Yobu 34 - ICIGHAN BIBILO

¹ Tsô shi Elihu gema kaa er:

² Ungwa nen ase akaaôron am, ne ior mba fan kwagh; ver nen ato her a mo, ne mba ne lu a mfe.

³ Gadia togh ku kar kwaghôron, er zwa u benden kwaghyan nahan.

⁴ Yô, sé tsuwa nen ayol a ase kwagh u a lu vough; sé fa kwagh u a lu u mimi ker a vese yô.

⁵ Gadia Yobu kaa er: Mo m ngu orperapera je, kpa Aôndo ngohol mimi wam kera;

⁶ er m lu a mimi nahan kpaa, i nengem er m ngu or u aie yô; ivav yam ngi been ga, shin er m lu a ibo ga nahan kpaa.

⁷ Ka anti nan bee Yobu, u a me tarnahan er mngereme?

⁸ u a zenden nongo a mbaeren ityom i ifer, man ngu zan a mbaaferev imôngo kpaa?

⁹ Gadia a kaa er: Ka or a inja je ga, er nan lu a Aôndo doo doo yô.

¹⁰ Yô, ver nen ase ato her a mo, ne ior mba kaven kwagh; Aôndo Una er iferkwagh mayange ga, Uhembanagee kpaa Una er kpe ga.

¹¹ Gadia Una na hanma or sha tom u nan, Una na hanma or kwagh sha ieren i nan.

¹² Een, mimi je, Aôndo Una er ifer ga, Uhembanagee Una nzughul ijir ga.

¹³ Ka anti nan gem tar nan we Un sha ikeve? Man ka anti nan ver tar cii er lu here?

¹⁴ Aluer Una ver ishima sha iyol Na yô, Una kohol Jijingi Na kua iôôn Na Una hide a mi hen iyol Na,

¹⁵ nahan akaa a uma cii aa saa ishe, man shi or kpaa nana hire á hingir vuulevu.

¹⁶ Aluer u ngu a mkav yô, ungwa kwagh ne; Ver ato sha imo i kwaghôron wam.

¹⁷ Á fatyô u or u vendan mimi nana lu ortaregh kpa? Ú cihi u na Un u A lu perapera man u ageegh ibo kpa?

¹⁸ Ka vough je, u á kaa a tor er: U ngu gbilinoro? shin á kaa a atiator er: Ne mba mbaafereve?

¹⁹ Man hire Un u A te ken atiator sha dooshima ga, man A hemba wan mbanyarev iko a mbaatsanev kpaa ga, gadia ve cii ka tom u ave Na je.

²⁰ Ka ve kpe fese; shin ateghôtôutu je kpaa, i kpoghol a ior, ve kar kera, mbaageev kpaa i kar a ve sha, kpa i lu sha uwegh ku or ga.

²¹ Gadia ashe Na nga sha igbenda i or; ngu nengen ijende i nan cii kpaa.

²² Man ime ngi ga, mure u kuugh kpaa ga, hen ape mbaerenifer vea fatyô u yeren la.

²³ Gadia A ver or shighe u nana za sha ishigh ki Aôndo er á ôr nan ijir ga.

²⁴ Ka A hembe ior mbaageev kera, A kera tôv ga, A gema A ver mbagenev sha ityough vev.

²⁵ Gadia A fa ityom ve; A ta ve inya tugh, i her ve je.

²⁶ A tsaha ve er aferaior nahan, sha ishigh ki mba ve lu kenger;

²⁷ gadia ve kaha ve de u dondon Un, ve kera ver ishima sha ma gbenda Na môm môm je ga;

²⁸ nahan ve er mliam ma mbaatsanev ar her a Na, man A ungwa mliam ma mba ican i er ve la.

²⁹ Aluer Wen Una huan yô, ka anti je nana na ibo? man aluer Una yer ishigh Nagh yô, ka anti nana nenge a Na— shin a lu ikurior, shin a lu or môm kpaa, ve imôngo cii—

³⁰ sha er or u wan Aôndo iko ga, nana̱ de tem tor, i̱ hônon ior ga.

³¹ Gadia ma or nana kaa a Aôndo je er: M ya mtsaha, kpa m er kwaghbo ga;

³² kwagh u m nenge ga yô, We tesem; aluer mea vande eren kwaghbo yô, me kera er ga—

³³ nahan A̱ kure kwagh sha awashima wouwee? Gadia doo u ga, nahan we ú tese kwagh u hemban doon; ka mo ga! Yô, ôr kwagh u u fe yô.

³⁴ Mbakavenkwagh vea kaam, kua orfankwagh u nan ver ato her a mo yô, kpaa er:

³⁵ Yobu gbe lamen tsô, ka sha mfe ga, akaaôron a na kpaa ka a sha kwaghfan ga.

³⁶ Guda yô, ma i kar Yobu zan zan mkur, gadia ngu ôron kwagh er ka mbaaferev yô!

³⁷ Gadia ngu seer anyiman sha kwaghbo na, ngu kuren ave her atô wase, ngu seer a seer kwaghôron na u hendan a Aôndo la.