Yobu 9 - ICIGHAN BIBILO

¹ Tsô Yobu gema kaa er:

² Mimi je, m fa ka nahan; kpa á er nan man or á lu a ishô her Aôndo?

³ Shin á sar nan u hendan a Na, nana fatyô u nan Un imo i môm sha mbampin dubu ga.

⁴ Ngu a kwaghfan ken ishima, man shi A hemba agee; ka an nan vande hendan a Na, man i kpe nan iyolo?

⁵ Wen u A karen a iwo kera, kpa i fe ga, zum u A yôhôl i sha iyugh Na yô;

⁶ A tenger tar, A mgbegh u sha ijiir i u kera, je ityouv mbi u tenger;

⁷ A te iyange icin, i kera dugh ga la, A cir asan;

⁸ A samber kwavaôndo Un tswen, A ndyar sha agôndo a zegemnger;

⁹ A gbe Ber man Anyamaiwa man Ancôgholov, kua Ayou a ken Imbusutariyan la;

¹⁰ A eren akaavesen a a gande u timen fan; een, akaakpilighyol a a ngee je gande u ôron.

¹¹ Ka A kar hen mo, kpa m nenge a Na ga, A kar vishi, kpa m kav Un ga.

¹² Una kôr kwagh Una ngohol yô, ka an nana yange Unu? Ka an nana pine Un er: Ka nyi U eren ne?

¹³ Aôndo Una hide a iyugh Na ijime ga; mbawasen Rahabi gure Un inya;

¹⁴ man hire mo, me zua a imo i me kaa Unu? Me fatyô u tsuwan akaaôron am a me hendan a Na?

¹⁵ Wen yô, shin mea lu a mimi kpaa, me zua a imo i me kaa Un ga; me gba zamber a Orjir wam tsô.

¹⁶ Aluer mea yer, man Una vengese je kpaa, me kera na jighjigh er A ver ato sha imo yam ga.

¹⁷ Una sombom sha zegeahumbe, Una seer mo iyolvihin sha ityôikaa ga kpaa.

¹⁸ M-ee tsô kpaa Una rumun er m̱ ôô ga, shi Una ivim a akaayuan.

¹⁹ Aluer mba ôron kwagh u agee a u a hembe taver la yô, Mo M ngun ne! Man aluer ka u ijirigh yô, ka an nana yilama?

²⁰ Shin mea lu a mimi kpaa, zwa wam je ua nam ibo; shin mea lu jighilii kpaa, Una pase er m lu iferor yô.

²¹ M ngu jighilii; m wa iyol yam iko ga; uma wam ngum kwagh u lahan je.

²² Ka kwagh môm tsô; ka nahan man m kaa mer: Un yô, ka A tim ormimi kua iferor kpaa.

²³ Zum u kwagh u bo za va a ku u fefa yô, Un A gema A naha lanshima u mba ve lu a ibo ga la tar.

²⁴ I gema tar i na sha ikev i mbaaferev; ka A cir mbaajiriv mba u, ishigh; aluer ka Un ga yô, shi ka an je?

²⁵ Ayange am hemba karen fefa a oryevese, nga ze ayem, nga nengen a ma kwagh u doon ga.

²⁶ A kar fefa er utso mba i er ve sha ikenaika nahan, er gafa u a shir ufu sha kwaghyan yô.

²⁷ Aluer me kaa mer, me hungul ivever yam, me kera vihi ishigh sha ga, me lu gbar gbar yô,

²⁸ nahan m gba cian atsan am cii kera kpaa, m fa, Ú nam ishô ga.

²⁹ Á nam ibo kpee je; nahan me gba nyoon iyol yam gbilin tsôô?

³⁰ Aluer mea ee iyol yam sha senou, man mea kile ave am sha mtse kpaa,

³¹ nahan kpaa, Wea tam shin acôvoracô, akondo am je kaa aa gema á nyaghem.

³² Gadia Un ka or, er mo nahan ga, sha u me fatyô u kaan Un imo, man sé va hen ijir imôngo kpaa ga.

³³ Ma or u been se anyiman nan ngu u nana penda ave a nan sha a vese, se mba uhar mban nan ngu ga.

³⁴ Yô, A̱ hidem a akpa Na la kera, mcieryol Na la, a̱ de tem mciem iyol ga.

³⁵ Nahan me ôr kwagh, me kera cia Un ga, gadia ka inja yam nahan ga.