Yesaia 8 - ICIGHAN BIBILO

¹ TER shi kaa a mo er: Tôô zegekpande, nger sha mi sha pensel u or wer: Maher-shalal-hashi-bashi (hegen, hegen je, ishar i yan, fefa je, msar)

² man Me tôô mbashiada mba mimi, pristi Uria man Sekaria wan u Yeberekia.

³ Tsô m za hen profeti u kwase, nahan a wa iyav a mar wan u nomso. Tsô TER kaa a mo er: Ii un iti wer, Maher-shalal-hashi-bashi.

⁴ Gadia er wanakiriki la una lu a fa u yilan er, terem man ngôm ga je tsô, á kura inyaregh ki Damaseku man ishar i á ya ken Samaria la, á za a mi sha ishigh ki tor u Ashiria.

⁵ TER shi ôr kwagh a mo, kaa er:

⁶ Er ior mban ve vende mngerem ma Shiloa ma ma kough ving la, ve gem ve ember a Reshin man wan u Remalia yô;

⁷ nahan yô, TER Una va ve a mngerem ma Ifi ma taver, maa ngee kpishi, ka tor u Ashiria a icivir na cii je la; ma á iv ukungô nav cii, ma á sar avenge na cii;

⁸ una kuwa zan zan ken Yuda; una kuwa emememe, una kar; una gba or iker iker je; mnaregh u akper a na una iv igbanger i tar wou cii, we Imanuel.

⁹ Ger nen ayôôso ne ior, i̱ kondo ne iyol; ver nen ato, ne mba ken ityar i icaa cii, ta nen akondo uya, i̱ kondo ne iyol, ta nen ikondo uya, i̱ kondo ne iyol.

¹⁰ Hen nen kwagh ayol a en, kpa una lu a inja ga; ôr nen kwagh, kpa kwagh á er sha mi ga, gadia Aôndo ngu a vese.

¹¹ Gadia TER kaam nahan zum u uwegh Nagh ku kôrom man A wam kwagh er m̱ de zenden sha gbenda u ior mban ga la, A kaa er:

¹² De yer nen kwagh u ior mban ve yer er “zwa u zuan” la, ner, zwa u zuan, ga; man shi de cie nen kwagh u ve cie la ga, man shi mciem ma̱ de te ne iyol ga.

¹³ TER u akum a Sha ka Un, tsegha nen Un ye, ka Un A̱ lu ne kwagh u cian, shi A̱ lu ne kwagh u cier iyol kpaa ye.

¹⁴ Tsô Una hingir icighanjiir man iwen i keman angahar sha mi, man vande u nôngon gbev sha mi, hen uya mba Iserael uhar cii, man shi kper man kwaghhônon kpaa sha ci u mba ve tem ken Yerusalem.

¹⁵ Ior kpishi vea nôngo gbev, vea gba, vea sombo, vea gba ken kwaghhônon, á kôr ve.

¹⁶ Kange mpase, cir ityesen, ver ikav sha mi hen mbahenen Av.

¹⁷ Tsô me kegh TER u A yer ya u Yakob ishigh Nagh la, ka sha a Na ishimaverenkeghen yam i lu ye.

¹⁸ Nenge, mo kua ônov mba TER A nem ne, se mba uivande kua akav hen Iserael sha ikev i TER u akum a Sha, u A tem sha uwo u Shion la.

¹⁹ Zum u vea kaa a ven er: Pine nen ujijingi mba mbakpenev kua mbatsenganpasen akaa kpaa, mba ve ndahar imo, ve er kwagh shin iker la–kera hemba doon u ior vea pine Aôndo ve gaa? Á pine mbakpenev kwagh sha ci u mbaumavaa?

²⁰ Hide nen sha ityesen kua mpase! Aluer vea ôr sha kwaghôron ne ga yô, m-av u use kera ngu sha ci ve ga.

²¹ Tsô vea gba zenden ken ican kua ijen kpaa; zum u ijen ia kôr ve yô, ishima ia nyoon ve, vea tuhwa tor ve kua Aôndo ve vea kenger sha;

²² vea kenger shin inya, kpa nenge, ka ican man ime, ime i cier iyol; á zenda ve vea nyôr ken angôghime.