YOHANE 11 - ICIGHAN BIBILO

¹ Tsô orgen gba angev, lu Lasaru u ken Betani, wangar u Maria man anngô na Marta.

² Ka Maria u a shighe Ter mkurem, shi a ese Un angahar sha ice na la; ka un man anngô na Lasaru gba angev ye.

³ Tsô ve anngôôv mba kasev mbala ve tindi loho her a Na, ve kaa er: Tere, un u a doo U ishima la gba angev.

⁴ Yesu ongo nahan yô, A kaa er: Angev mbun ka mbu kuugh ga, kpa mbu sha ci u icivir i Aôndo sha er i̱ civir Wan u Aôndo sha mbu yô.

⁵ Marta man anngô na u kwase kua Lasaru ve doo Yesu ishima,

⁶ Zum u A ungwa er a gba angev nahan yô, A shi A tsa her ape A lu la ayange ahar.

⁷ Tsô ken masejime la, A kaa a mbahenen Nav er: Shi se yem nen ken Yudia.

⁸ Mbahenen kaa a Na er: Rabi, ayange a Mbayuda ve nenge u tan We awen la, nga a ngee ga, man U shi U za ker yee?

⁹ Yesu gema kaa er: Ahwa kera nga pue kar ahar sha iyange i môm gaa? Aluer or nana zenden atetan yô, nana ta nguhar kera ga, sha ci u nan nengen a iwanger i tar ne yô.

¹⁰ Kpa aluer or nana zenden tugh yô, nana ta nguhar kera sha ci u iwanger i lu ken a nan ga yô.

¹¹ A ôr akaa ne; tsô A kaa a ve er: Huror wase Lasaru ngu yaven, kpa Me za me za nder un.

¹² Nahan mbahenen kaa a Na er: Tere, aluer una lu yaven yô, una war.

¹³ Kpa Yesu ôr, lu sha ku na; kpa ve yô, ve lu henen er ngu ôron kwagh u mmem u sha mnya.

¹⁴ Nahan Yesu kaa a ve gbar gbar er: Lasaru kpe.

¹⁵ Man M gema M ember sha ci wen er M lu her ga yô, sha er né na jighjigh yô. Nahan kpaa, se za nen her a na.

¹⁶ Tsô Toma u i yilan un er Didimu la, kaa a mbahenen mbagenev er: Se kpaa sé za, se za kpe nen a Na imôngo.

¹⁷ Tsô Yesu va nôôr yô, A kav er atse shin uwar i kom ayange anyiin yô.

¹⁸ Betani lu ikua a Yerusalem, kuma er umail uhar nahan.

¹⁹ Mbayuda kpishi vande van hen Marta man Maria sha u va yaren ku u anngô ve la.

²⁰ Tsô Marta ongo er Yesu va yô, a due a za kegh Un gbenda; kpa Maria yô, hira lu hen ya.

²¹ Tsô Marta kaa a Yesu er: Tere, Wea lu heen yô, anngôm ma a kpe ga;

²² kpa m fa hegen kpaa nyityô kwagh i U sôn Aôndo yô, Aôndo Una na U je.

²³ Yesu kaa a Na er: Anngôu una nder.

²⁴ Marta kaa a Na er: M fa, una nder sha mnder u sha iyange i masetyô la.

²⁵ Yesu kaa a na er: Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma.

²⁶ Man anti or u nan lu uma man nan nem jighjigh yô, nana kpe mayange ga. U na kwagh ne jighjigh kpa?

²⁷ A kaa a Na er: Een Tere, M vande nan jighjigh kera je mer, We U ngu Kristu, Wan u Aôndo u A lu van shin tar ne.

²⁸ Kaan nahan yô, a due, a za yila anngô na Maria a kaa a na ken myer er: Ortesen ngu heen man ngu yilan we.

²⁹ Ongo nahan yô, a mough fese, a za her a Na.

³⁰ Yesu yô, lu a nyôr ken wangar la ga, kpa hira lu hen ape Marta za kohol Un la.

³¹ Tsô Mbayuda mba ve lu a na ken iyou ve lu yaren ku la mba nengen Maria moughon fese, dugh yô, ve dondo un ijime, ve lu henen er, ngu zan hen uwar sha u za vaan her.

