Yobu 18 - ICIGHAN BIBILO

¹ Tsô Bildadi Orshuhi, gema kaa er:

² Ka hanma shighe je né de u hônon akaaôrono? Vande henen nen kwagh, man sé mase ôron kwagh ye.

³ Ka sha ci u nyi i nengen se er se mba uzendenya nahan, se hingir we er abumeaior nahana?

⁴ We u u ande iyol you sha ishimavihin ne, sha ci wou tsô, á undu tar u̱ hingir gbilini? shin á bugh vande hen ijiir i u kera?

⁵ Een, iwanger i iferor ia pir, nomborusu u nan kpaa ua mondo ga.

⁶ Iwanger i i lu ken tenti u nan kpaa ia hingir ime, imenger i i lu sha a nan kpaa ia pir.

⁷ A-avenangahar a nan a sha agee la aa kôvor, man mhen u nan iyol i nan una gema á gbihi nan inya.

⁸ Gadia nan gba kper sha angahar a nan je, nan zende sha ihungwa i hônon.

⁹ Kwaghhônon kôr nan ikishinguhar, nan gba wese.

¹⁰ I yer nan to shin inya, kua ikôv sha gbenda.

¹¹ Mciem ta nan iyol avegher cii, ma ya nan angahar.

¹² Ijen bee nan agee iyol, mtim kegh nan ikua ikua.

¹³ Waniunda u ku ya kwavyolough u nan, a ya alegh a nan.

¹⁴ I tôô nan hen tenti u nan suur min la kera, i za a nan hen tor u mcieryol.

¹⁵ Kwagh u a lu u nan ga la, gema tema ken iyou i nan, i haa sulfur sha ya u nan.

¹⁶ Amise a nan uma shin inya, vegher u sha yô, gbaa u nan use.

¹⁷ M-umbur u ma i umbur nan hen tar kpaa, hungul kera, á kera ter iti i nan sha won mayange ga.

¹⁸ I zenda nan ken iwanger kera, nan yem ken ime, i hure nan shin tar kera kpaa.

¹⁹ Nan ngu a wan shin ma wan u wan u nan ken ityô i nan kpaa ga; ma or shi hen ajiir a nan lu tsan la kpaa ga.

²⁰ Mba ve lu shin ityôtar yô, kpiligh ve iyol sha iyange na la; man mba ve lu sha ityoughkitaregh yô, mke ta ve iyol.

²¹ Mimi je, kape uya mba mba ve lu a mimi ga la, ve lu ne, kape ya u or u fan Aôndo ga kpaa, a lu ne.