Yobu 35 - ICIGHAN BIBILO

¹ Tsô Elihu shi za hemen a kwaghôron kaa er:

² Ngun ka vough sha mhen wou zee? U ngu kaan wer: Ka perapera wam sha ishigh ki Aôndo,

³ er u kaan wer, ka u a inja sha nyi? M zua a nyi hemba kwagh u ma m zough a mi aluer mea lu eren kwaghbo yôô?

⁴ Yô, me kaa u imo, kua akar a ou a we imôngo cii.

⁵ Kenger Sha, nenge, nenge abeen a a tav sha a kar u sha la,

⁶ aluer wea er kwaghbo yô, ka nyi kwaghvihin u er Unu? Man aluer afer a ou aa ngee nan nan yô, ka nyi u er Unu?

⁷ Aluer wea lu orperapera yô, u na di Un nyi? Shin ka nyi je Una ngohol sha ikev youwe?

⁸ Ifer you yô, ka or er we nahan u er nan i ye; perapera wou kpaa ka wan u or una lu nan a inja ye.

⁹ Er mbamkighir mba sha ican ve ngee yô, ior mba vaan; mba vaan keren iwasen sha ci u agee a mbautahav.

¹⁰ Kpa ma or pine er: Aôndo u A gbem la ngu hana, ga, u A ne atsam a wuese tugh;

¹¹ u A hembe tesen se kwagh a inyamtoho, man shi A er se, se hemba fan kwagh a inyon i sha.

¹² Mba vaan je, kpa A bugh zwa a ve ga, sha ci u iyolgengese i mba ve eren afer la.

¹³ Mimi je, Aôndo Una ungwa gbilinkwagh ga; Uhembanagee Una wa iko sha mi kpaa ga.

¹⁴ Man hire aluer ú kaa wer, u nenge a Na ga, ityôkwagh ngi Un sha ishi; nahan ú kegh Un!

¹⁵ Kpa hegen yô, er A kera tsaha sha ishima i vihin ga, man A we imanger iko yum kpaa ga yô,

¹⁶ nahan yô, Yobu gema ngu bughun zwa na gbilin, ngu seer a seer akaaôron sha lan.