YOHANE 6 - ICIGHAN BIBILO

¹ Ken masejime u akaa ne yô, Yesu per zegemnger u Galilia, per yande la, ka zegemnger u Tiberia je la.

² Ikpelaior kpishi cir Un ijime sha ci u ve nenge uivande mba A er sha mbauangev yô.

³ Tsô Yesu unde sha uwo za tema sha mi a mbahenen Nav.

⁴ Yô, Paseka, iniongo i Mbayuda la mgbôghom.

⁵ Tsô Yesu kenden ashe, nengen a ikpelaior kpishi van her a Na yô, A kaa a Filibu er: Sé yam ubredi han ve ior mban vea ya?

⁶ A kaa nahan, kpa lu karen un a kar, gadia Un iyol Na A fa kwagh u Una er yô.

⁷ Filibu gema kaa a Na er: Ubredi mba sha sule deri uhar je kpaa vea kuma sha u hanmô ve nana zua a mi kpuaa tsô kpaa ga.

⁸ Orhenen Na ugen, iti na er Anderia, anngô u Shimon Peteru, kaa a Na er:

⁹ Wanye ngu heen ngu a ubredi utaan mba i er sha shair yô, man shi ishu ihiar; angan ne tsô, aa kuma sha ikpelaior ne je kpa?

¹⁰ Kpa Yesu kaa er: Yôô nen ior ve̱ haa inya. Hen ijiir la adegh a toho lu kpishi. Nahan nomsombaiorov tema inya, iyenge ve lu er dubu utaan nahan.

¹¹ Tsô Yesu tôô ubredi mbala, sughun Aôndo yô, A tôô A kar mba ve tema inya la; shi er a ishu nahan kpaa, i na hanma or sha ishima i nan.

¹² Mba ye, ka kom ve cii yô, A kaa a mbahenen Nav er: Kohol nen avur a a shi la, sha er ma kwagh a̱ de saan ishe ga yô.

¹³ Tsô ve kohol a, ve iv akese pue kar ahar a avur a ubredi utaan mbala, a a hemba mba ve ya la.

¹⁴ Tsô ior mba nengen ivande i A er nahan la yô, ve kaa er: Mimi je, ngun ka profeti u i ongo er ngu van shin tar je ne.

¹⁵ Tsô er Yesu kav er ve sôôn u kôron Un sha apera, nan Un tor nahan yô, A shi A kar, A yem sha uwo, Un tswen.

¹⁶ Iyange i been yô, mbahenen Nav sen shin kpezegemnger,

¹⁷ za nyôr shin tsô, ve lu peren yande la u zan ken Kapernahum. Yô, ime vande wan kera ve, kpa Yesu lu a va her a ve ga.

¹⁸ Tsô zegemnger ngure kpianger sha ci u zegeahumbe lu hiar yô.

¹⁹ Mba nahan tso mba ze er umail utar shin unyiin nahan yô, ve nenge Yesu lu zenden sha zegemnger, kporom hen tso; tsô ve gba cian.

²⁰ Kpa A kaa a ve er: Ka Mo, de cie nen ga.

²¹ Tsô ve nyôr a Na ken tso nahan doo ve; fese nahan tso za ar sha tar u ve lu zan la kpaa.

²² Kper gen ikpelaior i i lu yande zegemnger la, nenge wantso ugen lu ker ga, saa di u môm la tsô, man Yesu yô nyôr a mbahenen Nav ken wantso la imôngo ga, kpa mbahenen Nav yem, ve tseegh.

²³ Kpa utso mbagenev za va ken Tiberia ikua ikua a ijiir i ve ya bredi er Ter vande sughun Aôndo kera la.

²⁴ Er ikpelaior nenge Yesu lu her ga, shin mbahenen Nav kpaa ga yô, ve kpaa ve nyôr ken utso, ve gba zan ken Kapernahum sha u za keren Yesu.

