YOHANE 16 - ICIGHAN BIBILO

¹ Akaa ne M ôr ne sha er de nenge nen gbev ga yô.

² Vea dugh ne ken ushinagoge kera; shighe ngu van je u hanma or u nana wua ne yô, nana hen er nan ngu eren tom u civir Aôndo.

³ Akaa angan vea er sha ci u ve fe Ter ga, Mo kpaa ve fem ga yô.

⁴ Kpa akaa angan M ôr ne sha er zum u shighe u a una va kuma yô, né umbur a er M kaa ne a yô; kpa akaa ne yô, M kaa ne a sha hiihii la ga, sha ci u M lu a ven her yô.

⁵ Kpa hegen yô, M ngu zan hen Un u A tindim la nahan kpaa mô wen môm nan pinim er: U ngu zan hana? ga.

⁶ Kpa sha ci u M er ne akaa ne yô, asema vihi ne, kondo je.

⁷ Kpa ka mimi je M kaa ne ye Mer: Ka ne a inja u Me yem yô; gadia aluer Me yem ga yô, Orsurunshima Una va her a ven ga. Kpa aluer Me yem yô, Me tindi ne a Na.

⁸ Zum u Una va yô, Una pase tar kwagh u isholibo man kwagh u perapera kua u ijirôron kpaa;

⁹ sha kwagh u isholibo yô, ka sha ci u ve nem jighjigh ga yô;

¹⁰ sha kwagh u perapera yô, ka sha ci u M lu yemen hen Ter, né kera nenge a Mo ga yô;

¹¹ sha kwagh u ijirôron yô, ka sha ci u i er tor u tar ne ijir yô.

¹² Akaa shim kpishi a ma M er ne yô, kpa ne kôr a cio hegen ga.

¹³ Kpa zum u Un, Jijingi u mimi la, Una va va yô, Una hemen ne Una za a ven ken mimi cii; gadia Una gba ôron kwagh sha tahav Nav ga, kpa nyityô kwagh i Una ungwa yô, ka i je Una ôr ye, shi Una pase ne akaa a a lu van ken hemen la kpaa.

¹⁴ Un yô, Una nam icivir gadia ka kwagh Wam Una tôô Una ôr ne ye.

¹⁵ Akaa a Ter A lu a mi ci ca cii ka a Am je; ka nahan man M kaa Mer, ka kwagh Wam Una tôô Una ôr ne ye.

¹⁶ Shi kpuaa tsô né kera nenge a Mo ga; shighe shi una karen kpuaa yô, né nenge a Mo.

¹⁷ Tsô mbahenen Nav mbagenev kaa ayol a ve er: Kwagh u A kaa se er: Shi kpuaa tsô né kera nenge a Mo ga; shighe shi una karen kpuaa yô, né nenge a Mo; man shi: Ka sha ci u M lu yemen hen Ter yô, nahan inja na ka nana?

¹⁸ Nahan ve kaa er: Ka nyi man A kaa er: Shi kpuaa? Se fa kwagh u A kaa ne ga.

¹⁹ Yesu kav er i lu ve pe pinen Un yô, tsô A kaa a ve er: Ne mba pinen ayol a en sha kwagh u M kaa ne Mer: Shi kpuaa, tsô né kera nenge a Mo ga, man shighe shi una karen kpuaa yô, né nenge a Mo yôô?

²⁰ Mimi mimi je, M kaan ne ne, né va vaa, né zungwe kpaa tar yô, ua ember; asema aa vihi ne kpishi, kpa asema a vihin a en la aa gema á hingir ne iember.

²¹ Shighe u kwase ka nana maren yô, ishima i vihi nan sha ci u shighe u nan a kom yô; kpa nana maren kera yô, nan kera umbur ican i nan la ga, sha ci u iember i i mar or shin tar ne yô.

²² Nahan ne kpaa, asema nga vihin ne hegen, kpa Me shi Me nenge a ven, nahan asema a en kpaa aa ember, ma or kpaa nana bunde ne iember yen ga.

²³ Man sha iyange la né kera pinem ma kwagh ga. Mimi mimi je, M kaan ne ne, nyityô, kwagh i ne sôn Ter yô, Una na ne i ken iti Yam.

²⁴ Zan zan hegen ne mba a sôn kwagh ken iti Yam ga. Sôn nen, né ngohol, sha u iember yen ia hôm yô.

²⁵ Akaa ne M ôr ne sha anzaakaa; shighe ngu van u Me kera ôr ne kwagh sha anzaakaa ga yô, kpa Me pase ne kwagh u Ter gbar gbar.

²⁶ Sha iyange la né sôn ken iti Yam, kpa u kaan Mer, Me sôn Ter sha ci wen yô, M kaa ga,

²⁷ gadia Ter iyol Na kpaa, ne doo Un ishima tsung, sha ci u M doo ne ishima, man shi ne ne jighjigh er M dugh hen Ter yô.

²⁸ M due hen Ter M va shin tar ne; shi Me undu tar ne, Me yem hen Ter.

²⁹ Mbahenen Nav kaa a Na er: Eheen, hegen U ngu ôron se kwagh gbar gbar, kera ka injakwagh U lu ôron ga.

³⁰ Hegen se fa U fa akaa cii, kera gba U u ma or nana pine U kwagh ga, ka nahan je man se ne jighjigh er U dugh her Aôndo ye.

³¹ Yesu gema kaa a ve er: Ne mba nan jighjigh hegenee?

³² Nenge, shighe ngu van, a ar je ve u á sambe ne, hanma or nana yem kwagh u nan, né mase undun Mo tswen; nahan kpaa M ngu tswen ga, gadia Ter ngu vea Mo.

³³ Akaa ne M ôr ne sha u né lu a bem ken a Mo yô. Shin tar ne yô, ican ngi eren ne; kpa taver nen asema, Mo M hemba tar ne.