³² Tsô Maria va nôôr hen ape Yesu lu, nengen a Na yô, a gba inya hen angahar a Na, a kaa er: Tere, Wea lu heen yô, anngôm ma a kpe ga.

³³ Tsô Yesu nengen un vaan, shi Mbayuda mba ve va a na kpaa lu vaan, nahan sôô Un ken ishima, ishima ta Un kwe kpaa.

³⁴ Tsô A pine er: Ne ver un hana? Ve kaa a Na er: Tere, va va nenge.

³⁵ Yesu vaa.

³⁶ Tsô Mbayuda kaa er: Nenge er a doo Un ishima yum yô.

³⁷ Kpa mbagenev ken a ve kaa er: Un u A bugh orapirashe ashe ne, A kera fatyô u eren er or ne ma a kpe ga yô, gaa?

³⁸ Er i shi i sôô Yesu ken ishima nahan yô, A va hen uwar, lu bar u iwen, shi iwen igen cir sha mi.

³⁹ Yesu kaa er: Tôô nen iwen ne kera. Marta, anngô u orkpen la, kaa a Na er: Tere, una huma hegen, gadia ayange a kuugh na nyian ka anyiin je.

⁴⁰ Yesu kaa a na er: M vande kaan we Mer: Aluer wea na jighjigh yô, u nenge icivir i Aôndo gaa?

⁴¹ Tsô ve tôô iwen la kera. Yesu kende ashe sha kaa er: Tere, M sugh U er U ongom yô;

⁴² kera je kpaa M fa er U ongom keke yô, kpa ka sha ci u ikpelaior i i kasem heen ne man M kaan nahan ye, sha u ve̱ na jighjigh er i lu We U tindim yô.

⁴³ Er akaa ne nahan yô, A yila genger genger er: Lasaru, due ken won!

⁴⁴ Tsô un u a kpe la due a ikangenev sha ave man shin angahar shi i kange un ishigh sha adikpo. Yesu kaa a ve er: Sagh nen un, a̱ yem.

⁴⁵ Nahan ior kpishi ken Mbayuda mba ve va hen Maria mba nengen kwagh u A er la yô, ve na Un jighjigh.

⁴⁶ Kpa mbagenev her a ve yem hen Mbafarishi, za ôr ve akaa a Yesu A er la.

⁴⁷ Tsô upristi mba tamen man Mbafarishi ve zua mkohol, ve kaa er: Se er nana, gadia Or ne ngu eren uivande kpishi.

⁴⁸ Aluer se de Un u zan hemen nahan yô, ior cii vea na Un jighjigh, nahan Mbaromanu vea va, vea va ngohol ijiir yase ne kua nongo wase kpaa.

⁴⁹ Tsô u môm ker a ve iti na er Kayafa, u a lu zegepristi ken inyom la yô, kaa a ve er: Ne fa ma kwagh môm ga,

⁵⁰ ne kera kav kpaa ga er á lu ne a inja u or môm nana kpe sha ci u nongoior ne sha u ikurior ne cii i̱ de timin ga yô.

⁵¹ Kpa a gba ôron kwagh ne iyol na tsô ga, kpa ka er un lu zegepristi ken inyom la yô, a tsengaôron er Yesu Una kpe sha ci u ikurior la.

⁵² Kpa ka sha ci u ikurior la tseegh ga, ka sha u Una kohol ônov mba Aôndo mba ve sambe sha won ve̱ lu kwagh môm yô.

⁵³ Hii sha iyange la je ve gba henen er vea er man vea wua Un yô.

⁵⁴ Tsô Yesu kera zende ken igbar hen Mbayuda ga, kpa A mough heregh, A yem ken tar u u lu a taaikôngo ikua ikua yô, A za nyôr hen gar ugen u i yilan er Eferaim, A tema ker a mbahenen Nav.

⁵⁵ Tsô Paseka u Mbayuda mgbôghom, ior kpishi ken tar la kôndo sha Yerusalem er Paseka lu a kuma ga, sha u vea za wanger ayol yô.

⁵⁶ Tsô ve gba keren Yesu, ve tile ken tempel ve gba ôron kwagh ayol a ve kaan er: Ne mba henen nana? Una va iniongo ga shinii?

⁵⁷ Upristi mba tamen man Mbafarishi vande yôôn er, aluer or nana fa ape A lu yô, nana̱ pase, sha u vea kôr Un yô.