²⁵ Mba za zough a Na yande zegemnger yô, ve kaa a Na er: Rabi, ka hanma shighe U ve heene?

²⁶ Yesu gema kaa a ve er: Mimi mimi je, M kaan ne ne, ne mba keren Mo, ka sha ci u ne nenge uivande ga, kpa ka sha ci u mye u ne ye ubredi mbala, ve kom ne yô.

²⁷ De kera eren nen tom sha ci u kwaghyan u a saan ishe ga, kpa i̱ lu sha ci u kwaghyan u a lu zan zan uma u tsôron, u Wan u or Una na ne yô, gadia Aôndo Ter, ver ikav sha a Na.

²⁸ Tsô ve kaa a Na er: Nahan, sé er nyi ve á lu ityom i Aôndo se erene?

²⁹ Yesu gema kaa a ve er: Tom u Aôndo yô, ka u ne: Ka u ne na Un u A tindi Un la jighjigh.

³⁰ Tsô ve kaa a Na er: Ka nyi ivande U eren sha u sé nenge, se̱ na U jighjighi? Ka nyi tom U erene?

³¹ Uter asev lu ya mana ken taaikôngo; er i nger er: A na ve kwaghyan u a dugh Sha, ve ya.

³² Tsô Yesu kaa a ve er: Mimi, mimi je, M kaan ne ne, ka Mose man lu na ve kwaghyan u a dugh Sha la ga; kpa ka Terem A lu nan ne kwaghyan u mimi u a dugh Sha la ye.

³³ Gadia kwaghyan u Aôndo A ne yô, ka Un u A dugh Sha A ne tar uma la.

³⁴ Tsô ve ka a Na er: Tere, naan se kwaghyan ne gbem.

³⁵ Yesu kaa a ve er: Mo M ngu kwaghyan u uma; or u nana va her a Mo yô, ijen ia kera kôr nan mayange ga; man shi or u nana nam jighjigh yô, imura kpaa ia kera kôr nan mayange ga.

³⁶ Kpa M vande kaan a ven Mer: Ne nenge a Mo, nahan kpaa ne na jighjigh ga.

³⁷ Mba Ter A nem cii, vea va her a Mo; man or u nana va hen Mo kpaa, mayange Me ta nan kera ga.

³⁸ Gadia M sen Sha, ka sha u Me er ishima Yam ga, kpa ka u eren ishima i u A tindim la.

³⁹ Man ishima i u A tindim yô, ka i ne: Akaa a A nem la cii ma kwagh môm a̱ de saan Mo ga, kpa M̱ nder un sha iyange i masetyô.

⁴⁰ Gadia ishima i Terem ka i ne: Hanma or u nan nenge a Wan, shi nan ne Un jighjigh yô, nana̱ zua a uma u tsôron, man Mo kpaa Me nder nan sha iyange i masetyô.

⁴¹ Mbayuda gba ahon sha a Na, sha ci u A kaa er: Mo M ngu kwaghyan u a sen Sha yô.

⁴² Nahan ve kaa er: Ngun kera ka Yesu Wan u Yosev u se fe ter Na kua ngô Na kpaa ne gaa? Inja na nan man A kaan er: M sen Sha?

⁴³ Yesu gema kaa a ve er: De kera gban nen ahon ayol a en ga.

⁴⁴ Ma or nana fatyô u gban van her a Mo ga, saa Ter u A tindim la, Una urugh nan; man Mo kpaa Me nder nan sha iyange i masetyô.

⁴⁵ Ken uprofeti i nger er: Ve cii Aôndo Una tese ve. Hanma or u nan ongo kwagh shi nan hen kwagh hen Ter kpaa yô, nana va her a Mo.

⁴⁶ Ka u kaan er: Ma or nenge a Ter, ga; ka Un u A dugh sha Aôndo la tseegh A nenge a Ter ye.

⁴⁷ Mimi mimi je, M kaan ne ne, or u nan ne jighjigh yô, nan ngu a uma u tsôron.

