Yobu 29 - ICIGHAN BIBILO

¹ Tsô Yobu shi tôô injakwagh na, kaa er:

² Ma m lu er sha iwer i tsuaa la yô, er sha ayange a Aôndo lu wan mo iko la nahan;

³ zum u imenger Na lu wanger sha ityough yagh la, man sha iwanger Na la, m lu zenden karen ken atô u imegh;

⁴ er m lu sha ayange am a uye, shighe u kwaghmyer u Aôndo lu sha tenti wam la;

⁵ shighe u Uhembanagee hira lu a mo, man ônov av kpaa ve kasem la;

⁶ shighe u i lu ôôn angahar am a ndyaren sha atumba a kôrough, man vande lu haan mo uikuwanmbamkurev la!

⁷ Zum u mea zaan sha hunda u karen yemen hen gar, mea sôr kwaghteman wam sha tembe yô,

⁸ mbayevikaior vea nenge a mo yô, ve yer, mbatamen kpaa ve mough ve tile sha;

⁹ atiator huan ayôôso, a wa ave zwa;

¹⁰ imo i mbavesen i kondo, nombor ve u var sha ikughô.

¹¹ Gadia togh ku ungwam a ungwa tsô, ku nam iveren, man ishe ia nenge a mo kpaa i pase kwagh wam;

¹² gadia m yima icanor u nan vaa er i̱ wase nan yô, kua ancôghol, u nan lu a or u wasen nan ga yô.

¹³ Iveren i or u nan mgbôghom u saan ishe la, i haa sha a mo; m er ishima i kwasecôghol i ember yagh yagh.

¹⁴ M haa perapera iyol, a cirim er ka ikondo yô; mimi wam lu er riga nahan man shi er tsar u sha ityou yô.

¹⁵ M hingir ashe a orapirashe, man angahar a orsombon.

¹⁶ M hingir ter u mbaibanave; m tôv ijir i or u m fe nan ga yô.

¹⁷ M tsuwa anomanyiigh a iferor, m tsuwa nan kwagh u nan nyom sha anyi la kera.

¹⁸ Nahan m fa mer, me kpe ken iya yam, me seer iyenge i ayange am er waarawa nahan.

¹⁹ Mise wam samber za ar henpe mngerem ma lu yô, avure lu sha gbaa wam tugh jimin cii.

²⁰ Icivir i lum hegh gbem, ada wam kpaa hingir mo hegh ken uwe.

²¹ Ka her a mo ior lu veren ato, keghen kpaa ye, ve huan ving, ve ungwan mhen wam.

²² Mea ôr kwagh yô, ve kera bugh zwa ga, kwaghôron wam a nôndo ve iyol.

²³ Ve veren ashe mo er i veren sha ura nahan, ve aver zwa gbangese er ka sha ci u urahe nahan.

²⁴ M se ve zum u ve lu tan akperan la; msaan u ishigh yagh kpaa, ve fatyô u bunden ga.

²⁵ Mea kar mea za hen ve kpaa, m tema ityoor, m lu er tor u ikumior nahan, er or u surun mbazungwen asema yô.