YOHANE 5 - ICIGHAN BIBILO

¹ Ken masejime u akaa ne yô, iniongo i Mbayuda igen i kuma, Yesu kpaa za sha Yerusalem.

² Ken Yerusalem hen Hundagar u Uile ityungu lu her, i yilan un ken zwa u Heberu er Beteseda, ayou lu her ataan.

³ Ken ayou la mbauangev lu keregh kpishi, lu mbaapirashe man mbakeer kua mbaumanalegh; [ve lu keghen mkpianger u mnger.

⁴ Gadia ortyom u Sha senen hen ityungu la sha ashighe ashighe, a va kpianger mngerem; nahan or u nana vande hungwan shimi zum u a kpianger mngerem la yô, nan war shin nan lu a nyityô uange kpaa.]

⁵ Orgen lu her, lu korkor anyom ikundugber kar anigheni.

⁶ Yesu nenge un yaven, shi fa er a tse uange kpaa yô, A pine un er: Sar u ka warenaa?

⁷ Oruange la gema kaa a Na er: Tere, m ngu a or u nana gbihim shin ityungu zum u ka a kpianger mngerem la ga; kpa ka mea nguren van yô, orgen nan vande hungwan a mo.

⁸ Yesu kaa a na er: Mough sha, tôô gambe wou, zende.

⁹ Or la maa hingir doo doo her aveghave la je, maa tôô gambe na, gba zenden. Iyange la lu iyange i memen.

¹⁰ Nahan Mbayuda kaa a or u i bee un angev la er: Nyian ka iyange i memen, nahan u u tôô gambe wou yô, ka sha mi ga.

¹¹ Kpa a gema a kaa a ve er: Un u A beem angev la, ka wen je A kaa a mo er: Tôô gambe wou zende, ye.

¹² Ve pine un er: Un shon u A kaa a we er: Tôô gambe wou, zende, la, ka anti?

¹³ Kpa or u i bee un angev la, a fa or la ga; gadia Yesu kar kera, sha ci u ikpelaior i lu hen ijiir la yô.

¹⁴ Ken masejime u akaa la Yesu kohol un ken tempel, kaa a na er: Nenge, i bee u angev, yô, de kera shi eren isholibo ga sha er kwagh u hemban vihin a̱ de eren we ga yô.

¹⁵ Or la za, za kaa Mbayuda er i lu Yesu man A bee un angev yô.

¹⁶ Ka sha kwagh ne man Mbayuda lu tôvon Yesu a ican sha ci u A er akaa ne sha iyange i memen yô.

¹⁷ Kpa A gema A kaa a ve er: Terem ngu eren tom her, Mo kpaa M ngu eren tom.

¹⁸ Ka sha ci u kwagh ne man Mbayuda hemba keren Un a ku ye, lu sha ci u A vihi iyange i memen tseegh ga, kpa A shi A yila Aôndo er Ter Na je, inja na yô, A fa er Un ngu er Aôndo nahan vough.

¹⁹ Nahan Yesu gema kaa a ve er: Mimi mimi je, M kaan ne ne, Wan Una fatyô u gban eren ma kwagh iyol Na ga, saa kwagh u A nenge Ter A eren la; gadia akaa a A eren la, Wan kpaa eren a nahan vough je.

²⁰ Gadia Wan doo Ter ishima, shi tesen Un akaa a A eren iyol Na la cii; man ityom i i hembe ingin kpaa Una tese Un sha er i̱ kpiligh ne iyol yô.

²¹ Gadia er Ter A nderen mbakpenev A ne ve uma nahan, kape Wan kpaa mba A we ishima u nan ve uma yô, A ne ve uma je la.

²² Gadia Ter kpaa er ma or ijir ga, kpa ijirôron cii A na sha ikev i Wan,

²³ sha er ior cii ve̱ civir Wan er ve civir Ter nahan. Or u nan civir Wan ga yô, nan civir Ter u A tindi Un la kpaa ga.

