Yobu 22 - ICIGHAN BIBILO

¹ Tsô Elifasa Orteman, gema kaa er:

² Or á fatyô u eren Aôndo kwagh u una lu Un a inja je kpa? Ei, orfankwagh ka nan er kwagh u injaa sha ci u nan iyol i nan.

³ Perapera wou ngu Uhembanagee ma kwagh u wan iko a mi je kpa? Shin ka Un a mtser aluer igbenda you ngi vough yôô?

⁴ Ka sha ci u mcieaôndo wou, A tsahan we, shi A ze a we ken ijir kpaa yee?

⁵ Kera ka ifer you i vese ye gaa? Akaabo a ou kpaa nga a ikighir ga.

⁶ Gadia u ngohol atungu hen anngôu sha inja ga, u er uidyeleghmbaiorov akondo a ve kera kpaa,

⁷ u ne mbavôron mngerem wer ve̱ ma ga, u nyum mbagenev kwaghyan kpaa.

⁸ Kpa or u ageegh yô, ka nan, nan lu a tar ye; man or u icivirigh kpaa, ka nan, nana tema ken u.

⁹ U ne kasev mba côgholov gbenda ave gbilin, akaseaveegh a ancôgholov kpaa i kever a kera.

¹⁰ Ka nahan man akaahônon a kase u a wa atô, man mciem ma tan we iyol fese ye.

¹¹ Shin u nenge a ime kua aiv a mnger a a uv u la gaa?

¹² Aôndo ngu Sha hweng je gaa? Nenge mgbeca u asan a a hembe gban ca la.

¹³ Man u kaa wer: Aôndo fa nyi? Una fatyô u ôron ijir ken angôghime?

¹⁴ Abeen a wan ime hingir kwagh u yisan Un sha u A̱ de nengen kera ga yô; ngu zenden sha kwavaôndo Sha!

¹⁵ Ka u ka zan sha tsegbenda, u mbaaferev ve vande zenden sha mi la?

¹⁶ Ve mba i tsuwe ve kera er shighe ve a lu a kuma ga la, mba imagh vegh ki kough kera er ifi nahan;

¹⁷ ve mba ve kaa a Aôndo er: Kar hen a vese kera; man: Ka nyi je, Uhembanagee Una er se?

¹⁸ Nahan kpaa, A iv uya vev sha akaa a dedoo. Kpa mhen u mbaaferev gba ca a mo.

¹⁹ Mbaperapera mba nengen kwagh la, ka saan ve iyol; mbaishôôv mba nahan ve tar:

²⁰ Mimi je, mba ve mough num a vese la, i gber ve kera, man kwagh u a shi ve her kpaa, usu hia.

²¹ Zua vea Aôndo, yô, tema bem bem; ka nahan man ú zua a iveren ye.

²² Shi ngohol ityesen hen zwa Na, koso akaaôron a Na ken ishima you.

²³ Aluer ú hide hen Uhembanagee yô, á maa u; aluer ú dugh afer ken utenti ou kera,

²⁴ aluer ú haa zenaria shin inya, man zenaria u Ofir kpaa ken awen a shin iwagh,

²⁵ nahan Uhembanagee Una hingir inyaregh you kua atihi a azurfa a ou kpaa ye;

²⁶ ka nahan man ú ember ken Uhembanagee, shi ú kende ishigh you sha ken Aôndo kpaa ye.

²⁷ Ú sôn Un, Una ungwa u, shi ú kure uiceghzwa ou kpaa.

²⁸ Kwagh u u we ken ishima yô, una kure sha mi, iwanger kpaa ia wanger sha igbenda you.

²⁹ Shighe u ia sen a sen yô, ú kaa wer: Kende sha; man or u varen inya kpaa, Una yima nan.

³⁰ Una yima u nan lu a ishô ga kpaa; een, á yima nan sha ci u mwanger u ave ou.