YOHANE 8 - ICIGHAN BIBILO

¹ Kpa Yesu unde sha uwo u Olev.

² Kper nan pepe pepe nahan Yesu shi va nyôr ken tempel, ior cii va her a Na; tsô A tema A gba tesen ve.

³ Tsô mbangeren man Mbafarishi za va a kwase u i kôr un a idya ave je yô, her a Na.

⁴ Mba va veren un her atô yô, ve kaa a Na er: Ortesen kwase ne i kôr un a idya i eren ave je;

⁵ man ken atindi yô, Mose wa se tindi er, i̱ wuan imba ne sha awen; We yô, U kaa imo You nana?

⁶ Ve kaa kwagh ne nahan sha u karen Un, sha u vea zua a ityôikaa i vea sende Un a mi yô. Kpa Yesu ngurum, nger kwagh hen inya sha hôwe.

⁷ Kpa mba zeren pinen Un zan zan yô, A naregh sha, A kaa a ve er: Or u ken a ven u nan lu a isholibo ga yô, nana̱ vande tan un iwen.

⁸ A shi a ngurum, A nger kwagh hen inya.

⁹ Mba ongo nahan yô, ve gba duen môm môm, hii sha orvesen la je, i undu Yesu tswen, kwase la yô, tile her.

¹⁰ Tsô Yesu naregh sha, A kaa a na er: Kwase, mban mba hana? Or môm kpaa na u ibo gaa?

¹¹ A kaa er: Mo je ga,Tere. Yesu kaa a na er: Mo kpaa M na u ibo ga; yem a you, man de kera shi eren isholibo ga.]

¹² Tsô Yesu shi gba ôron ve kwagh, kaan er: Mo M ngu iwanger i tar; or u nan dondo sha a Mo yô, nana zende ken ime ga, kpa nana lu a iwanger i uma.

¹³ Nahan Mbafarishi kaa a Na er: U ngu pasen kwagh Wou iyol You nahan mpase Wou ka u mimi ga.

¹⁴ Yesu gema kaa a ve er: Shin er M pasen kwagh Wam iyol Yam nahan kpaa, mpase Wam ka u mimi je; gadia M fa ape M dugh, man shi hen ape M lu zan la kpaa; kpa ne yô, ne fa ape M dugh man hen ape M lu zan la ga.

¹⁵ Ne yô, ne mba er ijir sha inja i iyolough, Mo yô, M er ma or ijir ga.

¹⁶ Man aluer Mea ôron ijir je kpaa, ijir Yam i ôron ka i mimi je, gadia M ngu tswen ga kpa ka Mo vea Un u A tindim la.

¹⁷ Ken atindi a en kpaa i nger er, shiada u ior ihiar ka u mimi je;

¹⁸ Mo M eren shiada sha kwagh Wam iyol Yam, man shi Ter u A tindim kpaa, eren shiada sha a Mo.

¹⁹ Tsô ve kaa a Na er: Nahan Teru ngu hana? Yesu gema kaa er: Ne fam ga, Terem kpaa ne fa Un ga; nea fem yô, ma ne fe Terem kpaa.

²⁰ Mkaanem man A ôr ken iyounyar zum u lu tesen ken tempel la. Nahan kpaa ma or kôr Un ga, sha ci u shighe Na lu a kuma ga yô.

²¹ Tsô Yesu shi kaa a ve er: Me yem, né kerem, kpa né kpe ken isholibo yen; hen ape Me za la, ne fatyô u zan ga.

²² Nahan Mbayuda kaa er: Una wua iyol Na, shinii? Gadia ngu kaan er: Hen ape Me za yô, ne fatyô u van ga.

²³ A kaa a ve er: Ne, ka shin ne lu ye; Mo yô, ka Sha M dugh ye; ne mba shin tar ne; Mo yô, M ngu u shin tar ne ga.

²⁴ Ka nahan man M kaa a ven Mer: Né kpe ken isholibo yen ye; gadia aluer ne na jighjigh ner, Mo M ngu Un ga yô, né kpe ken asorabo a en.

²⁵ Tsô ve kaa a Na er: We U ngu ana? Yesu kaa a ve er: Ka sha ci u nyi shi M̱ ôr kwagh a vene?

²⁶ M ngu a akaa kpishi a ma M er sha kwagh wen man a ma M er ijir sha mi kpaa, kpa Un u A tindim la ka u mimi je; ka akaa a M ongo her a Na je M er tar ye.

²⁷ Kpa ve kav er i lu kwagh u Ter A er ve ga.

²⁸ Nahan Yesu kaa er: Zum u nea kende Wan u or sha tsô né fa er M lu Un yô, man shi er M gbe eren ma kwagh sha tahav Av iyol Yam ga, kpa M er akaa er Ter a tesem yô.

²⁹ Un u A tindim la ngu a Mo; A undum tswen ga, gadia M eren akaa a doon Un gbem.

³⁰ Er lu ôron akaa ne nahan yô, ior kpishi na Un jighjigh.

³¹ Tsô Yesu kaa a Mbayuda mba ve na Un jighjigh la er: Aluer nea lu ken kwaghôron Wam zan zan yô, ne mba mbahenen Av mimi je;

³² man né fa mimi, mimi kpaa una pase ne una tuhwa.

