YOHANE 21 - ICIGHAN BIBILO

¹ Ken masejime u akaa ne Yesu shi pase iyol Na hen mbahenen Nav hen zegemnger u Tiberia. Gbenda u A pase iyol Na yô, lu nahan:

² Ve cii ve lu her imôngo, lu Shimon Peteru man Toma, u i yilan un er Didimu la, man Natanael u a due ken Kana u Galilia la, man ônov mba Sebedeu, man shi mbahenen Nav uhar mbagenev kpaa.

³ Shimon Peteru kaa a ve er: Me za kôr ishu. Ve kaa a na er: Se kpaa, sé za a we imôngo. Tsô ve due, ve nyôr ken tso; hen tugh mbula cii ve kôr ma kwagh ga.

⁴ Sev mbu ngur aven yô, Yesu tile sha kpe u zegemnger; kpa mbahenen fa er i lu Yesu ga.

⁵ Tsô Yesu kaa a ve er: Mbayev, ne mba a ma kwaghyana? Ve gema ve kaa a Na er: Ei.

⁶ A kaa a ve er: Wa nen kper ken uwegh ku yanegh ku tsoogh, tsô né zua a mi. Tsô ve wa kper, man ve kera fatyô u kpelan un ga, sha ci u ishu i ngee yum yô.

⁷ Nahan orhenen u a doo Yesu Ishima la, kaa a Peteru er: Ka Ter je. Shimon Peteru ongo er i lu Ter je yô, a fiir ikondo, gadia lu idyelegh, a guusu shin zegemnger.

⁸ Kpa mbahenen mbagenev va shin wantso, gadia ve lu a kpetar ica ga, lu er aseva deri uhar nahan, ve gba kpelan kper a ishu.

⁹ Tsô mba dugh sha tar yô, ve nenge akausu her a ishu sha mi, kua bredi kpaa.

¹⁰ Yesu kaa a ve er: Pande nen ishu i ne ker hegen ne, va nen a mi.

¹¹ Shimon Peteru za kpela kper, due a mi sha tar, iv a uzegembaishuuv deri man akunduahargber kar utar; er i ngee nahan kpaa mayange kper ande ga.

¹² Yesu kaa a ve er: Va, va ya nen kwagh. Man mô u mbahenen cihi u pinen Un er: Ka We ana? ga; gadia ve fa er i lu Ter yô.

¹³ Tsô Yesu va, va tôô bredi, na ve, man ishu nahan kpaa.

¹⁴ Ngun ka mande u Yesu u sha kwa tar u A ande hen mbahenen Nav er A nder shin mbakpenev la.

¹⁵ Mba ye kwagh kera yô, Yesu kaa a Shimon Peteru er: Shimon, wan u Yona, M hemba doon we ishima a mbana? A kaa a Na er: Een, Tere, U fa er U doom yô. A kaa a na er: Koson Mo aniyôngov av.

¹⁶ A shi A pine un sha kwa har er: Shimon wan u Yona, M doo u ishima? A rumun er: Een, Tere, U fa er U doom yô, A kaa a na er: Kuran iyôngo Yam.

¹⁷ A pine un sha kwa tar er: Shimon, wan u Yona, M doo wee? Ishima vihi Peteru sha ci u a pin un sha kwa tar er: M doo wee, yô. Tsô a kaa a Na er: Tere, U fa akaa cii, U fa er U doom yô. Yesu kaa a Na er: Koson iyôngo Yam.

¹⁸ Mimi mimi je, M kaan we ne, zum u u lu iyev la, u zeren kwange iyol you, u zenden sha ishima you; kpa zum u ú va bee iyol yô, ú naregh ave, orgen nana zer u, nana za a we hen ape i doo u ga yô.

¹⁹ A ôr kwagh ne nahan lu sha inja i kuugh i una civir Aôndo a mi yô. Kaan ngun nahan yô, A kaa a na er: Dondo sha a Mo.

²⁰ Peteru gem yô, a nenge orhenen u a doo Yesu ishima la, dondo sha Na, ka un u lu yier Yesu sha ikum shighe u ve lu yan kwaghyan la, A pine Un er: Tere, ka an nana nenge U mkere?

²¹ Tsô Peteru nengen a na yô, a kaa a Yesu er: Tere, man ngun ye?

²² Yesu kaa a na er: Aluer ka ishima Yam sha u una lu zan zan Me kar van yô, ka nyi you i lu sha mi? We yô, gba dondon sha a Mo tsô.

²³ Nahan kwaghôron ne samber hen anmgbianev er orhenen ne una kpe ga. Kpa Yesu yan kaa a na er, una kpe ga ze, kpa er: Aluer ka ishima Yam sha u una lu zan zan Me kar van yô, ka nyi you i lu sha mini?

²⁴ Ka orhenen u a er shiada sha akaa angan je ne, shi a nger a kpaa ye; man se fa shiada na ka u mimi je.

²⁵ Shi akaa agen nga kpishi a Yesu er yô; aluer a nger a cii ser ser yô, beem er ityakerada i ma i nger yô, ma i nenger tar ne je.