Yobu 5 - ICIGHAN BIBILO

¹ Yô, yila ase; ma or u nana vengese we nan ngu kpa? Man ken uicighanmbaiorov yô, ka hen an ú zaa?

² Gadia ishimanyoon ka i wua imbumeor, man iwuhe kpaa ka i wua orlanenkwagh.

³ M nenge ibumeor wa amise; kpa m wa ya na ifan fese je.

⁴ Ônov nav gba ica a mkpeyol, i her ve hen hunda je, ma or u yiman ve kpaa nan ngu ga.

⁵ Iyiagh ki ken sule ve, mbagenev ka ve ya ki, ken usaa je kpaa ve kura ki kera, mtim aver zwa u menan inyarev vev.

⁶ Gadia mzungu ka shin vuulevu a dugh ga; ican kpaa ka shin inya i menden ga;

⁷ kpa i mar or sha u nan ya ican, er amarama a usu ka a kôndon sha nahan.

⁸ Kpa a lu mo yô, ma m ker Aôndo, ka her Aôndo kpaa ma m ze a kwagh wam ye;

⁹ u A eren akaa a vesen a a gande u timen; akaakpilighyol a a ngee je a gande u ôron;

¹⁰ u A nee ura shin tar, man A tindi mngerem ken akôngo;

¹¹ nahan ka A kende mbaatsanev sha; man mba ve zungu yô, A na ve mkpeyol u hemban.

¹² Ka A bunde awashima u mbawanayom, nahan ave ve nga kera fetyô u eren ma kwagh u lun vough ga.

¹³ Ka A kôr mbafankwagh sha ayom a ve la; man mhen u mbawanayom la a bunde fese.

¹⁴ Atetan kpaa ka ve ya kapa a ime; iyange sha tembe kpaa ka ve peven a pev er ka tugh nahan.

¹⁵ Kape ka A yima mbaibanave sha sanker u duen ken zwa ve la, man sha ikev i mbaageev kpaa la.

¹⁶ Ka nahan man mbaatsanev ve lu a ishima i veren keghen ye, ifer kpaa kusu zwa u i.

¹⁷ Nenge, saan or u Aôndo A kôôm nan la iyol; yô, de kera lahan mtsaha u Uhembanagee la ga.

¹⁸ Gadia Un yô, ka A na mnyoonom, shi A sôr kpaa; ka A na iyolvihin, shi ave Na a gema a wanger i.

¹⁹ Una yima u ken atsan ataratar kpaa; een, ken ataankarahar je kpaa, ifer ia bende a we ga.

²⁰ Sha ijen i gban kpaa, Una yima u sha ku; man ken utya kpaa sha agee a sanker.

²¹ Á yer u sha ifan i nombor la; man shi ú cian mtim zum u una va la kpaa ga.

²² Ú se mtim kua ijen kpaa; man shi ú cia inyamtoho kpaa ga.

²³ Awen a ken toho kpaa á ya ikar a we; man inyam i toho kpaa, ia lu a we bem bem;

²⁴ nahan wea fa er tenti wou a lu doo doo yô; ú za nenge ya wou kpa ú ker ma kwagh shio ga.

²⁵ Shi ú fa er tsombor wou ua ngee, kua ônov ou kpaa, er toho u hen inya nahan.

²⁶ Anyom a ou á iv man ú va shin uwar ye, er ile u alakema sha shighe u u nahan.

²⁷ Nenge, se tôv sha kwagh ne, kape a lu je ne; yô, ungwa ase, shi fa un iyol you kpaa.