Yobu 42 - ICIGHAN BIBILO

¹ Tsô Yobu gema kaa a TER er:

² M fa We U fatyô u eren akaa cii, ma awashima Wou u bunden ngu ga.

³ Ka an nan we mhen ime sha mfe ga? Nahan m gba ôron kwagh u m kav ga tsô, akaa a a gandem, a m fe a ga je.

⁴ Shi ver ato, mo me ôr kwagh; me pine U, yô, pasem,

⁵ Lu m ungwa agwa Wou sha m-ongo u ken ato; kpa hegen yô, ashe am nenge a We.

⁶ Ka nahan man m laha iyol yam, m zamber ken vuulevu kua ken mtwe ye.

⁷ Tsô ken masejime u TER ôr Yobu akaa ne kera yô, TER kaa a Elifasa Orteman, er: Iyugh kendem ken ishima sha a we kua akar a ou ahar la; gadia ne terem sha kwagh u mimi er wanakiriki Wam Yobu a er nahan ga.

⁸ Yô, hegen, kôr nen anomabua ataankarahar man anomaiyôngo ataankarahar, za nen hen wanakiriki Wam Yobu, za na nen nagh ku nanden sha ci wen; wanakiriki Wam Yobu a̱ er msen sha ci wen; gadia Me rumun un, nahan Me kera or ne iyev sha lanegh enegh ga; gadia ne terem sha kwagh u mimi er wanakiriki Wam Yobu a er nahan ga.

⁹ Tsô Elifasa Orteman, man Bildadi Orshuhi, man Sofar Ornaamati, ve yem, ve za er er TER kaa ve nahan; TER kpaa rumun Yobu.

¹⁰ Nahan TER dugh Yobu ken ican na kera, zum u a er msen sha ci u akar a na la; TER shi na Yobu akaa kuma er a tsuaa la nahan kwa har.

¹¹ Tsô anngôôv nav cii va her a na, mba nomso kpaa, mba kasev kpaa, kua mba ve vande fan un kera cii, ve va ya kwagh a na imôngo hen ya na; ve sugh un; shi ve sur un ishima sha ican i TER va a mi sha a na cii la; nahan hanma or na un gbengeriyôô kua kunya u zenaria.

¹² Nahan TER ver Yobu ken masejime doo doo, hemba mver u tsuaa la; a lu a iyôngo dubu pue kar unyiin, urakumi dubu ataratar, abua a kpelan ikyekye ahar ahar kuma dubu môm, kua anmgbianajaki dubu.

¹³ Shi a lu a ônov mba nomso utaankaruhar man mba kasev utar.

¹⁴ U kwase u hiihii la, a ii un iti er, Yemima; u sha uhar la er, Keshia; u sha utar la yô, er, Kerenhapu.

¹⁵ Ken tar la cii, i zua a kasev mba doon ashe er ônov mba Yobu nahan ga; ter ve na ve dyako a anmgbianev vev mba nomso imôngo.

¹⁶ Ken masetyô la Yobu shi tsa anyom deri man akunduahar, a nenge ônov nav kua ônov mba ônov nav, zan zan ikôv inyiin.

¹⁷ Tsô Yobu kpe, bee iyol, tsa sha won kpishi.