Yobu 28 - ICIGHAN BIBILO

¹ Gadia ijiir i azurfa a dugh her, ngi, shi ijiir ngi sha ci u zenaria u i ser un la kpaa.

² Ka shin inya i dughun iyôgh ki iligh ye, man ka iwen kpaa i soughon i man togula a dugh ker ye.

³ Or ka nan er ime i bee kera, zan zan ar hen ikighir i hemban zan cii, nan sangen awen a angôghime kua a mure u kuugh kpaa ye.

⁴ Nan time ihungwa ca a ijiir i or nan tem la; angahar a karen sha kera umbur ve ga; i zer ve, ve shir shin, mba ca a ior, ve zungur.

⁵ Inya yô, ka shin i je kwaghyan a dugh ye; kpa shin atô u i je, i vughul shimi er ka sha usu yô.

⁶ Awen a i, ka ijiir i usafir, vuwe zenaria ngu ker.

⁷ Gbenda la yô, inyon i tswam fa u ga, ishe i tsoghor kpaa ngi a nenge u mayange ga;

⁸ inyamikume i manger, ndyar sha u ga; begha kpaa kar sha u ga.

⁹ Nan naregh uwegh ku nan sha vande u taver; nan môgh iwo shin atine a i je.

¹⁰ Nan ongor igbenda ken avande; ishe i nan ngi nengen akaa a injaa atô kposo kposo.

¹¹ Nan kondo ambor a mnger er a̱ de saar ga; kwagh u a lu myer kpaa, ka nan due a mi ken igbar.

¹² Kpa kwaghfan yô, ka han je á zua a mini? man ijiir i mkav yô, ngi hana?

¹³ Or fa inja na ga; mba zough a mi ken tar u mbaumav kpaa ga.

¹⁴ Ivmnger ngi kaan er: Ngu ken a mo ga; zegemnger kpaa kaan er: Ngu hen a mo ga.

¹⁵ Zenaria u wang kpaa á fatyô u nan sha mi ga, man azurfa kpaa, á fatyô u karen myohom nam kimbin ishe na a min kpaa ga.

¹⁶ Zenaria u Ofir kuma sha mi ga, shin oniki u taver ishe je kpaa ga, shin safir kpaa ga.

¹⁷ Zenaria man jingi kpaa yina u karen sha mi; á fatyô u musan un sha ikav mbi zenaria u wang kpaa ga.

¹⁸ Korali man krusetalu kuma u teren je ga; een, u lun a kwaghfan hemba urubi inja,

¹⁹ Topashi u Etiopia kpaa kuma u karen sha mi ga, á fatyô u karen ishe na sha zenaria u wang kpaa ga.

²⁰ Kwaghfan yô, ka han je a dughu? Man ijiir i mkav yô, ngi hana?

²¹ Ngu myer sha ashe a uumace cii, i cir un sha u inyon i sha kpaa i̱ de fe un ga yô.

²² Mtim man ku ve kaa er: Se ungwa gwa na sha ato ase je.

²³ Ka Aôndo A kav gbenda na ye, shi ka Un A fe ijiir na kpaa ye.

²⁴ Gadia Un yô, ngu nengen zan zan akighir a tar, A nenge akaa a shin tar cii.

²⁵ Zum u yan kar myohom ma ahumbem la yô, shi A kar mngerem sha ikaren kpaa,

²⁶ zum u A wa ura tindi yô, shi A ver gbenda sha ci u inyiar kpaa,

²⁷ zum la A nenge a mi, shi A yôô un kpaa, A ver un taveraa, shi A tôv inja na cii kpaa;

²⁸ kpa or yô, A kaa a nan er: Nenge, mcie u cian TER, ka kwaghfan je la, man u paven a iferkwagh ka mkav.