Yobu 32 - ICIGHAN BIBILO

¹ Tsô ior itiar ne de u bughun zwa a Yobu, gadia a lu a perapera ken ashe na yum.

² Nahan ishima nyoon Elihu wan u Barakel, Orbushi, u ken tsombor u Ram; ka Yobu ishima nyoon un a na ye; gadia a na ishô iyol na sha ishigh ki Aôndo yum.

³ Akar a na atar la kpaa, ishima nyoon un a ve, sha ci u ve zough a imo i ôron ga, kpa ve ne Yobu ibo yô.

⁴ Elihu lu tamber u ôron kwagh a Yobu, gadia ve cii ve lu tamen a na.

⁵ Kpa zum u Elihu nenge er ior itiar ne kera bugh zwa ga yô, ishima nyoon un.

⁶ Tsô Elihu wan u Barakel, Orbushi, hii kwaghôron er: Mo m ngu wanye; ne yô, ne tsa sha won; ka nahan man m ne ian, m cihi u tesen ne mnenge wam ga ye.

⁷ M kaa mer: Ayange a̱ ôr kwagh, ikpila-anyom kpaa i̱ tese kwaghfan.

⁸ Kpa ka jijingi u ken or la, kua iôôn i Uhembanagee kpaa, ve ne ve mkav ye.

⁹ Ka mbatamen tsô, ve lu mbafankwagh ga, shi ka mbatsan sha won tseegh kpaa ve fe ijir ga.

¹⁰ Ka nahan man m kaa mer: Ver nen ato hen mo, ye, mo kpaa, me pase mhen wam.

¹¹ Nenge, m kegh mer me ungwa akaaôron a en, m ver ato sha atôakaa a en kpaa, zan zan ne zua a akaaôron a vough.

¹² Een, m ver ato ven, man nenge, or môm hemba Yobu ga, mô wen môm kpaa na mrumun sha kwaghôron na ga.

¹³ Shi de kaan nen ner: Se zua a kwaghfan ve, ga; Aôndo Una hemba un, á lu or ga!

¹⁴ Gadia a sendegh kwaghôron a mo ga; man mo kpaa, ka sha mkaanem enem me ôr kwagh a na ga.

¹⁵ Kunda ve iyol, ve kera bugh zwa ga, ve kera lu a kwaghôron ga.

¹⁶ Nahan me tamber er ve kera er kwagh ga, ve huan ving ve kera lu a imo ga nee?

¹⁷ Mo kpaa me ôr kwagh wam, mo kpaa me pase mhen wam.

¹⁸ Gadia m mgbough a akaaôron; jijingi u a lu ken a mo ngu tolough a mo.

¹⁹ Nenge, vanger wam ngu er wain u a lu a gbenda u duen ga yô, er akpa a wain a he a a mgbôghom u paven yô.

²⁰ Yô, me ôr kwagh, i̱ shi heghem mo iyol, me bugh zwa me kaa imo.

²¹ Yô, me ta ken ma or ga, me kume or sha kwaghôron kpaa ga.

²² Gadia m fa u kumen or sha kwaghôron ga; á lu nahan yô, u A gbem la, Una kar a mo kera fese je.