YOHANE 20 - ICIGHAN BIBILO

¹ Tsô sha iyange i Lahadi la, Maria Magedalena va hen uwar la pepe, shi mgbeghôô, tsô a nenge i tôô iwen i sha uwar la kera.

² Nahan a gber ayem, a za hen Shimon Peteru man orhenen ugen u a doo Yesu ishima la, a za kaa a ve er: I dugh Ter ken uwar kera, man se fa henpe i ze ver Un ga.

³ Tsô Peteru due man orhenen ugen la kpaa, ve za hen uwar la.

⁴ Ve uhar ve gba yevese imôngo; orhenen ugen la kar Peteru, vande za aren hen uwar la.

⁵ Ngurum nengen ker yô, a nenge i ver akondo lu her kpa a nyôr ga.

⁶ Tsô Shimon Peteru u a lu van un ken ijime la kpaa va, kar nyôr ken uwar la, a nenge i ver akondo lu her.

⁷ Kpa adikpo u a lu Un sha ityou la, lu a akondo angara imôngo ga, kpa i lu ijiir igen kposo i hure un.

⁸ Tsô orhenen ugen u vande van hen uwar la, kpaa nyôr; nengen nahan yô, a na jighjigh je.

⁹ Gadia ve lu a kav icighanruamabera u a kaa er, Una nder shin mbakpenev keng la ga.

¹⁰ Nahan mbahenen mbala shi hide hen ya ve.

¹¹ Kpa Maria tile hen uwar la ken won, lu vaan. Ngur vaan yô, a ngurum a gbir ashe ken uwar,

¹² a nenge a mbatyomov mba Shaav uhar ve haa akondo a pupuu iyol, ve tema, u môm sha ityou, u môm shin angahar her ape ikom i Yesu i vande lun la.

¹³ Tsô ve kaa a na er: Kwase, ka nyi u vaa? a kaa a ve er: Ka sha ci u ve tee Terem kera yô, man m fa ijiir i ve za ver Un la ga.

¹⁴ Kaan nahan yô, a gema ashe ken ijime, a nenge Yesu tile her, kpa a fa er i lu Yesu ga.

¹⁵ Yesu kaa a na er: Kwase, ka nyi u vaa? U ngu keren ana? Kpa un lu er ka orsule, nahan a kaa a na er: Tere, aluer Wea tôô Un yô, kaam ape U za ver yô, m̱ za m̱ za tôô.

¹⁶ Yesu kaa a na er: Maria! A gema ishigh, a kaa a Na ken zwa u Heberu er: Raboni, inja na yô er: Ortesen.

¹⁷ Yesu kaa a na er: De benden Mo ave iyol ga, gadia M ngu a kôndo M yem sha Ter ga; kpa za hen anmgbianev Av, za kaa a ve wer: M ngu kôndon sha Terem man Ter wen, Aôndo wam man Aôndo wen kpaa.

¹⁸ Maria Magedalena za, za kaa mbahenen er un nenge a Ter, man er A ôr un akaa ne kpaa.

¹⁹ Tsô iyange i Lahadi la i been yô, man er hunda kpaa lu vingir ape mbahenen kohol sha ci u cian Mbayuda la yô, Yesu va va tile her atô ve, kaa a ve er: Bem a̱ lu sha a ven.

²⁰ Kaan nahan yô, A tese ve ave Na man ihan. Nahan mbahenen ember er ve nenge a Ter.

²¹ Tsô Yesu shi kaa a ve er: Bem a̱ lu sha a ven. Er Ter A tindim yô, Mo kpaa M ngu tindin ne nahan.

²² Kaan nahan yô, A fehe ve humbe, A kaa a ve er: Ngohol nen Icighan Jijingi.

²³ Aluer ne de ior asorabo a ve yô, i de ve a je ve; man aluer ne de ve asorabo a ve ga yô, i de ve a ga je ve.

²⁴ Kpa Toma, u môm ken mba pue kar uhar mbala, u i yilan un er Didimu la, lu a ve imôngo zum u Yesu va la ga.

²⁵ Tsô mbahenen mbagenev kaa a na er: Se nenge a Ter; kpa a kaa a ve er: Saa me nenge Un a ayol a ukusa la ken ave, man shi me za hôwe wam sha ajiir a ukusa, shi me za uwegh sha ihan Na me bende ga yô, mayange me na jighjigh ga.

²⁶ Ayange nga kar anigheni yô, mbahenen Nav shi kohol ker, Toma kpaa lu a ve. Tsô Yesu va er ihinda lu vingir, A va tile her atô A kaa er: Bem a̱ lu sha a ven.

²⁷ Tsô A kaa a Toma er: Naregh hôwe heen, nenge ave Am, shi naregh uwegh bendem ken ihan, de kera lu or u banen a jighjigh u nan ga, kpa lu or u nan jighjigh.

²⁸ Toma gema kaa a Na er: Terem man Aôndo Wam.

²⁹ Yesu kaa a na er: Ka sha ci u u nenge a Mo man u ne jighjigh yee? Saan mba ve nenge ga kpa ve ne jighjigh la iyol.

³⁰ Yesu er uivande mbagenev kpishi sha ishigh ki mbahenen Nav kpa i nger ve ken takerada ne ga,

³¹ kpa mban yô, i nger ve sha er ne̱ na jighjigh er Yesu A lu Kristu, Wan u Aôndo je yô, er ne̱ zua a uma ken iti Na er ne ne jighjigh yô.