³³ Ve gema ve kaa a Na er: Se mba tsombor u Aberaham je, man mayange je se mba a lu ikpan i or ga; er nan man U kaan Wer: á pase ne á tuhwa?

³⁴ Yesu gema kaa a ve er: Mimi mimi je, M kaan ne ne, hanma or u nan eren isholibo yô, nan ngu kpan u isholibo je.

³⁵ Kpan saan ken ya ga, ka wan a lu her gbem ye.

³⁶ Nahan aluer Wan Una pase ne Á tuhwa yô, i pase ne i tuhwa mimi je.

³⁷ M fa ne mba tsombor u Aberaham; nahan kpaa ne mba keren Mo a ku sha ci u kwaghôron Wam a zough a ian her a ven ga yô.

³⁸ Ka akaa a M nenge hen Terem la je M lu ôron kwagh sha mi ye; man ne kpaa ka di akaa a ne ongo hen ter wen la je ne lu eren ye.

³⁹ Ve gema ve kaa a Na er: Ter wase yô, ka Aberaham. Yesu kaa a ve er: Aluer ne mba ônov mba Aberaham yô, eren nen aeren a Aberaham.

⁴⁰ Kpa Mo u M lu Or u kaan ne mimi u M ongo her Aôndo ne yô, ne mba keren Mo a ku hegen; Aberaham er nahan ga.

⁴¹ Ne mba eren aeren a ter wen. Ve kaa a Na er: Se yô, ka sha idya i mar se ga; se mba a Ter môm tsô, ka Aôndo je.

⁴² Yesu kaa a ve er: Aôndo Una lu Ter wen yô, ma M doo ne ishima, gadia ka sha Aôndo je M dugh, M ve ye, gadia M gba van sha ishima Yam tsô ga, kpa ka Un je A tindim ye.

⁴³ Ka nyi ne kaven kwagh u M lu ôron a ven ne ga? Ka sha ci u ne fatyô u ungwan kwaghôron Wam ga yô.

⁴⁴ Ne yô, ka ken ter wen diabolo je ne dugh ye, man ka ne ka eren asaren a ter wen; un yô lu orwuanor sha hiihii je, man a tile sha mimi ga sha ci u mimi ngu ker a na ga. Ka una eren aie yô, i lu sha mlu na je a lu ôron kwagh ye; gadia ka or u aie shi ka ter u aie kpaa.

⁴⁵ Kpa Mo yô, er M er ne mimi yô, ne nam jighjigh ga.

⁴⁶ Ka an wen nana pasem isholibo Yama? Aluer ka mimi M lu ôron yô, ka nyi ne nem jighjigh ga?

⁴⁷ U nan dugh sha Aôndo yô, nan ongo mkaanem ma Aôndo; kape i lu man ne ongo ma ga la, sha ci u ne dugh her Aôndo ga yô.

⁴⁸ Mbayuda gema kaa a Na er: Kera ka sha mi je se kaan ser, U ngu Orsamaria man U ngu a jijingi u bo kpaa ye gaa?

⁴⁹ Yesu gema kaa er: M ngu a jijingi u bo ga, kpa M civir Terem, man ne gema ne mba lahan Mo.

⁵⁰ Kpa Mo M keren icivir sha ci Wam ga; Ugen ngu u A keren i sha ci Wam yô, shi Una ôr ijir kpaa.

⁵¹ Mimi mimi je, M kaan ne ne, aluer or nana wa kwaghôron Wam iko yô, mayange nana nenge a ku ashe ga.

⁵² Tsô Mbayuda kaa a Na er: Hegen yô, se fa U ngu a jijingi u bo; Aberaham kpe kua uprofeti kpaa; man We U ngu kaan wer: Aluer or nana wa kwaghôron Wam iko yô, nana bende a ku mayange ga.

⁵³ Shin U hemba ter wase Aberaham, u a kpe la icivir? Uprofeti kpaa kpe; U fe Wer, U ngu ana?

⁵⁴ Yesu gema kaa er: Aluer Mea civir iyol Yam yô, icivir Yam la ia lu a inja ga; ka Terem A civir Mo ye, Un u ne kaan ner, ka Aôndo wen la.

⁵⁵ Kpa ne fa Un ga; Mo yô, M fa Un; aluer Mea kaa Mer; M fa Un ga yô, ma M hingir oraie er ne nahan je; kpa M fa Un, shi M we kwaghôron Na iko kpaa.

⁵⁶ Ter wen, Aberaham, saan un iyol kpishi sha ci u una va nenge iyange Yam; a nenge a i je, a ember kpishi kpaa.

⁵⁷ Nahan Mbayuda kaa a Na er: U ngu a kuma anyom akunduahargber ga, nahan kpaa U nenge Aberahama?

⁵⁸ Yesu kaa a ve er: Mimi mimi je, M kaan ne ne, er i lu a mar Aberaham ga je, tsô Mo M lu.

⁵⁹ Nahan ve tôô awen er vea ta Un; kpa Yesu ôso teghelee kar due ken tempel kera.