²⁴ Mimi mimi je, M kaan ne ne, or u nan ongo kwaghôron Wam man nan ne Un u A tindim la jighjigh yô, nan ngu a uma u tsôron, nan ngu van hen ijirôron kpaa ga, kpa nan due ken ku, nan nyôr ken uma ve.

²⁵ Mimi mimi je M kaan ne ne, shighe ngu van, a kuma hegen, u mbakpenev vea ungwa imo i Wan u Aôndo, man mba vea ungwa i yô, vea lu uma.

²⁶ Gadia er Ter A lu a uma ken iyol Na nahan, kape A ne Wan u lun a uma ken iyol Na kpaa la.

²⁷ Man shi A na Un tahav mbu ôron ijir sha ci u A lu Wan u or yô.

²⁸ Kwagh ne a̱ de kpiligh ne iyol ga, gadia shighe ngu van u mba ve lu shin iwar cii vea ungwa imo Na,

²⁹ vea due kpaa; mba ve lu eren akaa a dedoo, vea za ken mnder u uma, kpa mba ve lu eren ifer yô, vea za ken mnder u ijirôron.

³⁰ Mo yô, M fatyô u eren ma kwagh sha tahav Av iyol Yam ga. Er M ongo nahan, kape M er ijir kpaa la; man ijirôron Yam ka i mimi, gadia M keren u eren ishima yam ga, kpa ka ishima i Un u A tindim la.

³¹ Aluer Mea pasen kwagh Wam iyol Yam yô, mpase Wam la una lu u mimi ga.

³² Orgen u pasen kwagh Wam ngu, man M fa, mpase u A pasen kwagh Wam la ka sha mimi je.

³³ Ne tindi hen Yohane, un kpaa ka mimi la je a lu pasen kwagh sha mi ye.

³⁴ Mo yô, kwagh gbam a mpase u or nana pase kwagh Wam la ga; kpa M ngu kaan akaa a angan sha u á yima ne yô.

³⁵ Un yô lu imenger i yeghen i mondon iwanger kpaa, man doo ne u ember iwanger na la anyangem kpeghee.

³⁶ Kpa Mo M ngu a mpase u sha kwagh Wam u a hembe u Yohane la yô; gadia ityom i Ter A nem er M̱ kure i ne, ka ityom i M eren i ne je i lu pasen kwagh Wam er Ter A tindim ye.

³⁷ Ter u A tindim la kpaa A pase kwagh Wam. Mayange ne mba a ungwa imo Na ga, shin ne mba a nenge mluyol Na kpaa ga.

³⁸ Ne mba a kwaghôron Na ken asema a en gbem kpaa ga, gadia ne na Un u A tindi Un la jighjigh ga.

³⁹ Ne mba timen ken icighanruamabera sha ci u ne mba henen ner, ka sha a ve man né zua a uma u tsôron ye; yô, ka ve je ve pasen kwaghwam ye.

⁴⁰ Nahan kpaa ka ne ka van her a Mo sha er ne̱ zua a uma ga.

⁴¹ Kwagh gbam a civir i i dugh hen ior la ga.

⁴² Kpa M fa ne, ne mba a dooshima u Aôndo ken asema a en ga.

⁴³ Mo M va ken iti i Terem, kpa ne rumun Mo ga; aluer orgen nana va ken iti i nan iyol i nan yô, ka nan je né rumun nan ye.

⁴⁴ Ne er nan man ne na jighjigh, ne mba ne rumun icivir i her ayol a en la, kpa icivir i i dugh her Aôndo u A lu tswen yô, ne keren ga?

⁴⁵ De henen nen ner, Mo Me sende ne a Ter ga; ka Mose u ne veren ishima sha a na la je a lu senden ne ye.

⁴⁶ Gadia aluer nea ne Mose jighjigh yô, Mo kpaa ma ne nem jighjigh gadia ka kwagh Wam je a nger ye.

⁴⁷ Kpa aluer nea na uruamabera nav jighjigh ga yô, á er nan man né na kwaghôron Wam jighjigh?