Yoel 3 - ICIGHAN BIBILO

¹ Gadia, nenge, sha ayange la, man sha shighe la kpaa, zum u me hire a Yuda man Yerusalem ken kwar yô,

² Me kohol akuraior cii, Me sen a a shin pev u Yehoshafati, Me ôr a ijir shimi, sha kwagh u ior Av man sha kwagh u dyako Wam, Iserael, u ve sambe a mi ken akuraior, man ve gema ve kar kwar sha tar Wam la.

³ Ve er ishor sha ior Av, ve gema wannomso ve musan idyakwase a mi, man ve tee wanyekwase kpaa ve yam wain, ve ma.

⁴ Ne mba nyi je, we Tiru man Shidon man ityar i i kase Filitia cii? Né orom iyeve? Aluer ne orom iyev yô, fese je Me gema iyev la Me hire a i sha ityough yenegh.

⁵ Gadia ne kura azurfa Wam man zenaria Wam, ne yem a akaa Am a injaa ne za ver ken utempel enev;

⁶ man shi ne tee ônov mba Yuda man ônov mba Yerusalem, Mbagrika yam; ne yem a ve ca a tar ve;

⁷ yô, nenge, Me mough a ve hen ijiir i ne za tee ve la kera, Me hire a iyevoron la sha ityough yenegh;

⁸ Mo kpaa Me tee ônov enev mba nomso man mba kasev, Mbayuda ve̱ yam, vea gema á tee ve, ior i Sabia vea yam, ikurior i caa, gadia ka TER A kaa nahan ye.

⁹ Yôô nen kwagh ne hen akuraior: Kohol nen iyol i utya; nder nen anomaior, ve̱ mough sha; mbautyav cii ve̱ kporom, ve̱ va.

¹⁰ Tôô nen indyuhar yen gema var nen usanker a mi, ahô a en a sôron ikon a mi kpaa, var nen awange a mi; isheeror kpaa i̱ kaa er: M taver.

¹¹ Er nen fefa, va nen, ne akuraior a a ningir a tser hanma ian cii la, kohol nen imôngo; TERE, sen a mbaageev Ou heregh.

¹² Akuraior a̱ mough, a̱ va hen pev u Yehoshafati; gadia ka keela Me za tema sha u ôron akuraior a a ningir a tser sha hanma ian la ijir ye.

¹³ Naregh nen loji gadia sunda via; va nen, va shoghol nen, gadia ihungwa i kamen wain iv, ahungwa iv lev lev nga haan; gadia ifer ve i vese.

¹⁴ Ikpelaior, zegeikpelaior shin pev u kuren ijir! Gadia iyange i TER i kuren ijir shin pev la mgbôghom.

¹⁵ Iyange man uwer wa ime, asan kpaa hide a iwanger i a ijime.

¹⁶ TER ngu tan kume ken Shion, ngu taver imo ken Yerusalem je; Usha man tar tenger kpa TER Una hingir ijiir i yeren i ior Nav, man garutya u Mbaiserael.

¹⁷ Ka nahan man né fa er M lu TER, Aôndo wen ye, M tem ken Shion, icighanwo Wam; zum la Yerusalem una hingir icighanjiir, atôatyev aa kera kar ker ga.

¹⁸ Tsô sha iyange la iwo ia nôndo wain u nyohon, atumba kpaa aa kuwa inya sha agungu; man iwagh i Yuda cii ia iv mngerem; imbormnger ia due ken iyou i TER, ia ur pev u Shitim.

¹⁹ Igipiti una hingir ice man Edom una hingir taaikôngo u or lu ker ga yô, sha ci u ipila i ve er a ônov mba Yuda la, gadia ve haa awambe a mbaishôôv ken tar ve.

²⁰ Kpa Yuda yô, una lu gbem sha won man Yerusalem kpaa una lu sha ikov ikov.

²¹ Tsô Me pase ishô i awambe a ve a M vande pasen ishô i a ga la; gadia TER tem ken Shion.