YOHANE 15 - ICIGHAN BIBILO

¹ Mo M ngu kon u wain u mimi, Terem ka orshiren.

² Hanma gbaa u ker a Mo u a um ga yô, ka A kar a mi sha; man shi hanma gbaa u a um yô, ka A sôr un sha er una shi á hemba umen atam yô.

³ Hegen je kpaa ne mba wang sha ci u kwaghôron u M er ne la.

⁴ Luun nen ken a Mo, Mo kpaa Me luun ken a ven. Er gbaa iyol na una fatyô u umen ga, saa una luun ken kon u wain, kape ne kpaa, saa né luun ken a Mo la.

⁵ Mo M ngu kon u wain, ne mba agbaa; or u nan luun ken a Mo Mo kpaa M luun ken a nan yô, ka nan ume atam kpishi; gadia a lu Mo ga yô, ne fatyô u eren ma kwagh ga.

⁶ Or ka nana luun ken a Mo ga yô, i gbihi nan kera er gbaa nahan, nan uma je; i kohol a, i nande sha usu, a hia.

⁷ Aluer ne luun ken a Mo, man mkaanem Am maa luun ken a ven yô, nyi ityôkwagh i i sar ne kpaa, sôn, nen, á er ne i.

⁸ Ka kwagh ne a ne Terem icivir ye, ka u ne ume atam kpishi la, man ne hingir mbahenen Av ye.

⁹ Er M doo Ter ishima, nahan kape ne kpaa, ne doom ishima la; luun nen ken dooshima wam ne.

¹⁰ Aluer ne wa atindi Am iko yô, né lu ken dooshima Wam; er Mo kpaa M we atindi a Terem iko, man M luun ken dooshima Na nahan.

¹¹ Akaa angan M ôr ne sha er iember Yam i̱ lu ken ven, iember yen i̱ hôm kpaa yô.

¹² Ka tindi Wam u M we ne ne, doo nen ayol a en, er ne doom ishima nahan.

¹³ Or ngu a dooshima u a hembe ngun ga, je u or nana gbihi uma u nan sha ci u akar a nan.

¹⁴ Aluer ne eren kwagh u M we ne tindi sha mi yô, ne mba akar Am je.

¹⁵ M kera yila ne Mer ikpan ga, gadia kpan fe kwagh u ter na a eren ga; kpa M yila ne Mer, akar, gadia akaa a M ongo hen Terem cii, M ôr ne a.

¹⁶ Ka ne ne tsoughom ga, kpa ka Mo je M tsough ne ye; man M ver ne sha er né za, né za ume atam yô, atam a en kpaa a̱ luun zan zan, sha er nyi ityôkwagh i ne sôn Ter ken iti Yam yô, Una er ne i.

¹⁷ Akaa ne M ngu wan ne tindi sha mi, sha er ne̱ doo ayol a en yô.

¹⁸ Aluer tar ua kôr ne ihom yô, fa nen u vande kôron Mo ihom je er u lu a kôr ne ihom ga yô.

¹⁹ Aluer nea lu ior i tar ne yô, ma ne lu kwagh u tar jim, ma ne doo tar ishima; kpa er ne lu ior i tar ne ga, Mo M gem M tsough ne shin tar ne kera yô, ka nahan man tar u ker ne ihom ye.

²⁰ Umbur nen kwaghôron u M ôr ne la Mer: Wanakiriki hembe Ter na icivir ga; lu vea tôvom a ican yô, ne kpaa vea tôv ne a ican je; lu vea wa kwaghôron Wam iko yô, u wen kpaa vea wa un iko.

²¹ Kpa akaa ne cii vea er ne a sha ci u iti Yam sha ci u ve fe Un u A tindim la ga yô.

²² Aluer Mea ve, Mea va er ve kwagh ga yô, ma ve lu a isholibo ga; kpa hegen yô, mba a ityôikaa i ôron sha isholibo ve ga.

²³ U nan kerem ihom yô, nan kôr Terem ihom kpaa.

²⁴ Aluer Mea eren ityom her a ve i mô gen nan er ga yô, ma ve lu a isholibo ga; kpa hegen yô, ve nenge i, shi ve kôrom ihom kua Terem kpaa.

²⁵ Kpa i er kwagh ne sha er kwagh u i nger ken atindi a ve la, a̱ kure sha mi vough er: Ve kôrom ihom lu sha ityôikaa ga.

²⁶ Kpa Orsurunshima u Me tindi ne a Na hen Ter, ka Jijingi u mimi u A dugh ken Ter je la, Una va yô, ka Un je Una pase kwagh Wam ye.

²⁷ Man ne kpaa, né pasen kwagh Wam sha ci u ne lu a Mo sha hiihii je yô.