YOHANE 13 - ICIGHAN BIBILO

¹ Tsô er iyange i iniongo i Paseka lu a kuma ga la er Yesu fa shighe Na kuma u Una due shin tar ne, Una yem hen Ter yô, er ior Nav mba ve lu shin tar ne ve doo Un ishima zan zan ar sha mkur je.

² Mba tem mba gbe yan iwer yô, diabolo vande wan Yuda Isekarioti, wan u Shimon kwagh er a̱ nenge mker sha a Na

³ er Yesu A fe er Ter gema akaa cii wa Un sha ikev man shi er A fe er Un due hen Aôndo, shi Una za sha Aôndo yô,—

⁴ A mough hen kwaghyan, A er ikav mbi iyolough kera, a tôô ikondo i esen iyol, A zer;

⁵ tsô A ker mngerem shin tasa, A gba ôôn mbahenen Nav angahar, shi esen a sha ikondo i A zer shin iwenge la.

⁶ Nahan A va hen Shimon Peteru; Peteru kaa a Na er: Tere, Ú ôôm angaharaa?

⁷ Yesu gema kaa a na er: Kwagh u M eren ne, u fa un hegen ga, kpa ú va kav un ken hemen.

⁸ Peteru kaa a Na er: Mayange mayange Ú ôôm angahar ga. Yesu gema kaa a na er: Aluer Mea ôô u ga yô, kwagh zua u a Mo ga.

⁹ Shimon Peteru kaa a Na er: Yô Tere, ka angahar am tseegh ga, kpa ka ave man ityough kpaa.

¹⁰ Yesu kaa a na er: Or u i ee nan iyol kera yô, kera gba u nan a ôô iyol ga, saa angahar tseegh; gadia nan ngu wang cii. Ne yô, ne mba wang, kpa ka ne cii ga.

¹¹ Gadia A fa un u una nenge mker sha a Na la, kape i lu man A kaa er: Ka ne cii ne lu wang ga la.

¹² Ee ve angahar hee akondo Na, hir tem inya yô, A kaa a ve er: Ne kav kwagh u M er ne ne kpa?

¹³ Ne mba yerem ner: Ortesen man Ter kpaa; ne mba kaan sha mi, gadia kape M lu la.

¹⁴ Yô, aluer Mo u M lu Ter man Ortesen, M ôô ne angahar yô, nahan ka u ne kpaa ne ôô ayol a en angahar nahan keng.

¹⁵ Gadia M ver ne ikav i tesen sha er ne kpaa er nen er M er ne nahan.

¹⁶ Mimi mimi je, M kaan ne ne, wanakiriki hembe ter na icivir ga, ortyom kpaa hembe un u a tindi un la icivir ga.

¹⁷ Aluer nea fa akaa ne, man nea eren sha mi yô, á saan ne iyol.

¹⁸ Ka ne cii M kaan ga; M fa mba M tsough ve yô; kpa ka sha er icighanruamabera Una kure sha mi vough yô er: Ka or u nan ye kwagh a Mo ikagh i môm je nan tumum angahar iyol ye.

¹⁹ Hii hegen je, M ngu kaan ne, er i lu a kuma ga ne, sha er á va kuma yô, né na jighjigh ner, ka Mo Un je ne yô.

²⁰ Mimi mimi je M kaan ne ne, or u nan rumun hanma or u M tindi yô, nan ngu rumun Mo; man u nan rumun Mo yô, nan ngu rumun Un u A tindim la kpaa.

²¹ Yesu er akaa ne nahan yô, ishima gba tan Un kwe, tsô A pase A kaa er: Mimi mimi je M kaan ne ne, u môm ken a ven nana nengem mker.

²² Mbahenen gba kenger ayol a ve, henen ken asema sha or u A teren nan yô.

²³ Orhenen Na ugen yier Yesu sha ikum, lu un u a doo Yesu ishima je la,

²⁴ tsô Shimon Peteru welegh un, kaa a na er: Pine or u A teren la.

²⁵ Ngula yier Yesu sha ikum, tsô a pine Un er: Tere, ka ana?

²⁶ Tsô Yesu gema kaa er: Ka u Me civ ivurugh ki kwaghyan Me na nan la. Nahan civin ivurugh ki kwaghyan la yô, A kende, a na Yuda, wan u Shimon or u Isekarioti la.

²⁷ Ngohol ivurugh ki kwaghyan la yô, Satan maa nyôr ker a na. Tsô Yesu kaa a na er: Kwagh u i lu u pe eren yô, er fefa.

²⁸ Mô ve môm ken mba ve kase her la fa er i hii man A kaa un kwagh ne nahan ga.

²⁹ Gadia mbagenev lu henen er, ka sha ci u Yuda a tilin ikpanyar man Yesu kaa a na er: Yam akaa a a gbe se sha iniongo yô, shin a̱ na mbaatsanev ma iwua.

³⁰ Un kpaa, ngohol ivurugh ki kwaghyan la yô, maa a due fefa, lu tugh je.

³¹ Tsô er a due kera yô, Yesu kaa er: Hegen je i na Wan u or icivir, i shi i na Aôndo icivir ker a Na kpaa.

³² Aluer Aôndo zua a icivir ken a Na yô, Aôndo Una na Un icivir fefa je.

³³ Ne mbayev Av mba kiriki, Me mase lun a ven anshighe kpeghee, né kerem, kpa er M kaa a Mbayuda Mer, hen ape Me za, ne fatyô u van ga la, kape m kaan ne hegen kpaa je ne.

³⁴ M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la.

³⁵ Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.

³⁶ Shimon Peteru kaa a Na er: Tere, Ú za hana? Yesu gema kaa a Na er: Hen ape Me za la, u fatyô u dondon sha a Mo hegen ga; kpa iyange igen yô, ú dondo sha a Mo.

³⁷ Peteru kaa a Na er: Tere, er nan man Me fatyô u dondon sha a We hegen ga? Me na uma wam sha ci Wou je.

³⁸ Yesu gema kaa er: Ú na uma wou sha ci Wama? Mimi mimi je M kaan we ne, nomikegh una lu a tôngo ga je tsô ú nyiman kwa tar je wer, u fam ga.