Yobu 41 - ICIGHAN BIBILO

¹ U fatyô u tsuwen Leviatan sha tsuwe kpa? Shin ú kighir nombor na sha kor kpa?

² U fatyô u shindin koricen ken ihinga na kpa? Shin ú pev un zeeregh sha ashavela?

³ Una zamber we kpishi? Shin una ôr kwagh a we legh leghe?

⁴ Una ya ikur a we, ú gema un una hingir kpan wou gbeme?

⁵ Ú numbe a na er annyon nahana? Shin ú zer un sha ci u ônov ou mba kaseva?

⁶ Mbakôronishu vea ôr ishe na, vea kar un vea na mbazendenkasua?

⁷ Ú fatyô u côvor ikôvough nagh sha iyô kpa, man ityough nagh kpaa sha udagi mba ishuvu?

⁸ Penda ase uwegh ough sha a na; hen sha numnôngon la, nahan ú kera kimbir eren nahan ga.

⁹ Nenge ishimaverenkeghen i gba gbilin; u nengen na tsô kpaa, ishima ia yina or gaa?

¹⁰ Ma or u taver ishima cihin u bamen un, nan ngu ga. Tsô ka an je nana fatyô u tilen Mo sha ishi?

¹¹ Ka an nan vande nan Mo kwagh er Me shi Me hire nan a mini? Hanma kwagh u shin tar cii ka u Wam.

¹² Me huan ving sha kwagh u alegh a na ga, shin agee a na a vesen, shin iyol na i i doo yum la, kpaa ga.

¹³ Ka an nana bugh un agbende iyolo? Ka an nana nyôr un hen atô u ugbemzwa?

¹⁴ Ka an nana bugh ihinda i ishigh nagha? Anyi a na a sha nongo nongo la, cier iyol.

¹⁵ Mtaver u agbende na, ka kwagh na u tan ihagh a mi je, a kor ayol, er i var a var a yô.

¹⁶ Kigen zua a kigen, je, ahumbe tsô kpaa a fatyô u nyôron her atô u a ga.

¹⁷ A zua ayol kpi kpi, kigen a kigen; a var ayol a a, je, nga paven ga.

¹⁸ Myesem na dugh a iwanger, ashe na nga er kurashee u m-av u use yô.

¹⁹ Ken zwa na la, usu u yeghen ngu dugh ker, amarama a usu kpaa nga tsende.

²⁰ Ken ahenga na la, mnyim ma dugh ker, er ka ken ityegh ki ki pagher man shi er usu u i keer u sha ikenaika yô.

²¹ Iôôn na ngi enger akausu; nomborusu ngu dugh ken zwa na.

²² Sha mon na la, agee tema ker, mcieryol due ngu tsuwen sha ishigh nagh.

²³ Asongonyam a na zua imôngo, a taver gbang gbang ken a na, nga tenger ga.

²⁴ Ishima na taver er iwen yô, taver er nase nahan.

²⁵ Er ka una mough sha yô, mbaageev ve cia; sha ci u ishimanyian, ve hingir dang.

²⁶ Shin ka a gber un sanker je kpaa, a kôr ker ga, shin dagi shin kapa shin iwange kpaa ga.

²⁷ Iyôgh ki iligh ki un er atôyia nahan, togula ngu er ivuwenkon yô.

²⁸ Ivaan ia fatyô u eren un u yevese ga; awen a keren sha mzu hingir un er atôayia nahan.

²⁹ Atumbu a ikon nga un er atôayia nahan; humbe u iwange ka a na un ahan.

³⁰ Ikum na ngi er atsenge a esen yô; ka a nger sha angbiôr er ikyekye i gbiren iyiav nahan.

³¹ Ka a er ivmnger i pagher er ityegh yô; ka a gema ber a hingir er ityegh ki mkuregh yô.

³² A er gbenda u engem ken ijime na; bee er iv hingir ivu yô.

³³ Kwagh u lun er un nahan ngu sha won ga, ka kwagh u i gbe un, a lu a mciem ga je la.

³⁴ Kenger hanma kwagh u icivirigh, a ya tor sha inyamikume i i manger la cii.