Yobu 38 - ICIGHAN BIBILO

¹ Tsô TER gema kaa a Yobu ken ura u hiar er:

² Ka an nan we mhen ime sha akaaôron a sha mfe ga laa?

³ Yô, ta ikondo uya hegen er nomsoor yô; Me pine u kwagh, yô, we, pasem.

⁴ Shighe u M tim imagh ki taregh la, u lu hana? Kaa ase, aluer wea lu a mkav sha mi yô.

⁵ Ka an nan ver mkighir u ki–gadia u fa. Shin ka an nan naregh kor u karen kwagh a mi sha ki?

⁶ Ka sha nyi i tim imagh ki u? shin ka an nan ver iwen i sha zongo i u;

⁷ zum u asan a sha use lu wan icam, man ônov mba Aôndo cii ger imo sha iember laa?

⁸ Ka an nan wuhu zegemnger sha uciviri, zum u a te poo, a dugh ken uya laa?

⁹ zum u M cir un abeen iyol er ikondo nahan, man angôghime gema hingir un kwagh u huren un ker la;

¹⁰ shi M ver un ikighir Yam kpaa, M ver un uishindan kua ucivir,

¹¹ man M kaa Mer: Kape ú kighir je ne, ú kar ga; ka heregh je, agôndoamnger ou a sha imanger aa kighir ye!

¹² Er u lu je, u kaa a sev wer, av, mayange kpa? u tese m-av u use ijiir na,

¹³ sha u a̱ kôr akighir a tar, a̱ ndoor mbaaferev sha u kera kpa?

¹⁴ I gema u er inyandor i i ver ikav sha mi nahan; akaa cii due ken igbar er ikondo yô;

¹⁵ i ngohol mbaaferev iwanger ve kera, uwegh ku kenden sha kpaa i sombo ku.

¹⁶ We u hungwa shin ambor a zegemnger mayange kpa? U zende ken ajiir a iuv a shin aiv kpa?

¹⁷ I pase u kwagh u ihinda i kuugh kpa? U nenge ihinda i mure u kuugh mayange kpa?

¹⁸ U kav igbanger i tar kpa? Kaa ase, aluer wea fa akaa angan cii yô.

¹⁹ Gbenda u zan hen ya u iwanger ngu hana? Man ime yô, ijiir i i ngi hana?

²⁰ Sha er ú hemen i zan zan hen ijiir i i, man ú kav igbenda i zan hen ya u i kpa?

²¹ U fa dedoo, gadia i mar u hen shighe la, man ayange a ou sha won kpaa ngee je!

²² U nyôr ken iuna i senou, shin u nenge iuna i awombo

²³ a M ombo sha ci u ayange a ican, man sha ci u iyange i num man i utya la kpa?

²⁴ Gbenda u zan henpe i pav iwanger ngu hana, henpe ahumbe a ken ityoughkitaregh nga a samber sha tar cii la?

²⁵ Ka an nan pav akpa sha ci u ikumenura, man gbenda sha ci u inyiar

²⁶ sha u nôôn ura hen tar u or lu ga, hen taaikôngo henpe ma or lu ga yô,

²⁷ sha u ivin ajiir a a lu gbilin dang la, man sha u nan gwergwe a̱ mende?

²⁸ Ura ngu a ter kpa? Man ka an nan mar aberavureghe?

²⁹ Ka ken iyav mbu an mngerem ma ma kôrough sha wuhe la ma dughu? Man avure a a dugh Sha a a kôrough sha wuhe la, ka an nan mara?

³⁰ Mngerem ka ma kôrough er ka iwen yô, kwavmnger u iv, kôrough.

³¹ U fatyô u kangen ikor i Ancôgholov, shin u saghen ikangenev mbi Anyamaiwa?

³² U fa u duen akav a Sodiaki sha shighe u a? Shin u fatyô u hemen Ber a ônov nav gbenda?

³³ U fa atindi a Sha kpa? U fatyô, u veren mtem u una tema tor sha won kpa?

³⁴ U fatyô u ngoron imo aren sha abeen, sha er mngerem ma ngeen ma cir u iyol kpa?

³⁵ U fatyô u tindin inyiar, i̱ za; man ia kaa a we er: Se mban, kpa?

³⁶ Ka an nan ver kwaghfan sha abeene? Shin ka an nan ne mkohol u abeen mkava?

³⁷ Ka an nana fatyô u ôron iyenge i abeen sha kwaghfana? Shin ka an nana fatyô u keren asegh a mnger a Sha haan kera,

³⁸ zum u ihundu kohol ijiir i môm hingir ijen, man alôgh a kohol a zua ayol a a laa?

³⁹ U fatyô u yaren ikôr sha ci u ngôbegha? Shin u fatyô u nan agumabegha kwaghyan u been ve ijen,

⁴⁰ zum u ve yav ken avur a ve, ve meen kwagh ken ajiir a ve a yeren la kpa?

⁴¹ Ka anti nan ne gugôô kwaghyan na, zum u ônov nav ve vaa a Aôndo, ve zenden wue wue sha ci u mban u kwaghyan laa?