Yoel 1 - ICIGHAN BIBILO

¹ Kwaghôron u TER u a va hen Yoel wan u Petuel.

² Ungwa nen kwagh ne, ne mbatamen, ver nen ato ne mba ne tem ken tar ne cii. Imbakwagh ne vande eren sha ayange a en shin sha ayange a uter enev kpa?

³ Ôr nen ônov enev kwagh ne, ônov enev kpaa ve̱ gema ve̱ ôr ônov vev, ônov vev di kpaa ve̱ ôr kov ugen.

⁴ Kwagh u ikomon i tseren akaa la, i undu yô, ikomon i purugh sha ya; kwagh u ikomon i purugh sha i undu yô, agumaikomon ya; man kwagh u agumaikomon a undu yô, ikomon i oron akaa ya.

⁵ Nder nen ne mbahundenmsôrom, vaa nen; ngor nen Mliam ne mba man wain cii, sha ci u wain u nyohon, gadia i tsuwa un sha zwa wen kera.

⁶ Gadia ikur igen nyôr ken tar wam i taver, i ngee gande u ôron; anyi a i ka anyi a begha, anomanyiigh a i kpaa ka a mgbianbegha.

⁷ I vihim kon u wain, i asegh mo kon u tur; i bugh u avuu, i haa kera cii; agbaa a u hingir pung.

⁸ Zungwe nen er iniunkwase i i te ikondo uya, sha ci u nom na u sha iniun na la.

⁹ Nagh ku sha samuyia man nagh ku man tôndo ken iyou i TER; upristi, mbatomov mba TER, mba zungwen.

¹⁰ I vihi ishule kera, inya ngi zungwen; gadia samuyia vihi, wain u he uma kera, mkurem kpaa kera ma ga.

¹¹ Kunya kôr mbashirensule, mbaerentom u ikon i wain mba zungwen, sha ci u alakema man shair, gadia iyiav mbi ken sule saa ishe.

¹² Kon u wain uma kera, man kon u tur use; kon u pomegraneti man ivile kpaa man kon u apel, ikon i ken sule cii uma; man iember bee hen ônov mba iorov kera.

¹³ Ta nen ikondo uya, zungwe nen, ne upristi, ngor nen mliam ne mbatomov mba atse a nanden nagh sha mi; nyôr tsa nen a ikondo uya, ne mbatomov mba Aôndo wam; gadia i kar a nagh ku sha samuyia man ku man ken iyou i Aôndo wam kera.

¹⁴ Tsegha nen iyange i hôron kwaghyan, lôhô nen icighanmkohol; kohol mbatamen man mba ve tem ken tar la cii hen iyou i TER, Aôndo wen, vaa nen a TER genger genger.

¹⁵ Wuu, wuu! iyange la! Gadia iyange i TER mgbôghom ve, ia va er mtim u a dugh hen Uhembanagee nahan.

¹⁶ Kera ka sha ashe ase je, i kar a kwaghyan man iember man msaanyol ken iyou i Aôndo wase kera gaa?

¹⁷ Ivor ngi zulugh shin alôgh a inyaagh; i vihi iuna kera, ikwer kpaa yôhôl, gadia alakema use.

¹⁸ Nenge, er uzendenya ve toghoroo! Kondo akumabua iyol sha ci u toho u aa ya ngu ga, een, ikumiyôngo je kpaa ngi yan ican.

¹⁹ TERE, ka We m vaa a We ye, gadia usu hia ajiir a yan toho ken taaikôngo, nomborusu hia ikon i ken ikôngo cii.

²⁰ Inyam i ken toho je kpaa ngi vaan a We, gadia mngerem ma shin uwagh uma kera; man usu kpaa hia ajiir a yan toho a uile ken taaikôngo.