Yobu 19 - ICIGHAN BIBILO

¹ Tsô Yobu gema kaa er:

² Né vihim ishima nan je, né heren mo sha akaaôrono?

³ Ka acin pue je, ne lu van mo ahenge ne; ne er a mo dang, kunya kpaa u kôr ne ga.

⁴ Shin a lu mimi je, m er kwaghbo yô, kwaghbo wam ngu sha a mo iyol yam tsô.

⁵ A lu mimi je, hange ne u gengese iyol sha a mo yô, pasem nen ibo yam, i i lu ityôikaa i van mo ahenge la.

⁶ Fa nen, ka Aôndo je, A nzughul a mo ye, A wa kper Na kasem yisa.

⁷ Nenge, ka m gbire vaa, kpa i ungwam her ga, m yila mer i̱ wasem, kpa ijirôron i sha mimi ngi ga.

⁸ A wa igyar yisam gbenda sha er m̱ de fetyô u karen ga yô, A wam ime sha igbenda!

⁹ A erem icivir kera, A saghem tsar sha ityou kpaa.

¹⁰ A yôhôl mo avegher cii, m saa ve; A môgh ishimaverenkeghen yam, er ka kon nahan.

¹¹ Iyugh Na ta sha mo, yegh er usu nahan, A nengem er m ngu orihom Na yô.

¹² Akum a Na ka a va ishima i môm, a ta atihi a inyaagh sha u nôngon ityav a mo, a wa afo a kase tenti wam a yisa.

¹³ A za ver anmgbianev av ica a mo; mba ve fem kpaa ve gbihim kera.

¹⁴ Anmgbianev av kpaa, ve de u van her a mo, ahur a am a mimi kpaa ve hungul mo.

¹⁵ Mba ken ya wam kua mbayevkasev mba eren mo tom, ve gema ve nengen mo er orvannya nahan, m hingir ve er or u ve fe nan ga yô.

¹⁶ M yila kpan wam, kpa a vengese ga, ka m zamber a na sha zwa wam.

¹⁷ Iôôn yam kpaa hingir kwagh u vihin kwase wam je; m hingir ônov mba ngôm kwagh u ndôhôrshima.

¹⁸ Mbayev mba kiriki kpaa laham, ka mea nôngon u moughon sha kpaa ve terem.

¹⁹ Ahur a am a tumen idyu a ve cii, nyaghem, mba ve doom ishima kpaa ve gema ijime a mo.

²⁰ Akuhe am var sha kwav wam kua inyam yam, m war sha ikughur.

²¹ Yô, zungwem mhôônom, zungwem nen mhôônom, ne ahur a am; gadia uwegh ku Aôndo ta sha a mo.

²² Shi ka nyi ne tevem a ican er Aôndo nahana? Man ne yam ijime je, kpa kuma ne gaa?

²³ Ma i nger akaaôron am hegen! Ma i nger a ken ruamabera!

²⁴ Ma i nger a sha pensel u iyôô man sha tojir, ma i nger a sha vande, a̱ lu her gbem!

²⁵ Kpa mo yô, m fa Oryiman wam ngu uma, ken masejime Una mough Una tile sha vuulevu.

²⁶ Er á tolough kwavyolough wam kera, inyam yam ia lu ga kpaa, me nenge a Aôndo.

²⁷ Un u mo me nenge a Na iyol yam, ashe am je, aa nenge, á lu a orgen ga. Ahi am nga vihin ken atô wam sha mzungu.

²⁸ Aluer nea kaa ner: Nahan sé er un ican nana? Gayô i zua a ityôkwagh ken a na je—

²⁹ yô, cia nen sanker; gadia iyugh ka iferkwagh, i kuma mtsaha u sha sanker, sha u ne̱ fa er ijirôron i lu yô.