⁴⁸ Mo M ngu kwaghyan u uma.

⁴⁹ Uter enev ya mana ken taaikôngo, kpa ve kpe.

⁵⁰ Ngun ka kwaghyan u a sen Sha je ne, sha er anti or u nana ya un yô, nana kera kpe ga yô.

⁵¹ Mo M ngu kwaghyan u uma u a sen sha la; aluer anti or nana ya kwaghyan ne yô, nana lu uma gbem sha won. Man kwaghyan u Me na yô, ka iyol Yam je, sha ci u uma u tar.

⁵² Nahan Mbayuda gba akperan ayol a ve, kaan er: Or ne Una er nan man Una fatyô u nan se iyol Na, sé ya?

⁵³ Yesu kaa a ve er: Mimi mimi je M kaan ne ne, aluer né yaan iyol i Wan u or, man shi né maan awambe a Na kpaa ga yô, né lu a uma ken ayol a en ga.

⁵⁴ Or u nan ye iyol Yam, shi nan me awambe Am yô, nan ngu a uma u tsôron; Me nder nan sha iyange i masetyô.

⁵⁵ Gadia iyol Yam ka kwaghyan u mimi je, awambe Am kpaa ka kwaghman u mimi je.

⁵⁶ U nan ye iyol Yam shi nan me awambe Am kpaa yô, nan ngu ken a Mo, Mo kpaa M ngu ken a nan.

⁵⁷ Er Ter u uma A tindim, man M lu uma ken Ter yô, kape or u nana yam kpaa nana lu uma ken a Mo la.

⁵⁸ Ngun ka kwaghyan u a sen Sha je ne; ka er uter enev lu ya mana, shi kpe la ga. U nan ye kwaghyan ne yô, nana lu uma gbem sha won.

⁵⁹ Akaa ne A ôr ken shinagoge er lu tesen ken Kapernahum la.

⁶⁰ Mbahenen Nav mbagenev kpishi er ve ungwa kwagh ne nahan yô, ve kaa er: Kwaghôron ne ngu ican je; ka an nana fatyô, u veren ato sha mini?

⁶¹ Kpa Yesu fe er mbahenen Nav lu unun shin iker sha kwagh la yô, A kaa a ve er: Kwagh ne na ne gbev mbu nôngonôô?

⁶² Man aluer nea nenge Wan u or Una kôndon Una yemen Sha, hen ape vande lun yô, á lu ne nana?

⁶³ Ka Jijingi A ne uma ye; iyol yô, ngi a inja sha ma kwagh ga. Mkaanem ma M er ne, ka jijingi man ka uma kpaa.

⁶⁴ Kpa mbagenev mba ker a ven mba ve ne jighjigh ga yô. Gadia sha hiihii je Yesu fa mba ve ne Un jighjigh ga, shi A fa un u una nenge Un mker la kpaa.

⁶⁵ Tsô A kaa er: Ka sha ci u nahan man M kaa a ven Mer: Ma or nana fatyô u van her a mo ga, saa Terem Una na nan.

⁶⁶ Hii hen shighe la je mbagenev kpishi ken mbahenen Nav hide ijime, ve kera za a Na ityô ga.

⁶⁷ Tsô Yesu kaa a mba pue kar uhar mbala er: Ne kpaa, ka ne ka yemene?

⁶⁸ Shimon Peteru gema kaa a Na er: Tere, ka hen an je shi sé zaa? Ka We U lu a mkaanem ma uma u tsôron ye.

⁶⁹ Man se yô, se na jighjigh shi se fa er We U ngu Icighan u Aôndo.

⁷⁰ Yesu gema kaa a ve er: M kera tsuwa ne pue kar uhar gaa? Man u môm ken a ven ka diabolo je.

⁷¹ A ôr kwagh ne sha Yuda, wan u Shimon Isekarioti u una nenge Un mker la, lu u môm ken mba pue kar uhar la je.