan zan m ar shin atô a iwoogh; uishindan mba tar wuhem kera gbem sha won; nahan kpa U dugh uma wam shin ihungwa, TERE, Aôndo wam.

⁷ Zum u uma wam hume ken a mo yô, m umbur TER; msen wam kpaa za nyôr her a We ken icighantempel Wou.

⁸ Mba ve civir akombo a gbilinigh yô, ve undu Un u A zungu ve mhôônom la.

⁹ Kpa mo yô, me na U nagh sha imo i ishughun; kwagh u m tsegh zwa sha mi la yô, me er. Myom ka u TER je.

¹⁰ Tsô TER ôr kwagh a ishu la, nahan i za suwa Yona sha tar.