Yobu 12 - ICIGHAN BIBILO

¹ Tsô Yobu gema kaa er:

² Mimi je, ka ne ne lu ior ye, man kwaghfan una kpe a ven imôngo.

³ Mo kpaa m ngu a mkav er ne nahan; m yina sha a ven ga; ka an je nan fe akaa ne ga?

⁴ Mo m hingir huror wam kwagh u ahan je, mo u m yer Aôndo man Aôndo A ongom kpaa ne; or u jighilii, u mimi hingir kwagh u ahan je.

⁵ Sha mhen u or u i kpe nan iyol yô, kwaghbo u tseren or, ka nan kwagh u lahan kera; ngu keghen a kegh mba angahar a dolough ve yô.

⁶ Utenti mba mbanumungbenda ka ve lu a mkpeyol mbabamen Aôndo kpaa, ka ve tema bem bem; mba ve tee aôndo ve sha ave la.

⁷ Kpa, pine ase ishôso, i̱ pase u; kua inyon i sha kwavaôndo kpaa, i̱ kaa u;

⁸ shin ôr kwagh a tar kpaa, u̱ tese u, kua ishu i shin zegemnger kpaa, i̱ pase u.

⁹ Ken mban cii ka an nan fe er i lu uwegh ku TER ku er kwagh ne ga?

¹⁰ Un u uma u hanma kwaghuma a lu sha ikev Na yô, kua iôôn i uumace cii kpaa.

¹¹ Togh ka ku kar kwaghôron, er zwa kpaa ka u bende u kav mnyoho u kwaghyan u u nahan gaa?

¹² Ka hen mbatsan sha won kwaghfan a lu ye, shi ka ken ayange a ngeen mkav a lu kpaa ye.

¹³ Ka her a Na kwaghfan kua agee a lu ye; Un ngu a mhen man mkav.

¹⁴ Nenge, ka A yôhôl, i kera fatyô u shi maan her ga; ka A wuhe or, i kera fatyô u bughun ga.

¹⁵ Nenge, ka A yange mngerem, tsô ma tôndo; A shi A pase ma, zan zan ma vihi tar.

¹⁶ Ka her a Na agee kua mfe u mimi, ve lu ye; or u i tsugh nan man orcugh la, ka mba Nav je.

¹⁷ Ka A bugh mbahenen kwagh akondo iyol, A yem a ve kera, shi A gema mbaajiriv kpaa ve hingir abumeaior.

¹⁸ Ka A sagh ikangenev mbi utor ve kange la kera, A gema A zer ve atsar shin iwenge.

¹⁹ Ka A bugh upristi akondo iyol, A yem a ve kera, shi A zôhô mbaageev.

²⁰ Ka A ngohol kwaghôron u mba ve kom u veren ishima sha a ve la kera, shi ngohol mkav u mbatamen kera kpaa.

²¹ Ka A hee ashagbaior, shi A oghom kwange u mbaageev.

²² Ka A pase akaamyer a a lu ken ime, man a dugh mure u kuugh A va a mi ken igbar.

²³ Ka A seer akuraior iyenge, shi A gema A tim a kpaa; ka A er akuraior a samber sha won, shi A za a a ken kwar.

²⁴ Kaa ngohol kwaghfan u uityombaiorov mba tar kera, A na ve u zenden wue wue ken desereti henpe gbenda u lu ga yô.

²⁵ Ve peven a pev ken ime, iwanger lu ga, ka A na ve ve zenden zemba ze zemba er or u hunden msôrom nahan.