Yobu 11 - ICIGHAN BIBILO

¹ Tsô Sofar Ornaamati, gema kaa er:

² Akaaôron ne kpishi nahan kpaa, ma i kaa imo sha mi gaa? Or u lamen yum nahan nana zua a ishô kpa?

³ Ior vea huan sha ci u imanger you nee? Er u gbe nahan tar nahan kpaa, ma or nana hee u gaa?

⁴ Gadia u kaa wer: Ityesen yam ka i wang je, m ngu wang sha ashe Ou.

⁵ Aôndo ma A er kwagh, ma A bugh zwa Na, ma A yange u!

⁶ Ma A tese u akaamyer a kwaghfan, gadia a nga a seer or mfe je kuma mfe u nan vande lun a mi la kwa har; nahan u fa er Aôndo A kera umbur ibo you cii ga yô.

⁷ U fatyô u fan mze u akaa a Aôndo a ze yum la kpa? U fatyô u fan kwagh u Uhembanagee cii, ú bee kpa?

⁸ Ka ica Sha hweng; ú er nana? Za shin je hemba Sheol kpaa; ú fa nyi?

⁹ Ikaren na hemba lihen a tar, man hemba gbanger a zegemnger kpaa.

¹⁰ Aluer Una gba karen man Una kôr á wuhe, Una yila mkohol u jirigh yô, ka an nana yange Unu?

¹¹ Gadia Un yô, A fa agbilinaior; ka A nenge ifer, shin Una wa iko sha i ga kpaa.

¹² Kape gbilinor kpaa nana zua a mfe; man á mar wanjaki u toho hingir or je.

¹³ Aluer we ú ver ishima you jighilii, man ú naregh ave ou hen a Na;

¹⁴ aluer ifer ia lu sha uwegh ough yô, hire a i kera ca, de kera deen iferkwagh i̱ luun ken utenti ou ga;

¹⁵ een, ka nahan man ú kende ishigh you sha a ibo ga, ma u til dong, ma u cie ga kpaa ye;

¹⁶ een, ma u hungul ican you, ma u umbur i er mngerem ma ma kar kera nahan.

¹⁷ Uma wou kpaa ma a wanger je, ma a hembe iyange sha tembe; shin ime ia lu je kpaa, ia lu er ka sha use nahan.

¹⁸ Tsô ma u tem dedoo, sha ci u ishimaverenkeghen ngi; een, ú yenge han han kpaa, ú za yav bem bem.

¹⁹ Wea yav inya kpaa, ma or nana ta u mciem iyol ga; een, ior kpishi vea ker iwasen her a we.

²⁰ Kpa mbaaferev yô, vea hungwa ashe ikôr, gbenda u waren kpaa ngu ga, ishimaverenkeghen ve mase shin u sulen tsô.