YOHANE 18 - ICIGHAN BIBILO

¹ Yesu er akaa ne nahan yô, A due a mbahenen Nav, A per yande wanwagh u Kederon, ape sule u ikon lu, A nyôr ker a mbahenen Nav.

² Man Yuda u nengen Un mker la kpaa fa ijiir la, gadia Yesu kohol ker a mbahenen Nav keke.

³ Tsô Yuda zough a ikum i mbautyav man udugwer man upristi mba tamen man Mbafarishi yô, a va her a amenger man akagh a usu man ikav mbi utyav.

⁴ Kpa er Yesu fa akaa a á va er Un cii yô, A due A za kaa a ve er: Ka an ne kerene?

⁵ Ve gema ve kaa a Na er: Ka Yesu u Nasareti. A kaa a ve er: Mo ne. Yuda u nengen Un mker la kpaa, tile a ve her.

⁶ Tsô er A kaa a ve er: Mo ne, nahan ve hire ijime, ve gema ve gba inya.

⁷ Tsô Yesu shi pine ve er: Ka an ne kerene? Ve kaa er: Ka Yesu u Nasareti.

⁸ Yesu gema kaa er: M vande kaan ne Mer: Ka Mo je ne; yô, aluer ka Mo ne keren yô, de nen mban, ve̱ yem a ne vev.

⁹ Lu sha er kwaghôron u A kaa la a̱ kure sha mi vough er: Mba U nem mbala, mô ve môm saam ga.

¹⁰ Tsô Shimon Peteru lu a sanker, a tsuwa, a gber wanakiriki u zegepristi, a bugh un togh ku yanegh. Iti i wanakiriki la er Malku.

¹¹ Nahan Yesu kaa a Peteru er: Wa sanker wou ken var. Iyongo i Ter A nem yô, Me ma i gaa?

¹² Tsô ikum i mbautyav kua torutya u tamen man udugwer mba Mbayuda kôr Yesu, kange,

¹³ ve vande zan a Na hen Ana; gadia a lu terkem u Kayafa je, u a lu zegepristi hen inyom la yô.

¹⁴ Ka Kayafa shon u a na Mbayuda mhen er, doo u or môm nana̱ kpe sha ci u nongoior la.

¹⁵ Tsô Shimon Peteru dondo Yesu ijime kua shi orhenen ugen. Orhenen ugen la yô, zegepristi fa un; nahan a nyôr ken tembe u zegepristi la a Yesu imôngo.

¹⁶ Kpa Peteru yô, tile sha hunda ken won. Nahan orhenen ugen u zegepristi fa un la, due ken won, za ôr kwagh a kwase u kuran hunda la, nahan a nyôr a Peteru.

¹⁷ Tsô wankwase u kuran hunda la, pine Peteru er: We kpaa, u ngu ken mbahenen mba Or nee? A kaa er: Mo ze.

¹⁸ Tsô mbatomov man udugwer tôô aka wa usu sha mi ve tile ve lu ôson, gadia wuhe kôr. Peteru kpaa tile a ve, lu ôson usu.

¹⁹ Nahan zegepristi pine Yesu sha kwagh u mbahenen Nav kua ityesen Na kpaa.

²⁰ Yesu gema kaa a na er: M ôr tar kwagh gbar gbar; man shi M tesen ken shinagoge man ken tempel keke je, ape Mbayuda cii ve kohol la, ken myer yô, M ôr ma kwagh ga.

²¹ Inja na nan u pinimi? Pine ase mbala mba ve ongo kwagh u M er ve, nenge mban ve fa akaa a M er la.

²² Kaan akaa ne nahan yô, dugwer ugen u a tile her la, ta Yesu sambe, kaa er: Kape U er kwagh a zegepristi nee?

²³ Yesu gema kaa a na er: Aluer Mea ôr kwagh dang yô, ma u pase kwagh shon la; kpa a lu sha mi yô, ka nyi u tem samba?

²⁴ Tsô Ana tindi i̱ za a Na uikangen hen Kayafa, zegepristi la.

²⁵ Shimon Peteru yô, tile, lu ôson usu. Tsô ve kaa a na er: We kpaa u ngu ken mbahenen Nava? A nyiman, a ka er: Mo ze.

²⁶ Wanakiriki ugen u zegepristi lu anmgbian u or u Peteru a bugh un togh la kaa er: M nenge a we ken sule la a Na imôngo gaa?

²⁷ Tsô Peteru shi gba nyiman; fese nahan ikegh maa tôngo.

²⁸ Nahan ve mough a Yesu hen Kayafa, ve nyôr a Na ken ya u gomna; lu pepe je; kpa ve ayol a ve yô, ve nyôr ken ya u gomna la ga, sha u ve̱ de hôngor ayol a ve ga, sha u vea fatyô u za yan Paseka yô.

²⁹ Tsô Pilatu due za her a ve, za pine ve er: Ka nyi ityôikaa ne ve a mi sha Or nee?

³⁰ Ve gema ve kaa a na er: Or ne Una lu or u ifer ga yô, ma se ve a Na her a we ga.

³¹ Nahan Pilatu kaa a ve er: Kua nen a Na, za ôr nen Un ijir sha atindi a en. Mbayuda kaa a Na er: Tindi rumun se u wuan or ga;

³² lu sha er kwaghôron u Yesu lu ôron sha inja i kuugh i Una kpe la yô, una kure sha mi vough yô.

³³ Tsô Pilatu shi nyôr ken ya u gomna, yila Yesu, kaa a Na er: U ngu tor u Mbayuda?

³⁴ Yesu gema kaa er: U gba kaan ngun iyol you tsô, shin ka mbagenev ve kaa u kwagh Wam nahana?

³⁵ Pilatu gema kaa er: Mo m ngu Oryudaa? Ka nongo Wou man upristi mba tamen ve ne U sha ikev yam ye; ka nyi U ere?

³⁶ Yesu gema kaa er: Tartor Wam ka u shin tar ne ga. Tartor Wam ua lu u shin tar ne yô, mbayev Av ma ve nenge ityav sha u i̱ de nem sha ikev i Mbayuda ga yô; kpa hegen yô, tartor Wam ka u heen ga.

³⁷ Tsô Pilatu kaa a Na er: Nahan U ngu tor zee? Yesu gema kaa er: U kaa sha mi, M ngu tor. Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye. Hanma or u nan lu or u mimi yô, nan ongo imo Yam.

³⁸ Pilatu kaa a Na er: Ka nyi i lu mimi? Kaan nahan yô, a shi a due, a za hen Mbayuda, a za kaa a ve er: M zua Un a ma kwaghbo ga.

³⁹ Kpa sha ieren yen yô, ka m dugh ne orkwar môm sha shighe u Paseka. Ka ne ka m̱ dugh ne tor u Mbayuda?

⁴⁰ Tsô ve shi ve gba geren imo, kaan er: Or ne ga, i̱ lu Baraba! Baraba yô, lu or u numun gbenda.