Yobu 40 - ICIGHAN BIBILO

¹ Tsô TER shi kaa a Yobu er:

² Or u nan ibo, nana sendegh kwaghôron a Uhembanagee? U nan hendan kwagh a Aôndo yô, nana̱ ôr ase kwagh ne!

³ Tsô Yobu gema kaa a TER er:

⁴ Nenge, m ngu ma kwagh je ga, me kaa U nyi? M wa uwegh zwa.

⁵ M ôr kwagh kwa môm tsô; me kera bugh zwa ga; een, kwa har je kpaa, kpa me kera za hemen ga.

⁶ Tsô TER gema kaa a Yobu ken hiar er:

⁷ Ta ikondo uya hegen er nomsoor yô; Me pine u, yô, we pasem.

⁸ Ú sagh ijirôron Yama? Ú nam ibo sha u ú zua a ishô zee?

⁹ Shin u ngu a uwegh er Aôndo yôô? Ú fatyô u duran imo er Un kpa?

¹⁰ Er hwe, haa mhembe kua icivir iyol; cir icivir kua iengem iyol.

¹¹ Haa iyugh you er mngerem ma ma sar avenge yô; kenger hanma or u nan gengese iyol yô, hee nan.

¹² Kenger hanma or u nan gengese iyol yô, hire a nan ijime; ndyar mbaaferev hen inya henpe ve til la.

¹³ Ii ve shin vuulevu imôngo cii; kange ishiv vev ken ijiir i imegh.

¹⁴ Tsô Mo kpaa Me wuese we, er uwegh ough ku yanegh ku ne u mhembe yô.

¹⁵ Nenge, normnger u M er un di er we nahan; ye toho er bua nahan.

¹⁶ Shi nenge agee a na nga ken iwenge na, tahav nav mbu ken asongonyam a ken iyav nav.

¹⁷ Ka a naregh tsa na er kon u sedar nahan; igbela i ken anam a na peregh.

¹⁸ Akuhe a na ka atam a i er a sha togula je; alegh a na nga er iyôv mbi ipeev mbi iliv yô.

¹⁹ Un ka mhii u igbenda i Aôndo; ka Un u A er un la, A ne un sanker na ye.

²⁰ Gadia ka iwo i ne un kwaghyan ye; inyamtoho cii ngi numbu her.

²¹ Ka a yav shin atine a lotushi, ken iuv shin awoo, man shin ijande,

²² ikon i lotushi ka i gba un mure, mbaakinde mba shin uwagh ka ve kase un.

²³ Nenge, shin ifi una sar avenge kpaa, ikarikase ia gbidye un iyol ga; kwagh nyian un ishima ga, shin ifi u Yordan una tagher un sha zwa je kpaa.

²⁴ Or nana kôr un shighe u a ver ishigh sha a nan, nana pev un ihinga sha iyô kpa?